TITUS
Rg-Veda: Rg-Veda-Samhita
Part No. 482
Previous part

Hymn: 41_(482) 
Verse: 1 
Halfverse: a    अहे॑ळमान॒ उप॑ याहि य॒ज्ञं तुभ्य॑म्पवन्त॒ इन्द॑वः सु॒तासः॑ ।
   अहे॑ळमान॒ उप॑ याहि य॒ज्ञं
   अहे॑ळमानः उप याहि य॒ज्ञम्
   अहे॑ळमान उप याहि य॒ज्ञं

Halfverse: b    तुभ्य॑म्पवन्त॒ इन्द॑वः सु॒तासः॑ ।
   तुभ्य॑म् पवन्ते इन्द॑वः सु॒तासः ।
   तुभ्य॑म् पवन्त इन्द॑वः सु॒तासः ।

Halfverse: c    गावो॒ न व॑ज्रि॒न्स्वमोको॒ अछेन्द्रा ग॑हि प्रथ॒मो य॒ज्ञिया॑नाम् ।।
   गावो॒ न व॑ज्रि॒न्स्वमोको॒ अछे
   गावः न व॑ज्रिन् स्वम् ओकः अछ+
   गावो न व॑ज्रिन् सु॒वम् ओको अछ

Halfverse: d     इन्द्रा ग॑हि प्रथ॒मो य॒ज्ञिया॑नाम् ।।
   इन्द्र आ ग॑हि प्रथ॒मः य॒ज्ञिया॑नाम् ।।
   इन्द्रा ग॑हि प्रथ॒मो य॒ज्ञिया॑नाम् ।।


Verse: 2 
Halfverse: a    या ते॑ का॒कुत्सुकृ॑ता॒ या वरि॑ष्ठा॒ यया॒ शश्व॒त्पिब॑सि॒ मध्व॑ ऊ॒र्मिम् ।
   या ते॑ का॒कुत्सुकृ॑ता॒ या वरि॑ष्ठा
   या ते का॒कुत् सुकृ॑ता या वरि॑ष्ठा
   या ते का॒कुत् सुकृ॑ता या वरि॑ष्ठा

Halfverse: b    यया॒ शश्व॒त्पिब॑सि॒ मध्व॑ ऊ॒र्मिम् ।
   यया शश्व॑त् पिब॑सि मध्वः ऊ॒र्मिम् ।
   यया शश्व॑त् पिब॑सि मध्व ऊ॒र्मिम् ।

Halfverse: c    तया॑ पाहि॒ प्र ते॑ अध्व॒र्युर॑स्था॒त्सं ते॒ वज्रो॑ वर्ततामिन्द्र ग॒व्युः ।।
   तया॑ पाहि॒ प्र ते॑ अध्व॒र्युर॑स्थात्
   तया पाहि प्र ते अध्व॒र्युः अ॑स्थात्
   तया पाहि प्र ते अध्व॒र्युर् अस्थात्

Halfverse: d    सं ते॒ वज्रो॑ वर्ततामिन्द्र ग॒व्युः ।।
   सम् ते वज्रः वर्तताम् इन्द्र ग॒व्युः ।।
   सं ते वज्रो वर्तताम् इन्द्र ग॒व्युः ।।


Verse: 3 
Halfverse: a    ए॒ष द्र॒प्सो वृ॑ष॒भो वि॒श्वरू॑प॒ इन्द्रा॑य॒ वृष्णे॒ सम॑कारि॒ सोमः॑ ।
   ए॒ष द्र॒प्सो वृ॑ष॒भो वि॒श्वरू॑प
   ए॒ष द्र॒प्सः वृ॑ष॒भः वि॒श्वरू॑पः
   ए॒ष द्र॒प्सो वृ॑ष॒भो वि॒श्वरू॑प

Halfverse: b    इन्द्रा॑य॒ वृष्णे॒ सम॑कारि॒ सोमः॑ ।
   इन्द्रा॑य वृष्णे सम् अकारि सोमः ।
   इन्द्रा॑य वृष्णे सम् अकारि सोमः ।

Halfverse: c    ए॒तम्पि॑ब हरिव स्थातरुग्र॒ यस्येशि॑षे प्र॒दिवि॒ यस्ते॒ अन्न॑म् ।।
   ए॒तम्पि॑ब हरिव स्थातरुग्र
   ए॒तम् पिब हरिवः स्थातर् उग्र
   ए॒तम् पिब हरिव स्थातर् उग्र

Halfverse: d    यस्येशि॑षे प्र॒दिवि॒ यस्ते॒ अन्न॑म् ।।
   यस्य ईशि॑षे प्र॒दिवि यः ते अन्न॑म् ।।
   यस्येशि॑षे प्र॒दिवि यस् ते अन्न॑म् ।।


Verse: 4 
Halfverse: a    सु॒तः सोमो॒ असु॑तादिन्द्र॒ वस्या॑न॒यं श्रेया॑ञ्चिकि॒तुषे॒ रणा॑य ।
   सु॒तः सोमो॒ असु॑तादिन्द्र॒ वस्या॑न्
   सु॒तः सोमः असु॑तात् इन्द्र वस्या॑न्
   सु॒तः सोमो असु॑ताद् इन्द्र वस्या॑न्

Halfverse: b    अ॒यं श्रेया॑ञ्चिकि॒तुषे॒ रणा॑य ।
   अ॒यम् श्रेया॑न् चिकि॒तुषे रणा॑य ।
   अ॒यं श्रेया॑ञ् चिकि॒तुषे रणा॑य ।

Halfverse: c    ए॒तं ति॑तिर्व॒ उप॑ याहि य॒ज्ञं तेन॒ विश्वा॒स्तवि॑षी॒रा पृ॑णस्व ।।
   ए॒तं ति॑तिर्व॒ उप॑ याहि य॒ज्ञं
   ए॒तम् तितिर्वः उप याहि य॒ज्ञम्
   ए॒तं ति॑तिर्व उप याहि य॒ज्ञं

Halfverse: d    तेन॒ विश्वा॒स्तवि॑षी॒रा पृ॑णस्व ।।
   तेन विश्वाः तवि॑षीः आ पृ॑णस्व ।।
   तेन विश्वा॑स् तवि॑षीर् आ पृ॑णस्व ।।


Verse: 5 
Halfverse: a    ह्वया॑मसि॒ त्वेन्द्र॑ याह्य॒र्वाङरं॑ ते॒ सोम॑स्त॒न्वे॑ भवाति ।
   ह्वया॑मसि॒ त्वेन्द्र॑ याह्य॒र्वाङ्
   ह्वया॑मसि त्वा आ इ॑न्द्र याहि अ॒र्वाङ्
   ह्वया॑मसि त्वा इन्द्र याहि अ॒र्वाङ्

Halfverse: b    अरं॑ ते॒ सोम॑स्त॒न्वे॑ भवाति ।
   अर॑म् ते सोमः त॒न्वे भवाति ।
   अरं ते सोम॑स् त॒नुवे भवाति ।

Halfverse: c    शत॑क्रतो मा॒दय॑स्वा सु॒तेषु॒ प्रास्माँ अ॑व॒ पृत॑नासु॒ प्र वि॒क्षु ।।
   शत॑क्रतो मा॒दय॑स्वा सु॒तेषु
   शत॑क्रतो मा॒दय॑स्व+ सु॒तेषु
   शत॑क्रतो मा॒दय॑स्वा सु॒तेषु

Halfverse: d    प्रास्माँ अ॑व॒ पृत॑नासु॒ प्र वि॒क्षु ।।
   प्र अ॒स्मान् अव पृत॑नासु प्र वि॒क्षु ।।
   प्रास्माँ अ॑व पृत॑नासु प्र वि॒क्षु ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.