TITUS
Rg-Veda: Rg-Veda-Samhita
Part No. 480
Previous part

Hymn: 39_(480) 
Verse: 1 
Halfverse: a    म॒न्द्रस्य॑ क॒वेर्दि॒व्यस्य॒ वह्ने॒र्विप्र॑मन्मनो वच॒नस्य॒ मध्वः॑ ।
   म॒न्द्रस्य॑ क॒वेर्दि॒व्यस्य॒ वह्ने॑र्
   म॒न्द्रस्य क॒वेः दि॒व्यस्य वह्नेः
   म॒न्द्रस्य क॒वेर् दिवि॒यस्य वह्ने॑र्

Halfverse: b    विप्र॑मन्मनो वच॒नस्य॒ मध्वः॑ ।
   विप्र॑मन्मनः वच॒नस्य मध्वः ।
   विप्र॑मन्मनो वच॒नस्य मध्वः ।

Halfverse: c    अपा॑ न॒स्तस्य॑ सच॒नस्य॑ दे॒वेषो॑ युवस्व गृण॒ते गोअ॑ग्राः ।।
   अपा॑ न॒स्तस्य॑ सच॒नस्य॑ देव
   अपाः नः तस्य सच॒नस्य देव
   अपा नस् तस्य सच॒नस्य देव

Halfverse: d     इषो॑ युवस्व गृण॒ते गोअ॑ग्राः ।।
   इषः युवस्व गृण॒ते गोअ॑ग्राः ।।
   इषो युवस्व गृण॒ते गोअ॑ग्राः ।।


Verse: 2 
Halfverse: a    अ॒यमु॑शा॒नः पर्यद्रि॑मु॒स्रा ऋ॒तधी॑तिभिरृत॒युग्यु॑जा॒नः ।
   अ॒यमु॑शा॒नः पर्यद्रि॑मु॒स्रा
   अ॒यम् उशा॒नः परि अद्रि॑म् उ॒स्राः
   अ॒यम् उशा॒नः परि अद्रि॑म् उ॒स्रा

Halfverse: b    ऋ॒तधी॑तिभिरृत॒युग्यु॑जा॒नः ।
   ऋ॒तधी॑तिभिः ऋत॒युक् युजा॒नः ।
   ऋ॒तधी॑तिभिर् ऋत॒युग् युजा॒नः ।

Halfverse: c    रु॒जदरु॑ग्णं॒ वि व॒लस्य॒ सानु॑म्प॒णीँर्वचो॑भिर॒भि यो॑ध॒दिन्द्रः॑ ।।
   रु॒जदरु॑ग्णं॒ वि व॒लस्य॒ सानु॑म्
   रु॒जत् अरु॑ग्णम् वि व॒लस्य सानु॑म्
   रु॒जद् अरु॑ग्णं वि व॒लस्य सानु॑म्

Halfverse: d    प॒णीँर्वचो॑भिर॒भि यो॑ध॒दिन्द्रः॑ ।।
   प॒णीन् वचो॑भिः अ॒भि यो॑धत् इन्द्रः ।।
   प॒णीँर् वचो॑भिर् अ॒भि यो॑धद् इन्द्रः ।।


Verse: 3 
Halfverse: a    अ॒यं द्यो॑तयद॒द्युतो॒ व्य॒क्तून्दो॒षा वस्तोः॑ श॒रद॒ इन्दु॑रिन्द्र ।
   अ॒यं द्यो॑तयद॒द्युतो॒ व्य॒क्तून्
   अ॒यम् द्योतयत् अ॒द्युतः वि अ॒क्तून्
   अ॒यं द्यो॑तयद् अ॒द्युतो वि अ॒क्तून्

Halfverse: b    दो॒षा वस्तोः॑ श॒रद॒ इन्दु॑रिन्द्र ।
   दो॒षा वस्तोः श॒रदः इन्दुः इन्द्र ।
   दो॒षा वस्तोः श॒रद इन्दु॑र् इन्द्र ।

Halfverse: c    इ॒मं के॒तुम॑दधु॒र्नू चि॒दह्नां॒ शुचि॑जन्मन उ॒षस॑श्चकार ।।
   इ॒मं के॒तुम॑दधु॒र्नू चि॒दह्नां
   इ॒मम् के॒तुम् अदधुः नु+ चि॑त् अह्ना॑म्
   इ॒मं के॒तुम् अदधुर् नू चि॑द् अह्नां

Halfverse: d    शुचि॑जन्मन उ॒षस॑श्चकार ।।
   शुचि॑जन्मनः उ॒षसः चकार ।।
   शुचि॑जन्मन उ॒षस॑श् चकार ।।


Verse: 4 
Halfverse: a    अ॒यं रो॑चयद॒रुचो॑ रुचा॒नो॒ ऽयं वा॑सय॒द्व्यृ॒तेन॑ पू॒र्वीः ।
   अ॒यं रो॑चयद॒रुचो॑ रुचा॒नो
   अ॒यम् रोचयत् अ॒रुचः रुचा॒नः
   अ॒यं रो॑चयद् अ॒रुचो रुचा॒नो

Halfverse: b    ऽयं वा॑सय॒द्व्यृ॒तेन॑ पू॒र्वीः ।
   अ॒यम् वासयत् वि ऋ॒तेन पू॒र्वीः ।
   अ॒यं वा॑सयद् वि ऋ॒तेन पू॒र्वीः ।

Halfverse: c    अ॒यमी॑यत ऋत॒युग्भि॒रश्वैः॑ स्व॒र्विदा॒ नाभि॑ना चर्षणि॒प्राः ।।
   अ॒यमी॑यत ऋत॒युग्भि॒रश्वैः
   अ॒यम् ईयते ऋत॒युग्भिः अश्वैः
   अ॒यम् ईयत ऋत॒युग्भि॑र् अश्वैः

Halfverse: d    स्व॒र्विदा॒ नाभि॑ना चर्षणि॒प्राः ।।
   स्व॒र्विदा नाभि॑ना चर्षणि॒प्राः ।।
   सु॑व॒र्विदा नाभि॑ना चर्षणि॒प्राः ।।


Verse: 5 
Halfverse: a    नू गृ॑णा॒नो गृ॑ण॒ते प्र॑त्न राज॒न्निषः॑ पिन्व वसु॒देया॑य पू॒र्वीः ।
   नू गृ॑णा॒नो गृ॑ण॒ते प्र॑त्न राजन्न्
   नु+ गृ॑णा॒नः गृ॑ण॒ते प्र॑त्न राजन्
   नू गृ॑णा॒नो गृ॑ण॒ते प्र॑त्न राजन्न्

Halfverse: b    इषः॑ पिन्व वसु॒देया॑य पू॒र्वीः ।
   इषः पिन्व वसु॒देया॑य पू॒र्वीः ।
   इषः पिन्व वसु॒देया॑य पू॒र्वीः ।

Halfverse: c    अ॒प ओष॑धीरवि॒षा वना॑नि॒ गा अर्व॑तो॒ नॄनृ॒चसे॑ रिरीहि ।।
   अ॒प ओष॑धीरवि॒षा वना॑नि
   अ॒पः ओष॑धीः अवि॒षा वना॑नि
   अ॒प ओष॑धीर् अवि॒षा वना॑नि

Halfverse: d    गा अर्व॑तो॒ नॄनृ॒चसे॑ रिरीहि ।।
   गाः अर्व॑तः नॄन् ऋ॒चसे रिरीहि ।।
   गा अर्व॑तो नॄन् ऋ॒चसे रिरीहि ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.