TITUS
Rg-Veda: Rg-Veda-Samhita
Part No. 472
Previous part

Hymn: 31_(472) 
Verse: 1 
Halfverse: a    अभू॒रेको॑ रयिपते रयी॒णामा हस्त॑योरधिथा इन्द्र कृ॒ष्टीः ।
   अभू॒रेको॑ रयिपते रयी॒णाम्
   अभूः एकः रयिपते रयी॒णाम्
   अभू॑र् एको रयिपते रयी॒णाम्

Halfverse: b    आ हस्त॑योरधिथा इन्द्र कृ॒ष्टीः ।
   आ हस्त॑योः अधिथाः इन्द्र कृ॒ष्टीः ।
   आ हस्त॑योर् अधिथा इन्द्र कृ॒ष्टीः ।

Halfverse: c    वि तो॒के अ॒प्सु तन॑ये च॒ सूरे ऽवो॑चन्त चर्ष॒णयो॒ विवा॑चः ।।
   वि तो॒के अ॒प्सु तन॑ये च॒ सूरे
   वि तो॒के अ॒प्सु तन॑ये च सूरे
   वि तो॒के अ॒प्सु तन॑ये च सूरे

Halfverse: d    ऽवोचन्त चर्ष॒णयो॒ विवा॑चः ।।
   अवो॑चन्त चर्ष॒णयः विवा॑चः ।।
   अवो॑चन्त चर्ष॒णयो विवा॑चः ।।


Verse: 2 
Halfverse: a    त्वद्भि॒येन्द्र॒ पार्थि॑वानि॒ विश्वाच्यु॑ता चिच्च्यावयन्ते॒ रजां॑सि ।
   त्वद्भि॒येन्द्र॒ पार्थि॑वानि॒ विश्वा
   त्वत् भि॒या इ॑न्द्र पार्थि॑वानि विश्वा
   तु॒वद् भि॒येन्द्र पार्थि॑वानि विश्वा

Halfverse: b     अच्यु॑ता चिच्च्यावयन्ते॒ रजां॑सि ।
   अच्यु॑ता चित् च्यावयन्ते रजां॑सि ।
   अच्यु॑ता चिच् च्यावयन्ते रजां॑सि ।

Halfverse: c    द्यावा॒क्षामा॒ पर्व॑तासो॒ वना॑नि॒ विश्वं॑ दृ॒ऴम्भ॑यते॒ अज्म॒न्ना ते॑ ।।
   द्यावा॒क्षामा॒ पर्व॑तासो॒ वना॑नि
   द्यावा॒क्षामा पर्व॑तासः वना॑नि
   द्यावा॒क्षामा पर्व॑तासो वना॑नि

Halfverse: d    विश्वं॑ दृ॒ऴम्भ॑यते॒ अज्म॒न्ना ते॑ ।।
   विश्व॑म् दृ॒ऴम् भयते अज्म॑न् आ ते ।।
   विश्वं दृ॒ऴम् भयते अज्म॑न् आ ते ।।


Verse: 3 
Halfverse: a    त्वं कुत्से॑ना॒भि शुष्ण॑मिन्द्रा॒शुषं॑ युध्य॒ कुय॑वं॒ गवि॑ष्टौ ।
   त्वं कुत्से॑ना॒भि शुष्ण॑मिन्द्र
   त्वम् कुत्से॑न अ॒भि शुष्ण॑म् इन्द्र
   तु॒वं कुत्से॑न अ॒भि शुष्ण॑म् इन्द्र

Halfverse: b     अ॒शुषं॑ युध्य॒ कुय॑वं॒ गवि॑ष्टौ ।
   अ॒शुष॑म् युध्य कुय॑वम् गवि॑ष्टौ ।
   अ॒शुषं युध्य कुय॑वं गवि॑ष्टौ ।

Halfverse: c    दश॑ प्रपि॒त्वे अध॒ सूर्य॑स्य मुषा॒यश्च॒क्रमवि॑वे॒ रपां॑सि ।।
   दश॑ प्रपि॒त्वे अध॒ सूर्य॑स्य
   दश प्रपि॒त्वे अध सूर्य॑स्य
   दश प्रपि॒त्वे अध सूरि॑यस्य

Halfverse: d    मुषा॒यश्च॒क्रमवि॑वे॒ रपां॑सि ।।
   मु॑षा॒यः च॒क्रम् अवि॑वेः अपां॑सि ! ।।
   मु॑षा॒यश् च॒क्रम् अवि॑वे रपां॑सि ।।


Verse: 4 
Halfverse: a    त्वं श॒तान्यव॒ शम्ब॑रस्य॒ पुरो॑ जघन्थाप्र॒तीनि॒ दस्योः॑ ।
   त्वं श॒तान्यव॒ शम्ब॑रस्य
   त्वम् श॒तानि अव शम्ब॑रस्य
   तु॒वं श॒तानि अव शम्ब॑रस्य

Halfverse: b    पुरो॑ जघन्थाप्र॒तीनि॒ दस्योः॑ ।
   पुरः जघन्थ अप्र॒तीनि दस्योः ।
   पुरो जघन्थ अप्र॒तीनि दस्योः ।

Halfverse: c    अशि॑क्षो॒ यत्र॒ शच्या॑ शचीवो॒ दिवो॑दासाय सुन्व॒ते सु॑तक्रे भ॒रद्वा॑जाय गृण॒ते वसू॑नि ।।
   अशि॑क्षो॒ यत्र॒ शच्या॑ शचीवो
   अशि॑क्षः यत्र शच्या शचीवः
   अशि॑क्षो यत्र शचि॑या शचीवो

Halfverse: d    दिवो॑दासाय सुन्व॒ते सु॑तक्रे
   दिवो॑दासाय सुन्व॒ते सु॑तक्रे
   दिवो॑दासाय सुन्व॒ते सु॑तक्रे

Halfverse: e    भ॒रद्वा॑जाय गृण॒ते वसू॑नि ।।
   भ॒रद्वा॑जाय गृण॒ते वसू॑नि ।।
   भ॒रद्वा॑जाय गृण॒ते वसू॑नि ।।


Verse: 5 
Halfverse: a    स स॑त्यसत्वन्मह॒ते रणा॑य॒ रथ॒मा ति॑ष्ठ तुविनृम्ण भी॒मम् ।
   स स॑त्यसत्वन्मह॒ते रणा॑य
   स स॑त्यसत्वन् मह॒ते रणा॑य
   स स॑त्यसत्वन् मह॒ते रणा॑य

Halfverse: b    रथ॒मा ति॑ष्ठ तुविनृम्ण भी॒मम् ।
   रथ॑म् आ ति॑ष्ठ तुविनृम्ण भी॒मम् ।
   रथ॑म् आ ति॑ष्ठ तुविनृम्ण भी॒मम् ।

Halfverse: c    या॒हि प्र॑पथि॒न्नव॒सोप॑ म॒द्रिक्प्र च॑ श्रुत श्रावय चर्ष॒णिभ्यः॑ ।।
   या॒हि प्र॑पथि॒न्नव॒सोप॑ म॒द्रिक्
   या॒हि प्र॑पथिन् अव॑सा उप म॒द्रिक्
   या॒हि प्र॑पथिन्न् अव॒सोप म॒द्रिक्

Halfverse: d    प्र च॑ श्रुत श्रावय चर्ष॒णिभ्यः॑ ।।
   प्र च श्रुत श्रावय चर्ष॒णिभ्यः ।।
   प्र च श्रुत श्रावय चर्ष॒णिभ्यः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.