TITUS
Rg-Veda: Rg-Veda-Samhita
Part No. 466
Previous part

Hymn: 25_(466) 
Verse: 1 
Halfverse: a    या त॑ ऊ॒तिर॑व॒मा या प॑र॒मा या म॑ध्य॒मेन्द्र॑ शुष्मि॒न्नस्ति॑ ।
   या त॑ ऊ॒तिर॑व॒मा या प॑र॒मा
   या ते ऊ॒तिः अ॑व॒मा या प॑र॒मा
   या त ऊ॒तिर् अव॒मा या प॑र॒मा

Halfverse: b    या म॑ध्य॒मेन्द्र॑ शुष्मि॒न्नस्ति॑ ।
   या म॑ध्य॒मा इ॑न्द्र शुष्मिन् अस्ति ।
   या म॑ध्य॒मा इ॑न्दर शुष्मिन् अस्ति ।

Halfverse: c    ताभि॑रू॒ षु वृ॑त्र॒हत्ये॑ ऽवीर्न ए॒भिश्च॒ वाजै॑र्म॒हान्न॑ उग्र ।।
   ताभि॑रू॒ षु वृ॑त्र॒हत्ये॑ ऽवीर्न
   ताभिः उ+ सु वृ॑त्र॒हत्ये अवीः नः
   ताभि॑र् ऊ षु वृ॑त्र॒हत्ये अवीर् न

Halfverse: d    ए॒भिश्च॒ वाजै॑र्म॒हान्न॑ उग्र ।।
   ए॒भिः च वाजैः म॒हान् नः उग्र ।।
   ए॒भिश् च वाजै॑र् म॒हान् न उग्र ।।


Verse: 2 
Halfverse: a    आभि॒ स्पृधो॑ मिथ॒तीररि॑षण्यन्न॒मित्र॑स्य व्यथया म॒न्युमि॑न्द्र ।
   आभि॒ स्पृधो॑ मिथ॒तीररि॑षण्यन्न्
   आभिः स्पृधः मिथ॒तीः अरि॑षण्यन्
   आभि स्पृधो मिथ॒तीर् अरि॑षण्यन्न्

Halfverse: b    अ॒मित्र॑स्य व्यथया म॒न्युमि॑न्द्र ।
   अ॒मित्र॑स्य व्यथय+ म॒न्युम् इन्द्र ।
   अ॒मित्र॑स्य व्यथया म॒न्युम् इन्द्र ।

Halfverse: c    आभि॒र्विश्वा॑ अभि॒युजो॒ विषू॑ची॒रार्या॑य॒ विशो ऽव॑ तारी॒र्दासीः॑ ।।
   आभि॒र्विश्वा॑ अभि॒युजो॒ विषू॑चीर्
   आभिः विश्वाः अभि॒युजः विषू॑चीः
   आभि॑र् विश्वा अभि॒युजो विषू॑चीर्

Halfverse: d    आर्या॑य॒ विशो ऽव॑ तारी॒र्दासीः॑ ।।
   आर्या॑य विशः अव तारीः दासीः ।।
   आर्या॑य विशो अव तारीर् दासीः ।।


Verse: 3 
Halfverse: a    इन्द्र॑ जा॒मय॑ उ॒त ये ऽजा॑मयो ऽर्वाची॒नासो॑ व॒नुषो॑ युयु॒ज्रे ।
   इन्द्र॑ जा॒मय॑ उ॒त ये ऽजा॑मयो
   इन्द्र जा॒मयः उ॒त ये अजा॑मयः
   इन्द्र जा॒मय उ॒त ये ऽजा॑मयो

Halfverse: b    ऽर्वाची॒नासो॑ व॒नुषो॑ युयु॒ज्रे ।
   अ॑र्वाची॒नासः व॒नुषः युयु॒ज्रे ।
   अ॑र्वाची॒नासो व॒नुषो युयु॒ज्रे ।

Halfverse: c    त्वमे॑षां विथु॒रा शवां॑सि ज॒हि वृष्ण्या॑नि कृणु॒ही परा॑चः ।।
   त्वमे॑षां विथु॒रा शवां॑सि
   त्वम् एषाम् विथु॒रा शवां॑सि
   तु॒वम् एषाअं विथु॒रा शवां॑सि

Halfverse: d    ज॒हि वृष्ण्या॑नि कृणु॒ही परा॑चः ।।
   ज॒हि वृष्ण्या॑नि कृणु॒हि+ परा॑चः ।।
   ज॒हि वृष्ण्या॑नि कृणु॒ही परा॑चः ।।


Verse: 4 
Halfverse: a    शूरो॑ वा॒ शूरं॑ वनते॒ शरी॑रैस्तनू॒रुचा॒ तरु॑षि॒ यत्कृ॒ण्वैते॑ ।
   शूरो॑ वा॒ शूरं॑ वनते॒ शरी॑रैस्
   शूरः वा शूर॑म् वनते शरी॑रैः
   शूरो वा शूरं वनते शरी॑रैस्

Halfverse: b    तनू॒रुचा॒ तरु॑षि॒ यत्कृ॒ण्वैते॑ ।
   त॑नू॒रुचा तरु॑षि यत् कृ॒ण्वैते ।
   त॑नू॒रुचा तरु॑षि यत् कृ॒ण्वैते ।

Halfverse: c    तो॒के वा॒ गोषु॒ तन॑ये॒ यद॒प्सु वि क्रन्द॑सी उ॒र्वरा॑सु॒ ब्रवै॑ते ।।
   तो॒के वा॒ गोषु॒ तन॑ये॒ यद॒प्सु
   तो॒के वा गोषु तन॑ये यत् अ॒प्सु
   तो॒के वा गोषु तन॑ये यद् अ॒प्सु

Halfverse: d    वि क्रन्द॑सी उ॒र्वरा॑सु॒ ब्रवै॑ते ।।
   वि क्रन्द॑सी उ॒र्वरा॑सु ब्रवै॑ते ।।
   वि क्रन्द॑सी उ॒र्वरा॑सु ब्रवै॑ते ।।


Verse: 5 
Halfverse: a    न॒हि त्वा॒ शूरो॒ न तु॒रो न धृ॒ष्णुर्न त्वा॑ यो॒धो मन्य॑मानो यु॒योध॑ ।
   न॒हि त्वा॒ शूरो॒ न तु॒रो न धृ॒ष्णुर्
   न॒हि त्वा शूरः न तु॒रः न धृ॒ष्णुः
   न॒हि त्वा शूरो न तु॒रो न धृ॒ष्णुर्

Halfverse: b    न त्वा॑ यो॒धो मन्य॑मानो यु॒योध॑ ।
   न त्वा यो॒धः मन्य॑मानः यु॒योध ।
   न त्वा यो॒धो मन्य॑मानो यु॒योध ।

Halfverse: c    इन्द्र॒ नकि॑ष्ट्वा॒ प्रत्य॑स्त्येषां॒ विश्वा॑ जा॒तान्य॒भ्य॑सि॒ तानि॑ ।।
   इन्द्र॒ नकि॑ष्ट्वा॒ प्रत्य॑स्त्येषां
   इन्द्र नकिः त्वा प्रति अस्ति एषाम्
   इन्द्र नकि॑ष् ट्वा प्रति अस्ति एषां

Halfverse: d    विश्वा॑ जा॒तान्य॒भ्य॑सि॒ तानि॑ ।।
   विश्वा जा॒तानि अ॒भि अ॑सि तानि ।।
   विश्वा जा॒तानि अ॒भि अ॑सि तानि ।।


Verse: 6 
Halfverse: a    स प॑त्यत उ॒भयो॑र्नृ॒म्णम॒योर्यदी॑ वे॒धसः॑ समि॒थे हव॑न्ते ।
   स प॑त्यत उ॒भयो॑र्नृ॒म्णम॒योर्
   स प॑त्यते उ॒भयोः नृ॒म्णम् अ॒योः
   स प॑त्यत उ॒भयो॑र् नृ॒म्णम् अ॒योर्

Halfverse: b    यदी॑ वे॒धसः॑ समि॒थे हव॑न्ते ।
   यदि+ वे॒धसः समि॒थे हव॑न्ते ।
   यदी वे॒धसः समि॒थे हव॑न्ते ।

Halfverse: c    वृ॒त्रे वा॑ म॒हो नृ॒वति॒ क्षये॑ वा॒ व्यच॑स्वन्ता॒ यदि॑ वितन्त॒सैते॑ ।।
   वृ॒त्रे वा॑ म॒हो नृ॒वति॒ क्षये॑ वा
   वृ॒त्रे वा म॒हः नृ॒वति क्षये वा
   वृ॒त्रे वा म॒हो नृ॒वति क्षये वा

Halfverse: d    व्यच॑स्वन्ता॒ यदि॑ वितन्त॒सैते॑ ।।
   व्यच॑स्वन्ता यदि वितन्त॒सैते ।।
   व्यच॑स्वन्ता यदि वितन्त॒सैते ।।


Verse: 7 
Halfverse: a    अध॑ स्मा ते चर्ष॒णयो॒ यदेजा॒निन्द्र॑ त्रा॒तोत भ॑वा वरू॒ता ।
   अध॑ स्मा ते चर्ष॒णयो॒ यदेजा॑न्
   अध स्म+ ते चर्ष॒णयः यत् एजा॑न्
   अध स्मा ते चर्ष॒णयो यद् एजा॑न्

Halfverse: b    इन्द्र॑ त्रा॒तोत भ॑वा वरू॒ता ।
   इन्द्र त्रा॒ता उ॒त भ॑व+ वरू॒ता ।
   इन्द्र त्रा॒ता उ॒त भ॑वा वरू॒ता ।

Halfverse: c    अ॒स्माका॑सो॒ ये नृत॑मासो अ॒र्य इन्द्र॑ सू॒रयो॑ दधि॒रे पु॒रो नः॑ ।।
   अ॒स्माका॑सो॒ ये नृत॑मासो अ॒र्य
   अ॒स्माका॑सः ये नृत॑मासः अ॒र्यः
   अ॒स्माका॑सो ये नृत॑मासो अ॒र्य

Halfverse: d    इन्द्र॑ सू॒रयो॑ दधि॒रे पु॒रो नः॑ ।।
   इन्द्र सू॒रयः दधि॒रे पु॒रः नः ।।
   इन्द्र सू॒रयो दधि॒रे पु॒रो नः ।।


Verse: 8 
Halfverse: a    अनु॑ ते दायि म॒ह इ॑न्द्रि॒याय॑ स॒त्रा ते॒ विश्व॒मनु॑ वृत्र॒हत्ये॑ ।
   अनु॑ ते दायि म॒ह इ॑न्द्रि॒याय
   अनु ते दायि म॒हे इ॑न्द्रि॒याय
   अनु ते दायि म॒ह इ॑न्द्रि॒याय

Halfverse: b    स॒त्रा ते॒ विश्व॒मनु॑ वृत्र॒हत्ये॑ ।
   स॒त्रा ते विश्व॑म् अनु वृत्र॒हत्ये ।
   स॒त्रा ते विश्व॑म् अनु वृत्र॒हत्ये ।

Halfverse: c    अनु॑ क्ष॒त्रमनु॒ सहो॑ यज॒त्रेन्द्र॑ दे॒वेभि॒रनु॑ ते नृ॒षह्ये॑ ।।
   अनु॑ क्ष॒त्रमनु॒ सहो॑ यजत्र
   अनु क्ष॒त्रम् अनु सहः यजत्र
   अनु क्ष॒त्रम् अनु सहो यज॒त्रा

Halfverse: d     इन्द्र॑ दे॒वेभि॒रनु॑ ते नृ॒षह्ये॑ ।।
   इन्द्र दे॒वेभिः अनु ते नृ॒षह्ये ।।
   इन्द्र दे॒वेभि॑र् अनु ते नृ॒षह्ये ।।


Verse: 9 
Halfverse: a    ए॒वा न॒ स्पृधः॒ सम॑जा स॒मत्स्विन्द्र॑ रार॒न्धि मि॑थ॒तीरदे॑वीः ।
   ए॒वा न॒ स्पृधः॒ सम॑जा स॒मत्स्व्
   ए॒व+ नः स्पृधः सम् अज+ स॒मत्सु
   ए॒वा न स्पृधः सम् अजा स॒मत्सु

Halfverse: b    इन्द्र॑ रार॒न्धि मि॑थ॒तीरदे॑वीः ।
   इन्द्र रार॒न्धि मि॑थ॒तीः अदे॑वीः ।
   इन्द्र रार॒न्धि मि॑थ॒तीर् अदे॑वीः ।

Halfverse: c    वि॒द्याम॒ वस्तो॒रव॑सा गृ॒णन्तो॑ भ॒रद्वा॑जा उ॒त त॑ इन्द्र नू॒नम् ।।
   वि॒द्याम॒ वस्तो॒रव॑सा गृ॒णन्तो
   वि॒द्याम वस्तोः अव॑सा गृ॒णन्तः
   वि॒द्याम वस्तो॑र् अव॑सा गृ॒णन्तो

Halfverse: d    भ॒रद्वा॑जा उ॒त त॑ इन्द्र नू॒नम् ।।
   भ॒रद्वा॑जाः उ॒त ते इन्द्र नू॒नम् ।।
   भ॒रद्वा॑जा उ॒त त इन्द्र नू॒नम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.