TITUS
Rg-Veda: Rg-Veda-Samhita
Part No. 465
Previous part

Hymn: 24_(465) 
Verse: 1 
Halfverse: a    वृषा॒ मद॒ इन्द्रे॒ श्लोक॑ उ॒क्था सचा॒ सोमे॑षु सुत॒पा ऋ॑जी॒षी ।
   वृषा॒ मद॒ इन्द्रे॒ श्लोक॑ उ॒क्था
   वृषा मदः इन्द्रे श्लोकः उ॒क्था
   वृषा मद इन्द॑रे श्लोक उ॒क्था

Halfverse: b    सचा॒ सोमे॑षु सुत॒पा ऋ॑जी॒षी ।
   सचा सोमे॑षु सुत॒पाः ऋ॑जी॒षी ।
   सचा सोमे॑षु सुत॒पा ऋ॑जी॒षी ।

Halfverse: c    अ॑र्च॒त्र्यो॑ म॒घवा॒ नृभ्य॑ उ॒क्थैर्द्यु॒क्षो राजा॑ गि॒रामक्षि॑तोतिः ।।
   अ॑र्च॒त्र्यो॑ म॒घवा॒ नृभ्य॑ उ॒क्थैर्
   अर्च॒त्र्यः म॒घवा नृभ्यः उ॒क्थैः
   अ॑र्च॒त्रियो म॒घवा नृभ्य उ॒क्थैर्

Halfverse: d    द्यु॒क्षो राजा॑ गि॒रामक्षि॑तोतिः ।।
   द्यु॒क्षः राजा गि॒राम् अक्षि॑तोतिः ।।
   द्यु॒क्षो राजा गि॒राअम् अक्षि॑तोतिः ।।


Verse: 2 
Halfverse: a    ततु॑रिर्वी॒रो नर्यो॒ विचे॑ताः॒ श्रोता॒ हवं॑ गृण॒त उ॒र्व्यू॑तिः ।
   ततु॑रिर्वी॒रो नर्यो॒ विचे॑ताः
   ततु॑रिः वी॒रः नर्यः विचे॑ताः
   ततु॑रिर् वी॒रो नरि॑यो विचे॑ताः

Halfverse: b    श्रोता॒ हवं॑ गृण॒त उ॒र्व्यू॑तिः ।
   श्रोता हव॑म् गृण॒तः उ॒र्व्यू॑तिः ।
   श्रोता हवं गृण॒त उर्विऊतिः ।

Halfverse: c    वसुः॒ शंसो॑ न॒रां का॒रुधा॑या वा॒जी स्तु॒तो वि॒दथे॑ दाति॒ वाज॑म् ।।
   वसुः॒ शंसो॑ न॒रां का॒रुधा॑या
   वसुः शंसः न॒राम् का॒रुधा॑याः
   वसुः शंसो न॒राअं का॒रुधा॑या

Halfverse: d    वा॒जी स्तु॒तो वि॒दथे॑ दाति॒ वाज॑म् ।।
   वा॒जी स्तु॒तः वि॒दथे दाति वाज॑म् ।।
   वा॒जी स्तु॒तो वि॒दथे दाति वाज॑म् ।।


Verse: 3 
Halfverse: a    अक्षो॒ न च॒क्र्योः॑ शूर बृ॒हन्प्र ते॑ म॒ह्ना रि॑रिचे॒ रोद॑स्योः ।
   अक्षो॒ न च॒क्र्योः॑ शूर बृ॒हन्
   अक्षः न च॒क्र्योः शूर बृ॒हन्
   अक्षो न ? च॒क्रियोः शूर बृ॒हन्

Halfverse: b    प्र ते॑ म॒ह्ना रि॑रिचे॒ रोद॑स्योः ।
   प्र ते म॒ह्ना रि॑रिचे रोद॑स्योः ।
   प्र ते म॒ह्ना रि॑रिचे रोद॑सीयोः ।

Halfverse: c    वृ॒क्षस्य॒ नु ते॑ पुरुहूत व॒या व्यू॒तयो॑ रुरुहुरिन्द्र पू॒र्वीः ।।
   वृ॒क्षस्य॒ नु ते॑ पुरुहूत व॒या
   वृ॒क्षस्य नु ते पुरुहूत व॒याः
   वृ॒क्षस्य नु ते पुरुहूत व॒या

Halfverse: d    व्यू॒तयो॑ रुरुहुरिन्द्र पू॒र्वीः ।।
   वि ऊ॒तयः रुरुहुः इन्द्र पू॒र्वीः ।।
   वि ऊ॒तयो रुरुहुर् इन्द्र पू॒र्वीः ।।


Verse: 4 
Halfverse: a    शची॑वतस्ते पुरुशाक॒ शाका॒ गवा॑मिव स्रु॒तयः॑ सं॒चर॑णीः ।
   शची॑वतस्ते पुरुशाक॒ शाका
   शची॑वतः ते पुरुशाक शाकाः
   शची॑वतस् ते पुरुशाक शाका

Halfverse: b    गवा॑मिव स्रु॒तयः॑ सं॒चर॑णीः ।
   गवा॑म् इव स्रु॒तयः सं॒चर॑णीः ।
   गवा॑म् इव स्रु॒तयः सं॒चर॑णीः ।

Halfverse: c    व॒त्सानां॒ न त॒न्तय॑स्त इन्द्र॒ दाम॑न्वन्तो अदा॒मानः॑ सुदामन् ।।
   व॒त्सानां॒ न त॒न्तय॑स्त इन्द्र
   व॒त्साना॑म् न त॒न्तयः ते इन्द्र
   व॒त्सानाअं न त॒न्तय॑स् त इन्द्र

Halfverse: d    दाम॑न्व न्तोअदा॒मानः॑ सुदामन् ।।
   दाम॑न्वन्तः अदा॒मानः सुदामन् ।।
   दाम॑न्वन्तो अदा॒मानः सुदामन् ।।


Verse: 5 
Halfverse: a    अ॒न्यद॒द्य कर्व॑रम॒न्यदु॒ श्वो ऽस॑च्च॒ सन्मुहु॑राच॒क्रिरिन्द्रः॑ ।
   अ॒न्यद॒द्य कर्व॑रम॒न्यदु॒ श्वो
   अ॒न्यत् अ॒द्य कर्व॑रम् अ॒न्यत् उ श्वः
   अ॒न्यद् अ॒द्य कर्व॑रम् अ॒न्यद् उ श्वो

Halfverse: b    ऽस॑च्च॒ सन्मुहु॑राच॒क्रिरिन्द्रः॑ ।
   अस॑त् च सत् मुहु॑र् आच॒क्रिः इन्द्रः ।
   अस॑च् च सन् मुहु॑र् आच॒क्रिर् इन्द्रः ।

Halfverse: c    मि॒त्रो नो॒ अत्र॒ वरु॑णश्च पू॒षार्यो वश॑स्य पर्ये॒तास्ति॑ ।।
   मि॒त्रो नो॒ अत्र॒ वरु॑णश्च पू॒षा
   मि॒त्रः नः अत्र वरु॑णः च पू॒षा
   मि॒त्रो नो अत्र वरु॑णश् च पू॒षा

Halfverse: d     अ॒र्यो वश॑स्य पर्ये॒तास्ति॑ ।।
   अ॒र्यः वश॑स्य पर्ये॒ता अ॑स्ति ।।
   अ॒र्यो वश॑स्य परिए॒ता अ॑स्ति ।।


Verse: 6 
Halfverse: a    वि त्वदापो॒ न पर्व॑तस्य पृ॒ष्ठादु॒क्थेभि॑रिन्द्रानयन्त य॒ज्ञैः ।
   वि त्वदापो॒ न पर्व॑तस्य पृ॒ष्ठाद्
   वि त्वत् आपः न पर्व॑तस्य पृ॒ष्ठात्
   वि त्वद् आपो न पर्व॑तस्य पृ॒ष्ठाद्

Halfverse: b    उ॒क्थेभि॑रिन्द्रानयन्त य॒ज्ञैः ।
   उ॒क्थेभिः इन्द्र अनयन्त य॒ज्ञैः ।
   उ॒क्थेभि॑र् इन्द्र अनयन्त य॒ज्ञैः ।

Halfverse: c    तं त्वा॒भिः सु॑ष्टु॒तिभि॑र्वा॒जय॑न्त आ॒जिं न ज॑ग्मुर्गिर्वाहो॒ अश्वाः॑ ।।
   तं त्वा॒भिः सु॑ष्टु॒तिभि॑र्वा॒जय॑न्त
   तम् त्वा आ॒भिः सु॑ष्टु॒तिभिः वा॒जय॑न्तः
   तं त्वा॒भिः सु॑ष्टु॒तिभि॑र् वा॒जय॑न्त

Halfverse: d    आ॒जिं न ज॑ग्मुर्गिर्वाहो॒ अश्वाः॑ ।।
   आ॒जिम् न ज॑ग्मुः गिर्वाहः अश्वाः ।।
   आ॒जिं न ज॑ग्मुर् गिर्वाहो अश्वाः ।।


Verse: 7 
Halfverse: a    न यं जर॑न्ति श॒रदो॒ न मासा॒ न द्याव॒ इन्द्र॑मवक॒र्शय॑न्ति ।
   न यं जर॑न्ति श॒रदो॒ न मासा
   न यम् जर॑न्ति श॒रदः न मासाः
   न यं जर॑न्ति श॒रदो न मासा

Halfverse: b    न द्याव॒ इन्द्र॑मवक॒र्शय॑न्ति ।
   न द्यावः इन्द्र॑म् अवक॒र्शय॑न्ति ।
   न द्याव इन्द्र॑म् अवक॒र्शय॑न्ति ।

Halfverse: c    वृ॒द्धस्य॑ चिद्वर्धतामस्य त॒नू स्तोमे॑भिरु॒क्थैश्च॑ श॒स्यमा॑ना ।।
   वृ॒द्धस्य॑ चिद्वर्धतामस्य त॒नू
   वृ॒द्धस्य चित् वर्धताम् अस्य त॒नूः
   वृ॒द्धस्य चिद् वर्धताम् अस्य त॒नू

Halfverse: d    स्तोमे॑भिरु॒क्थैश्च॑ श॒स्यमा॑ना ।।
   स्तोमे॑भिः उ॒क्थैः च श॒स्यमा॑ना ।।
   स्तोमे॑भिर् ? उ॒क्थैश् च श॒स्यमा॑ना ।।


Verse: 8 
Halfverse: a    न वी॒ळवे॒ नम॑ते॒ न स्थि॒राय॒ न शर्ध॑ते॒ दस्यु॑जूताय स्त॒वान् ।
   न वी॒ळवे॒ नम॑ते॒ न स्थि॒राय
   न वी॒ळवे नम॑ते न स्थि॒राय
   न वी॒ळवे नम॑ते न स्थि॒राय

Halfverse: b    न शर्ध॑ते॒ दस्यु॑जूताय स्त॒वान् ।
   न शर्ध॑ते दस्यु॑जूताय स्त॒वान् ।
   न शर्ध॑ते दस्यु॑जूताय स्त॒वान् ।

Halfverse: c    अज्रा॒ इन्द्र॑स्य गि॒रय॑श्चिदृ॒ष्वा ग॑म्भी॒रे चि॑द्भवति गा॒धम॑स्मै ।।
   अज्रा॒ इन्द्र॑स्य गि॒रय॑श्चिदृ॒ष्वा
   अज्राः इन्द्र॑स्य गि॒रयः चित् ऋ॒ष्वाः
   अज्रा इन्द्र॑स्य गि॒रय॑श् चिद् ऋ॒ष्वा

Halfverse: d    ग॑म्भी॒रे चि॑द्भवति गा॒धम॑स्मै ।।
   ग॑म्भी॒रे चि॑त् भवति गा॒धम् अस्मै ।।
   ग॑म्भी॒रे चि॑द् भवति गा॒धम् अस्मै ।।


Verse: 9 
Halfverse: a    ग॑म्भी॒रेण॑ न उ॒रुणा॑मत्रि॒न्प्रेषो य॑न्धि सुतपाव॒न्वाजा॑न् ।
   ग॑म्भी॒रेण॑ न उ॒रुणा॑मत्रिन्
   गम्भी॒रेण नः उ॒रुणा अमत्रिन्
   गम्भी॒रेण न उ॒रुणा अमत्रिन्

Halfverse: b    प्रेषो य॑न्धि सुतपाव॒न्वाजा॑न् ।
   प्र इ॒षः य॑न्धि सुतपावन् वाजा॑न् ।
   प्र इ॒षो य॑न्धि सुतपावन् वाजा॑न् ।

Halfverse: c    स्था ऊ॒ षु ऊ॒र्ध्व ऊ॒ती अरि॑षण्यन्न॒क्तोर्व्यु॑ष्टौ॒ परि॑तक्म्यायाम् ।।
   स्था ऊ॒ षु ऊ॒र्ध्व ऊ॒ती अरि॑षण्यन्न्
   स्थाः उ+ सु ऊ॒र्ध्वः ऊ॒ती अरि॑षण्यन्
   स्था ऊ षु ऊ॒र्ध्व ऊ॒ती अरि॑षण्यन्न्

Halfverse: d    अ॒क्तोर्व्यु॑ष्टौ॒ परि॑तक्म्यायाम् ।।
   अ॒क्तोः व्यु॑ष्टौ परि॑तक्म्यायाम् ।।
   अ॒क्तोर् विउष्टौ परि॑तक्मियायाम् ।।


Verse: 10 
Halfverse: a    सच॑स्व ना॒यमव॑से अ॒भीक॑ इ॒तो वा॒ तमि॑न्द्र पाहि रि॒षः ।
   सच॑स्व ना॒यमव॑से अ॒भीक
   सच॑स्व ना॒यम् अव॑से अ॒भीके
   सच॑स्व ना॒यम् अव॑से अ॒भीक

Halfverse: b    इ॒तो वा॒ तमि॑न्द्र पाहि रि॒षः ।
   इ॒तः वा तम् इन्द्र पाहि रि॒षः ।
   इ॒तो वा तम् इन्दर पाहि रि॒षः ।

Halfverse: c    अ॒मा चै॑न॒मर॑ण्ये पाहि रि॒षो मदे॑म श॒तहि॑माः सु॒वीराः॑ ।।
   अ॒मा चै॑न॒मर॑ण्ये पाहि रि॒षो
   अ॒मा च एनम् अर॑ण्ये पाहि रि॒षः
   अ॒मा चै॑नम् अर॑ण्ये पाहि रि॒षो

Halfverse: d    मदे॑म श॒तहि॑माः सु॒वीराः॑ ।।
   मदे॑म श॒तहि॑माः सु॒वीराः ।।
   मदे॑म ? श॒तहि॑माः सु॒वीराः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.