TITUS
Rg-Veda: Rg-Veda-Samhita
Part No. 469
Previous part

Hymn: 28_(469) 
Verse: 1 
Halfverse: a    आ गावो॑ अग्मन्नु॒त भ॒द्रम॑क्र॒न्सीद॑न्तु गो॒ष्ठे र॒णय॑न्त्व॒स्मे ।
   आ गावो॑ अग्मन्नु॒त भ॒द्रम॑क्रन्
   आ गावः अग्मन् उ॒त भ॒द्रम् अक्रन्
   आ गावो अग्मन्न् उ॒त भ॒द्रम् अक्रन्

Halfverse: b    सीद॑न्तु गो॒ष्ठे र॒णय॑न्त्व॒स्मे ।
   सीद॑न्तु गो॒ष्ठे र॒णय॑न्तु अ॒स्मे ।
   सीद॑न्तु गो॒ष्ठे र॒णय॑न्तु अ॒स्मे ।

Halfverse: c    प्र॒जाव॑तीः पुरु॒रूपा॑ इ॒ह स्यु॒रिन्द्रा॑य पू॒र्वीरु॒षसो॒ दुहा॑नाः ।।
   प्र॒जाव॑तीः पुरु॒रूपा॑ इ॒ह स्यु॑र्
   प्र॒जाव॑तीः पुरु॒रूपाः इ॒ह स्युः
   प्र॒जाव॑तीः पुरु॒रूपा इ॒ह स्यु॑र्

Halfverse: d    इन्द्रा॑य पू॒र्वीरु॒षसो॒ दुहा॑नाः ।।
   इन्द्रा॑य पू॒र्वीः उ॒षसः दुहा॑नाः ।।
   इन्द्रा॑य पू॒र्वीर् उ॒षसो दुहा॑नाः ।।


Verse: 2 
Halfverse: a    इन्द्रो॒ यज्व॑ने पृण॒ते च॑ शिक्ष॒त्युपेद्द॑दाति॒ न स्वम्मु॑षायति ।
   इन्द्रो॒ यज्व॑ने पृण॒ते च॑ शिक्षत्य्
   इन्द्रः यज्व॑ने पृण॒ते च शिक्षति
   इन्द्रो यज्व॑ने पृण॒ते च शिक्षति

Halfverse: b    उपेद्द॑दाति॒ न स्वम्मु॑षायति ।
   उप इत् ददाति न स्वम् मुषायति ।
   उपेद् ददाति न सु॒वम् मुषायति ।

Halfverse: c    भूयो॑भूयो र॒यिमिद॑स्य व॒र्धय॒न्नभि॑न्ने खि॒ल्ये नि द॑धाति देव॒युम् ।।
   भूयो॑भूयो र॒यिमिद॑स्य व॒र्धय॑न्न्
   भूयो॑भूयः र॒यिम् इत् अस्य व॒र्धय॑न्
   भूयो॑भूयो र॒यिम् इद् अस्य व॒र्धय॑न्न्

Halfverse: d    अभि॑न्ने खि॒ल्ये नि द॑धाति देव॒युम् ।।
   अभि॑न्ने खि॒ल्ये नि द॑धाति देव॒युम् ।।
   अभि॑न्ने खि॒ल्ये नि द॑धाति देव॒युम् ।।


Verse: 3 
Halfverse: a    न ता न॑शन्ति॒ न द॑भाति॒ तस्क॑रो॒ नासा॑मामि॒त्रो व्यथि॒रा द॑धर्षति ।
   न ता न॑शन्ति॒ न द॑भाति॒ तस्क॑रो
   न ताः न॑शन्ति न द॑भाति तस्क॑रः
   न ता न॑शन्ति न द॑भाति तस्क॑रो

Halfverse: b    नासा॑मामि॒त्रो व्यथि॒रा द॑धर्षति ।
   न आ॑साम् आमि॒त्रः व्यथिः आ द॑धर्षति ।
   नासा॑म् आमि॒त्रो व्यथि॑र् आ द॑धर्षति ।

Halfverse: c    दे॒वांश्च॒ याभि॒र्यज॑ते॒ ददा॑ति च॒ ज्योगित्ताभिः॑ सचते॒ गोप॑तिः स॒ह ।।
   दे॒वांश्च॒ याभि॒र्यज॑ते॒ ददा॑ति च
   दे॒वान् च याभिः यज॑ते ददा॑ति च
   दे॒वांश् च याभि॑र् यज॑ते ददा॑ति च

Halfverse: d    ज्योगित्ताभिः॑ सचते॒ गोप॑तिः स॒ह ।।
   ज्योक् इत् ताभिः सचते गोप॑तिः स॒ह ।।
   ज्योग् इत् ताभिः सचते गोप॑तिः स॒ह ।।


Verse: 4 
Halfverse: a    न ता अर्वा॑ रे॒णुक॑काटो अश्नुते॒ न सं॑स्कृत॒त्रमुप॑ यन्ति॒ ता अ॒भि ।
   न ता अर्वा॑ रे॒णुक॑काटो अश्नुते
   न ताः अर्वा रे॒णुक॑काटः अश्नुते
   न ता अर्वा रे॒णुक॑काटो अश्नुते

Halfverse: b    न सं॑स्कृत॒त्रमुप॑ यन्ति॒ ता अ॒भि ।
   न सं॑स्कृत॒त्रम् उप यन्ति ताः अ॒भि ।
   न सं॑स्कृत॒त्रम् उप यन्ति ता अ॒भि ।

Halfverse: c    उ॑रुगा॒यमभ॑यं॒ तस्य॒ ता अनु॒ गावो॒ मर्त॑स्य॒ वि च॑रन्ति॒ यज्व॑नः ।।
   उ॑रुगा॒यमभ॑यं॒ तस्य॒ ता अनु
   उरुगा॒यम् अभ॑यम् तस्य ताः अनु
   उरुगा॒यम् अभ॑यं तस्य ता अनु

Halfverse: d    गावो॒ मर्त॑स्य॒ वि च॑रन्ति॒ यज्व॑नः ।।
   गावः मर्त॑स्य वि च॑रन्ति यज्व॑नः ।।
   गावो मर्त॑स्य वि च॑रन्ति यज्व॑नः ।।


Verse: 5 
Halfverse: a    गावो॒ भगो॒ गाव॒ इन्द्रो॑ मे अछा॒न्गावः॒ सोम॑स्य प्रथ॒मस्य॑ भ॒क्षः ।
   गावो॒ भगो॒ गाव॒ इन्द्रो॑ मे अछान्
   गावः भगः गावः इन्द्रः मे अछान्
   गावो भगो गाव इन्द्रो मे अछान्

Halfverse: b    गावः॒ सोम॑स्य प्रथ॒मस्य॑ भ॒क्षः ।
   गावः सोम॑स्य प्रथ॒मस्य भ॒क्षः ।
   गावः सोम॑स्य प्रथ॒मस्य भ॒क्षः ।

Halfverse: c    इ॒मा या गावः॒ स ज॑नास॒ इन्द्र॑ इ॒छामीद्धृ॒दा मन॑सा चि॒दिन्द्र॑म् ।।
   इ॒मा या गावः॒ स ज॑नास॒ इन्द्र
   इ॒माः याः गावः स ज॑नासः इन्द्र
   इ॒मा या गावः स ज॑नास इन्द्र

Halfverse: d    इ॒छामीद्धृ॒दा मन॑सा चि॒दिन्द्र॑म् ।।
   इ॒छामि इत् हृ॒दा मन॑सा चित् इन्द्र॑म् ।।
   इ॒छामीद् धृ॒दा मन॑सा चिद् इन्द्र॑म् ।।


Verse: 6 
Halfverse: a    यू॒यं गा॑वो मेदयथा कृ॒शं चि॑दश्री॒रं चि॑त्कृणुथा सु॒प्रती॑कम् ।
   यू॒यं गा॑वो मेदयथा कृ॒शं चि॑द्
   यू॒यम् गावः मेदयथ+ कृ॒शम् चित्
   यू॒यं गा॑वो मेदयथा कृ॒शं चि॑द्

Halfverse: b    अश्री॒रं चि॑त्कृणुथा सु॒प्रती॑कम् ।
   अ॑श्री॒रम् चित् कृणुथ+ सु॒प्रती॑कम् ।
   अ॑श्री॒रं चि॑त् कृणुथा सु॒प्रती॑कम् ।

Halfverse: c    भ॒द्रं गृ॒हं कृ॑णुथ भद्रवाचो बृ॒हद्वो॒ वय॑ उच्यते स॒भासु॑ ।।
   भ॒द्रं गृ॒हं कृ॑णुथ भद्रवाचो
   भ॒द्रम् गृ॒हम् कृणुथ भद्रवाचः
   भ॒द्रं गृ॒हं कृ॑णुथ भद्रवाचो

Halfverse: d    बृ॒हद्वो॒ वय॑ उच्यते स॒भासु॑ ।।
   बृ॒हत् वः वयः उच्यते स॒भासु ।।
   बृ॒हद् वो वय उच्यते स॒भासु ।।


Verse: 7 
Halfverse: a    प्र॒जाव॑तीः सू॒यव॑सं रि॒शन्तीः॑ शु॒द्धा अ॒पः सु॑प्रपा॒णे पिब॑न्तीः ।
   प्र॒जाव॑तीः सू॒यव॑सं रि॒शन्तीः
   प्र॒जाव॑तीः सू॒यव॑सम् रि॒शन्तीः
   प्र॒जाव॑तीः सू॒यव॑सं रि॒शन्तीः

Halfverse: b    शु॒द्धा अ॒पः सु॑प्रपा॒णे पिब॑न्तीः ।
   शु॒द्धाः अ॒पः सु॑प्रपा॒णे पिब॑न्तीः ।
   शु॒द्धा अ॒पः सु॑प्रपा॒णे पिब॑न्तीः ।

Halfverse: c    मा व॑ स्ते॒न ई॑शत॒ माघशं॑सः॒ परि॑ वो हे॒ती रु॒द्रस्य॑ वृज्याः ।।
   मा व॑ स्ते॒न ई॑शत॒ माघशं॑सः
   मा वः स्ते॒नः ई॑शत मा अ॒घशं॑सः
   मा व स्ते॒न ई॑शत माघशं॑सः

Halfverse: d    परि॑ वो हे॒ती रु॒द्रस्य॑ वृज्याः ।।
   परि वः हे॒तिः रु॒द्रस्य वृज्याः ।।
   परि वो हे॒ती रु॑द॒रस्य वृज्याः ।।


Verse: 8 
Halfverse: a    उपे॒दमु॑प॒पर्च॑नमा॒सु गोषूप॑ पृच्यताम् ।
   उपे॒दमु॑प॒पर्च॑नम्
   उप इ॒दम् उप॒पर्च॑नम्
   उपे॒दम् उप॒पर्च॑नम्

Halfverse: b    आ॒सु गोषूप॑ पृच्यताम् ।
   आ॒सु गोषु उप पृच्यताम् ।
   आ॒सु गोषूप पृच्यताम् ।

Halfverse: c    उप॑ ऋष॒भस्य॒ रेत॒स्युपे॑न्द्र॒ तव॑ वी॒र्ये॑ ।।
   उप॑ ऋष॒भस्य॒ रेत॑स्य्
   उप ऋष॒भस्य रेत॑सि
   उप र्ष॒भस्य रेत॑सि

Halfverse: d    उपे॑न्द्र॒ तव॑ वी॒र्ये॑ ।।
   उप इन्द्र तव वी॒र्ये ।।
   उपे॑न्द्र तव वी॒रिये ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.