TITUS
Rg-Veda: Rg-Veda-Samhita
Part No. 470
Previous part

Hymn: 29_(470) 
Verse: 1 
Halfverse: a    इन्द्रं॑ वो॒ नरः॑ स॒ख्याय॑ सेपुर्म॒हो यन्तः॑ सुम॒तये॑ चका॒नाः ।
   इन्द्रं॑ वो॒ नरः॑ स॒ख्याय॑ सेपुर्
   इन्द्र॑म् वः नरः स॒ख्याय सेपुः
   इन्द्रं वो नरः सखि॒याय सेपुर्

Halfverse: b    म॒हो यन्तः॑ सुम॒तये॑ चका॒नाः ।
   म॒हः यन्तः सुम॒तये चका॒नाः ।
   म॒हो यन्तः सुम॒तये चका॒नाः ।

Halfverse: c    म॒हो हि दा॒ता वज्र॑हस्तो॒ अस्ति॑ म॒हामु॑ र॒ण्वमव॑से यजध्वम् ।।
   म॒हो हि दा॒ता वज्र॑हस्तो॒ अस्ति
   म॒हः हि दा॒ता वज्र॑हस्तः अस्ति
   म॒हो हि दा॒ता वज्र॑हस्तो अस्ति

Halfverse: d    म॒हामु॑ र॒ण्वमव॑से यजध्वम् ।।
   म॒हाम् उ र॒ण्वम् अव॑से यजध्वम् ।।
   म॒हाम् उ र॒ण्वम् अव॑से यजध्वम् ।।


Verse: 2 
Halfverse: a    आ यस्मि॒न्हस्ते॒ नर्या॑ मिमि॒क्षुरा रथे॑ हिर॒ण्यये॑ रथे॒ष्ठाः ।
   आ यस्मि॒न्हस्ते॒ नर्या॑ मिमि॒क्षुर्
   आ यस्मि॑न् हस्ते नर्या ! मिमि॒क्षुः
   आ यस्मि॑न् हस्ते नरि॑या मिमि॒क्षुर्

Halfverse: b    आ रथे॑ हिर॒ण्यये॑ रथे॒ष्ठाः ।
   आ रथे हिर॒ण्यये रथे॒ष्ठाः ।
   आ रथे ? हिर॒ण्यये रथे॒ष्ठाः ।

Halfverse: c    आ र॒श्मयो॒ गभ॑स्त्यो स्थू॒रयो॒राध्व॒न्नश्वा॑सो॒ वृष॑णो युजा॒नाः ।।
   आ र॒श्मयो॒ गभ॑स्त्यो स्थू॒रयो॑र्
   आ र॒श्मयः गभ॑स्त्योः स्थू॒रयोः
   आ र॒श्मयो गभ॑स्तियो स्थू॒रयो॑र्

Halfverse: d    आध्व॒न्नश्वा॑सो॒ वृष॑णो युजा॒नाः ।।
   आ अध्व॑न् अश्वा॑सः वृष॑णः युजा॒नाः ।।
   आध्व॑न्न् अश्वा॑सो वृष॑णो युजा॒नाः ।।


Verse: 3 
Halfverse: a    श्रि॒ये ते॒ पादा॒ दुव॒ आ मि॑मिक्षुर्धृ॒ष्णुर्व॒ज्री शव॑सा॒ दक्षि॑णावान् ।
   श्रि॒ये ते॒ पादा॒ दुव॒ आ मि॑मिक्षुर्
   श्रि॒ये ते पादा दुवः आ मि॑मिक्षुः
   श्रि॒ये ते पादा दुव आ मि॑मिक्षुर्

Halfverse: b    धृ॒ष्णुर्व॒ज्री शव॑सा॒ दक्षि॑णावान् ।
   धृ॒ष्णुः व॒ज्री शव॑सा दक्षि॑णावान् ।
   धृ॒ष्णुर् व॒ज्री शव॑सा दक्षि॑णावान् ।

Halfverse: c    वसा॑नो॒ अत्कं॑ सुर॒भिं दृ॒शे कं स्व॒र्ण नृ॑तविषि॒रो ब॑भूथ ।।
   वसा॑नो॒ अत्कं॑ सुर॒भिं दृ॒शे कं
   वसा॑नः अत्क॑म् सुर॒भिम् दृ॒शे कम्
   वसा॑नो अत्कं सुर॒भिं दृ॒शे कं

Halfverse: d    स्व॒र्ण नृ॑तविषि॒रो ब॑भूथ ।।
   स्व॑र् न नृ॑तो इषि॒रः ब॑भूथ ।।
   सुव॑र् ण नृ॑तव् इषि॒रो ब॑भूथ ।।


Verse: 4 
Halfverse: a    स सोम॒ आमि॑श्लतमः सु॒तो भू॒द्यस्मि॑न्प॒क्तिः प॒च्यते॒ सन्ति॑ धा॒नाः ।
   स सोम॒ आमि॑श्लतमः सु॒तो भू॑द्
   स सोमः आमि॑श्लतमः सु॒तः भू॑त्
   स सोम आमि॑श्लतमः सु॒तो भू॑द्

Halfverse: b    यस्मि॑न्प॒क्तिः प॒च्यते॒ सन्ति॑ धा॒नाः ।
   यस्मि॑न् प॒क्तिः प॒च्यते सन्ति धा॒नाः ।
   यस्मि॑न् प॒क्तिः प॒च्यते सन्ति धा॒नाः ।

Halfverse: c    इन्द्रं॒ नर॑ स्तु॒वन्तो॑ ब्रह्मका॒रा उ॒क्था शंस॑न्तो दे॒ववा॑ततमाः ।।
   इन्द्रं॒ नर॑ स्तु॒वन्तो॑ ब्रह्मका॒रा
   इन्द्र॑म् नरः स्तु॒वन्तः ब्रह्मका॒राः
   इन्द्रं नर स्तु॒वन्तो ब्रह्मका॒रा

Halfverse: d    उ॒क्था शंस॑न्तो दे॒ववा॑ततमाः ।।
   उ॒क्था शंस॑न्तः दे॒ववा॑ततमाः ।।
   उ॒क्था शंस॑न्तो दे॒ववा॑ततमाः ।।


Verse: 5 
Halfverse: a    न ते॒ अन्तः॒ शव॑सो धाय्य॒स्य वि तु बा॑बधे॒ रोद॑सी महि॒त्वा ।
   न ते॒ अन्तः॒ शव॑सो धाय्य॒स्य
   न ते अन्तः शव॑सः धायि अ॒स्य
   न ते अन्तः शव॑सो धायि अ॒स्य

Halfverse: b    वि तु बा॑बधे॒ रोद॑सी महि॒त्वा ।
   वि तु बा॑बधे रोद॑सी महि॒त्वा ।
   वि तु बा॑बधे रोद॑सी महि॒त्वा ।

Halfverse: c    आ ता सू॒रिः पृ॑णति॒ तूतु॑जानो यू॒थेवा॒प्सु स॒मीज॑मान ऊ॒ती ।।
   आ ता सू॒रिः पृ॑णति॒ तूतु॑जानो
   आ ता सू॒रिः पृ॑णति तूतु॑जानः
   आ ता सू॒रिः पृ॑णति तूतु॑जानो

Halfverse: d    यू॒थेवा॒प्सु स॒मीज॑मान ऊ॒ती ।।
   यू॒था इ॑व अ॒प्सु स॒मीज॑मानः ऊ॒ती ।।
   यू॒थेवा॒प्सु स॒मीज॑मान ऊ॒ती ।।


Verse: 6 
Halfverse: a    ए॒वेदिन्द्रः॑ सु॒हव॑ ऋ॒ष्वो अ॑स्तू॒ती अनू॑ती हिरिशि॒प्रः सत्वा॑ ।
   ए॒वेदिन्द्रः॑ सु॒हव॑ ऋ॒ष्वो अ॑स्तु
   ए॒व इत् इन्द्रः सु॒हवः ऋ॒ष्वः अ॑स्तु
   ए॒वेद् इन्द्रः सु॒हव ऋ॒ष्वो अ॑स्तु

Halfverse: b     ऊ॒ती अनू॑ती हिरिशि॒प्रः सत्वा॑ ।
   ऊ॒ती अनू॑ती हिरिशि॒प्रः सत्वा ।
   ऊ॒ती अनू॑ती हिरिशि॒प्रः सत्वा ।

Halfverse: c    ए॒वा हि जा॒तो अस॑मात्योजाः पु॒रू च॑ वृ॒त्रा ह॑नति॒ नि दस्यू॑न् ।।
   ए॒वा हि जा॒तो अस॑मात्योजाः
   ए॒व+ हि जा॒तः अस॑मात्योजाः
   ए॒वा हि जा॒तो अस॑मातिओजाः

Halfverse: d    पु॒रू च॑ वृ॒त्रा ह॑नति॒ नि दस्यू॑न् ।।
   पु॒रु+ च वृ॒त्रा ह॑नति नि दस्यू॑न् ।।
   पु॒रू च वृ॒त्रा ह॑नति नि दस्यू॑न् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.