TITUS
Rg-Veda: Rg-Veda-Samhita
Part No. 488
Previous part

Hymn: 47_(488) 
Verse: 1 
Halfverse: a    स्वा॒दुष्किला॒यम्मधु॑माँ उ॒तायं ती॒व्रः किला॒यं रस॑वाँ उ॒तायम् ।
   स्वा॒दुष्किला॒यम्मधु॑माँ उ॒तायं
   स्वा॒दुः किल अ॒यम् मधु॑मान् उ॒त अ॒यम्
   स्वा॒दुष् किला॒यम् मधु॑माँ उ॒तायं

Halfverse: b    ती॒व्रः किला॒यं रस॑वाँ उ॒तायम् ।
   ती॒व्रः किल अ॒यम् रस॑वान् उ॒त अ॒यम् ।
   ती॒व्रः किला॒यं रस॑वाँ उ॒तायम् ।

Halfverse: c    उ॒तो न्व॒स्य प॑पि॒वांस॒मिन्द्रं॒ न कश्च॒न स॑हत आह॒वेषु॑ ।।
   उ॒तो न्व॒स्य प॑पि॒वांस॒मिन्द्रं
   उ॒त उ नु अ॒स्य प॑पि॒वांस॑म् इन्द्र॑म्
   उ॒तो नु अ॒स्य प॑पि॒वांस॑म् इन्द्रं

Halfverse: d    न कश्च॒न स॑हत आह॒वेषु॑ ।।
   न कः च॒न स॑हते आह॒वेषु ।।
   न कश् च॒न स॑हत आह॒वेषु ।।


Verse: 2 
Halfverse: a    अ॒यं स्वा॒दुरि॒ह मदि॑ष्ठ आस॒ यस्येन्द्रो॑ वृत्र॒हत्ये॑ म॒माद॑ ।
   अ॒यं स्वा॒दुरि॒ह मदि॑ष्ठ आस
   अ॒यम् स्वा॒दुः इ॒ह मदि॑ष्ठः आस
   अ॒यं स्वा॒दुर् इ॒ह मदि॑ष्ठ आस

Halfverse: b    यस्येन्द्रो॑ वृत्र॒हत्ये॑ म॒माद॑ ।
   यस्य इन्द्रः वृत्र॒हत्ये म॒माद ।
   यस्य इन्द्रो वृत्र॒हत्ये म॒माद ।

Halfverse: c    पु॒रूणि॒ यश्च्यौ॒त्ना शम्ब॑रस्य॒ वि न॑व॒तिं नव॑ च दे॒ह्यो॒ हन् ।।
   पु॒रूणि॒ यश्च्यौ॒त्ना शम्ब॑रस्य
   पु॒रूणि यः च्यौ॒त्ना शम्ब॑रस्य
   पु॒रूणि यश् च्यौत॒ना शम्ब॑रस्य

Halfverse: d    वि न॑व॒तिं नव॑ च दे॒ह्यो॒ हन् ।।
   वि न॑व॒तिम् नव च दे॒ह्यः हन् ।।
   वि न॑व॒तिं नव च दे॒हियो हन् ।।


Verse: 3 
Halfverse: a    अ॒यम्मे॑ पी॒त उदि॑यर्ति॒ वाच॑म॒यम्म॑नी॒षामु॑श॒तीम॑जीगः ।
   अ॒यम्मे॑ पी॒त उदि॑यर्ति॒ वाच॑म्
   अ॒यम् मे पी॒तः उत् इयर्ति वाच॑म्
   अ॒यम् मे पी॒त उद् इयर्ति वाच॑म्

Halfverse: b    अ॒यम्म॑नी॒षामु॑श॒तीम॑जीगः ।
   अ॒यम् मनी॒षाम् उश॒तीम् अजीगर् ।
   अ॒यम् मनी॒षाम् उश॒तीम् अजीगः ।

Halfverse: c    अ॒यं षळु॒र्वीर॑मिमीत॒ धीरो॒ न याभ्यो॒ भुव॑नं॒ कच्च॒नारे ।।
   अ॒यं षळु॒र्वीर॑मिमीत॒ धीरो
   अ॒यम् षट् उ॒र्वीः अ॑मिमीत धीरः
   अ॒यं षळ् उ॒र्वीर् अमिमीत धीरो

Halfverse: d    न याभ्यो॒ भुव॑नं॒ कच्च॒नारे ।।
   न याभ्यः भुव॑नम् कत् च॒न आ॒रे ।।
   न याभि॑यो भुव॑नं कच् च॒नारे ।।


Verse: 4 
Halfverse: a    अ॒यं स यो व॑रि॒माण॑म्पृथि॒व्या व॒र्ष्माणं॑ दि॒वो अकृ॑णोद॒यं सः ।
   अ॒यं स यो व॑रि॒माण॑म्पृथि॒व्या
   अ॒यम् स यः व॑रि॒माण॑म् पृथि॒व्याः
   अ॒यं स यो व॑रि॒माण॑म् पृथि॒व्या

Halfverse: b    व॒र्ष्माणं॑ दि॒वो अकृ॑णोद॒यं सः ।
   व॒र्ष्माण॑म् दि॒वः अकृ॑णोत् अ॒यम् सः ।
   व॒र्ष्माणं दि॒वो अकृ॑णोद् अ॒यं सः ।

Halfverse: c    अ॒यम्पी॒यूषं॑ ति॒सृषु॑ प्र॒वत्सु॒ सोमो॑ दाधारो॒र्व॒न्तरि॑क्षम् ।।
   अ॒यम्पी॒यूषं॑ ति॒सृषु॑ प्र॒वत्सु
   अ॒यम् पी॒यूष॑म् ति॒सृषु प्र॒वत्सु
   अ॒यम् पी॒यूषं ति॒सृषु प्र॒वत्सु

Halfverse: d    सोमो॑ दाधारो॒र्व॒न्तरि॑क्षम् ।।
   सोमः दाधार उ॒रु अ॒न्तरि॑क्षम् ।।
   सोमो दाधार उ॒रु अ॒न्तरि॑क्षम् ।।


Verse: 5 
Halfverse: a    अ॒यं वि॑दच्चित्र॒दृशी॑क॒मर्णः॑ शु॒क्रस॑द्मनामु॒षसा॒मनी॑के ।
   अ॒यं वि॑दच्चित्र॒दृशी॑क॒मर्णः
   अ॒यम् विदत् चित्र॒दृशी॑कम् अर्णः
   अ॒यं वि॑दच् चित्र॒दृशी॑कम् अर्णः

Halfverse: b    शु॒क्रस॑द्मनामु॒षसा॒मनी॑के ।
   शु॒क्रस॑द्मनाम् उ॒षसा॑म् अनी॑के ।
   शु॒क्रस॑द्मनाम् उ॒षसा॑म् अनी॑के ।

Halfverse: c    अ॒यम्म॒हान्म॑ह॒ता स्कम्भ॑ने॒नोद्द्याम॑स्तभ्नाद्वृष॒भो म॒रुत्वा॑न् ।।
   अ॒यम्म॒हान्म॑ह॒ता स्कम्भ॑नेन
   अ॒यम् म॒हान् मह॒ता स्कम्भ॑नेन
   अ॒यम् म॒हान् मह॒ता स्कम्भ॑नेन

Halfverse: d     उद्द्याम॑स्तभ्नाद्वृष॒भो म॒रुत्वा॑न् ।।
   उत् द्याम् अस्तभ्नात् वृष॒भः म॒रुत्वा॑न् ।।
   उद् द्याम् अस्तभ्नाद् वृष॒भो म॒रुत्वा॑न् ।।


Verse: 6 
Halfverse: a    धृ॒षत्पि॑ब क॒लशे॒ सोम॑मिन्द्र वृत्र॒हा शू॑र सम॒रे वसू॑नाम् ।
   धृ॒षत्पि॑ब क॒लशे॒ सोम॑मिन्द्र
   धृ॒षत् पिब क॒लशे सोम॑म् इन्द्र
   धृ॒षत् पिब क॒लशे सोम॑म् इन्द्र

Halfverse: b    वृत्र॒हा शू॑र सम॒रे वसू॑नाम् ।
   वृ॑त्र॒हा शू॑र सम॒रे वसू॑नाम् ।
   वृ॑त्र॒हा शू॑र सम॒रे वसू॑नाम् ।

Halfverse: c    माध्यं॑दिने॒ सव॒ नआ वृ॑षस्व रयि॒स्थानो॑ र॒यिम॒स्मासु॑ धेहि ।।
   माध्यं॑दिने॒ सव॑न॒ आ वृ॑षस्व
   माध्यं॑दिने सव॑ने आ वृ॑षस्व
   माध्यं॑दिने सव॑न आ वृ॑षस्व

Halfverse: d    रयि॒स्थानो॑ र॒यिम॒स्मासु॑ धेहि ।।
   र॑यि॒स्थानः र॒यिम् अ॒स्मासु धेहि ।।
   र॑यि॒स्थानो र॒यिम् अ॒स्मासु धेहि ।।


Verse: 7 
Halfverse: a    इन्द्र॒ प्र णः॑ पुरए॒तेव॑ पश्य॒ प्र नो॑ नय प्रत॒रं वस्यो॒ अछ॑ ।
   इन्द्र॒ प्र णः॑ पुरए॒तेव॑ पश्य
   इन्द्र प्र नः पुरए॒ता इ॑व पश्य
   इन्द्र प्र णः पुरए॒तेव पश्य

Halfverse: b    प्र नो॑ नय प्रत॒रं वस्यो॒ अछ॑ ।
   प्र नः नय प्रत॒रम् वस्यः अछ ।
   प्र नो नय प्रत॒रं वस्यो अछ ।

Halfverse: c    भवा॑ सुपा॒रो अ॑तिपार॒यो नो॒ भवा॒ सुनी॑तिरु॒त वा॒मनी॑तिः ।।
   भवा॑ सुपा॒रो अ॑तिपार॒यो नो
   भव+ सुपा॒रः अ॑तिपार॒यः नः
   भवा सुपा॒रो अ॑तिपार॒यो नो

Halfverse: d    भवा॒ सुनी॑तिरु॒त वा॒मनी॑तिः ।।
   भव+ सुनी॑तिः उ॒त वा॒मनी॑तिः ।।
   भवा सुनी॑तिर् उ॒त वा॒मनी॑तिः ।।


Verse: 8 
Halfverse: a    उ॒रुं नो॑ लो॒कमनु॑ नेषि वि॒द्वान्स्व॑र्व॒ज्ज्योति॒रभ॑यं स्व॒स्ति ।
   उ॒रुं नो॑ लो॒कमनु॑ नेषि वि॒द्वान्
   उ॒रुम् नः लो॒कम् अनु नेषि वि॒द्वान्
   उ॒रुं नो लो॒कम् अनु नेषि वि॒द्वान्

Halfverse: b    स्व॑र्व॒ज्ज्योति॒रभ॑यं स्व॒स्ति ।
   स्व॑र्वत् ज्योतिः अभ॑यम् स्व॒स्ति ।
   सुव॑र्वज् ज्योति॑र् अभ॑यं सुअ॒स्ति ।

Halfverse: c    ऋ॒ष्वा त॑ इन्द्र॒ स्थवि॑रस्य बा॒हू उप॑ स्थेयाम शर॒णा बृ॒हन्ता॑ ।।
   ऋ॒ष्वा त॑ इन्द्र॒ स्थवि॑रस्य बा॒हू
   ऋ॒ष्वा ते इन्द्र स्थवि॑रस्य बा॒हू
   ऋ॒ष्वा त इन्द्र स्थवि॑रस्य बा॒हू

Halfverse: d    उप॑ स्थेयाम शर॒णा बृ॒हन्ता॑ ।।
   उप स्थेयाम शर॒णा बृ॒हन्ता ।।
   उप स्थेयाम शर॒णा बृ॒हन्ता ।।


Verse: 9 
Halfverse: a    वरि॑ष्ठे न इन्द्र व॒न्धुरे॑ धा॒ वहि॑ष्ठयोः शताव॒न्नश्व॑यो॒रा ।
   वरि॑ष्ठे न इन्द्र व॒न्धुरे॑ धा
   वरि॑ष्ठे नः इन्द्र व॒न्धुरे धाः
   वरि॑ष्ठे न इन्दर व॒न्धुरे धा

Halfverse: b    वहि॑ष्ठयोः शताव॒न्नश्व॑यो॒रा ।
   वहि॑ष्ठयोः शतावन् अश्व॑योः आ ।
   वहि॑ष्ठयोः शतावन् अश्व॑योर् आ ।

Halfverse: c    इष॒मा व॑क्षी॒षां वर्षि॑ष्ठा॒म्मा न॑स्तारीन्मघव॒न्रायो॑ अ॒र्यः ।।
   इष॒मा व॑क्षी॒षां वर्षि॑ष्ठाम्
   इष॑म् आ व॑क्षि इ॒षाम् वर्षि॑ष्ठाम्
   इष॑म् आ व॑क्षि इ॒षाअं वर्षि॑ष्ठाम्

Halfverse: d    मा न॑स्तारीन्मघव॒न्रायो॑ अ॒र्यः ।।
   मा नः तारीत् मघवन् रायः अ॒र्यः ।।
   मा न॑स् तारीन् मघवन् रायो अ॒र्यः ।।


Verse: 10 
Halfverse: a    इन्द्र॑ मृ॒ळ मह्यं॑ जी॒वातु॑मिछ चो॒दय॒ धिय॒मय॑सो॒ न धारा॑म् ।
   इन्द्र॑ मृ॒ळ मह्यं॑ जी॒वातु॑मिछ
   इन्द्र मृ॒ळ मह्य॑म् जी॒वातु॑म् इछ
   इन्द्र मृ॒ळ मह्य % जी॒वातु॑म् इछ

Halfverse: b    चो॒दय॒ धिय॒मय॑सो॒ न धारा॑म् ।
   चो॒दय धिय॑म् अय॑सः न धारा॑म् ।
   चो॒दय धिय॑म् अय॑सो न धारा॑म् ।

Halfverse: c    यत्किं चा॒हं त्वा॒युरि॒दं वदा॑मि॒ तज्जु॑षस्व कृ॒धि मा॑ दे॒वव॑न्तम् ।।
   यत्किं चा॒हं त्वा॒युरि॒दं वदा॑मि
   यत् किम् च अ॒हम् त्वा॒युः इ॒दम् वदा॑मि
   यत् किं चा॒हं त्वा॒युर् इ॒दं वदा॑मि

Halfverse: d    तज्जु॑षस्व कृ॒धि मा॑ दे॒वव॑न्तम् ।।
   तत् जुषस्व कृ॒धि मा दे॒वव॑न्तम् ।।
   तज् जुषस्व कृ॒धि मा दे॒वव॑न्तम् ।।


Verse: 11 
Halfverse: a    त्रा॒तार॒मिन्द्र॑मवि॒तार॒मिन्द्रं॒ हवे॑हवे सु॒हवं॒ शूर॒मिन्द्र॑म् ।
   त्रा॒तार॒मिन्द्र॑मवि॒तार॒मिन्द्रं
   त्रा॒तार॑म् इन्द्र॑म् अवि॒तार॑म् इन्द्र॑म्
   त्रा॒तार॑म् इन्द्र॑म् अवि॒तार॑म् इन्द्रं

Halfverse: b    हवे॑हवे सु॒हवं॒ शूर॒मिन्द्र॑म् ।
   हवे॑हवे सु॒हव॑म् शूर॑म् इन्द्र॑म् ।
   हवे॑हवे सु॒हवं शूर॑म् इन्द्र॑म् ।

Halfverse: c    ह्वया॑मि श॒क्रम्पु॑रुहू॒तमिन्द्रं॑ स्व॒स्ति नो॑ म॒घवा॑ धा॒त्विन्द्रः॑ ।।
   ह्वया॑मि श॒क्रम्पु॑रुहू॒तमिन्द्रं
   ह्वया॑मि श॒क्रम् पुरुहू॒तम् इन्द्र॑म्
   ह्वया॑मि श॒क्रम् पुरुहू॒तम् इन्द्रं

Halfverse: d    स्व॒स्ति नो॑ म॒घवा॑ धा॒त्विन्द्रः॑ ।।
   स्व॒स्ति नः म॒घवा धातु इन्द्रः ।।
   सुअ॒स्ति नो म॒घवा धातु इन्द्रः ।।


Verse: 12 
Halfverse: a    इन्द्रः॑ सु॒त्रामा॒ स्ववाँ॒ अवो॑भिः सुमृळी॒को भ॑वतु वि॒श्ववे॑दाः ।
   इन्द्रः॑ सु॒त्रामा॒ स्ववाँ॒ अवो॑भिः
   इन्द्रः सु॒त्रामा स्ववा॑न् अवो॑भिः
   इन्द्रः सु॒त्रामा सुअवाँ अवो॑भिः

Halfverse: b    सुमृळी॒को भ॑वतु वि॒श्ववे॑दाः ।
   सु॑मृळी॒कः भ॑वतु वि॒श्ववे॑दाः ।
   सु॑मृळी॒को भ॑वतु वि॒श्ववे॑दाः ।

Halfverse: c    बाध॑तां॒ द्वेषो॒ अभ॑यं कृणोतु सु॒वीर्य॑स्य॒ पत॑यः स्याम ।।
   बाध॑तां॒ द्वेषो॒ अभ॑यं कृणोतु
   बाध॑ताम् द्वेषः अभ॑यम् कृणोतु
   बाध॑तां द्वेषो अभ॑यं कृणोतु

Halfverse: d    सु॒वीर्य॑स्य॒ पत॑यः स्याम ।।
   सु॒वीर्य॑स्य पत॑यः स्याम ।।
   सु॒वीरि॑यस्य पत॑यः सियाम ।।


Verse: 13 
Halfverse: a    तस्य॑ व॒यं सु॑म॒तौ य॒ज्ञिय॒स्यापि॑ भ॒द्रे सौ॑मन॒से स्या॑म ।
   तस्य॑ व॒यं सु॑म॒तौ य॒ज्ञिय॑स्य
   तस्य व॒यम् सुम॒तौ य॒ज्ञिय॑स्य
   तस्य व॒यं सु॑म॒तौ य॒ज्ञिय॑स्य

Halfverse: b     अपि॑ भ॒द्रे सौ॑मन॒से स्या॑म ।
   अपि भ॒द्रे सौ॑मन॒से स्या॑म ।
   अपि भ॒द्रे सौ॑मन॒से सि॑याम ।

Halfverse: c    स सु॒त्रामा॒ स्ववाँ॒ इन्द्रो॑ अ॒स्मे आ॒राच्चि॒द्द्वेषः॑ सनु॒तर्यु॑योतु ।।
   स सु॒त्रामा॒ स्ववाँ॒ इन्द्रो॑ अ॒स्मे
   स सु॒त्रामा स्ववा॑न् इन्द्रः अ॒स्मे
   स सु॒त्रामा सुअवाँ इन्द्रो अ॒स्मे

Halfverse: d    आ॒राच्चि॒द्द्वेषः॑ सनु॒तर्यु॑योतु ।।
   आ॒रात् चित् द्वेषः सनु॒तर् युयोतु ।।
   आ॒राच् चिद् द्वेषः सनु॒तर् युयोतु ।।


Verse: 14 
Halfverse: a    अव॒ त्वे इ॑न्द्र प्र॒वतो॒ नोर्मिर्गिरो॒ ब्रह्मा॑णि नि॒युतो॑ धवन्ते ।
   अव॒ त्वे इ॑न्द्र प्र॒वतो॒ नोर्मिर्
   अव त्वे इ॑न्द्र प्र॒वतः न ऊ॒र्मिः
   अव त्वे इ॑न्द्र प्र॒वतो न ऊ॒र्मिर्

Halfverse: b    गिरो॒ ब्रह्मा॑णि नि॒युतो॑ धवन्ते ।
   गिरः ब्रह्मा॑णि नि॒युतः धवन्ते ।
   गिरो ब्रह्मा॑णि नि॒युतो धवन्ते ।

Halfverse: c    उ॒रू न राधः॒ सव॑ना पु॒रूण्य॒पो गा व॑ज्रिन्युवसे॒ समिन्दू॑न् ।।
   उ॒रू न राधः॒ सव॑ना पु॒रूण्य्
   उ॒रु+ न राधः सव॑ना पु॒रूणि
   उ॒रू न राधः सव॑ना पु॒रूणि

Halfverse: d    अ॒पो गा व॑ज्रिन्युवसे॒ समिन्दू॑न् ।।
   अ॒पः गाः व॑ज्रिन् युवसे सम् इन्दू॑न् ।।
   अ॒पो गा व॑ज्रिन् युवसे सम् इन्दू॑न् ।।


Verse: 15 
Halfverse: a    क ईं॑ स्तव॒त्कः पृ॑णा॒त्को य॑जाते॒ यदु॒ग्रमिन्म॒घवा॑ वि॒श्वहावे॑त् ।
   क ईं॑ स्तव॒त्कः पृ॑णा॒त्को य॑जाते
   कः ई॑म् स्तवत् कः पृ॑णात् कः य॑जाते
   क ईं स्तवत् कः पृ॑णात् को य॑जाते

Halfverse: b    यदु॒ग्रमिन्म॒घवा॑ वि॒श्वहावे॑त् ।
   यत् उ॒ग्रम् इत् म॒घवा वि॒श्वहा अवे॑त् ।
   यद् उ॒ग्रम् इन् म॒घवा वि॒श्वहावे॑त् ।

Halfverse: c    पादा॑विव प्र॒हर॑न्न॒न्यम्॑न्यं कृ॒णोति॒ पूर्व॒मप॑रं॒ शची॑भिः ।।
   पादा॑विव प्र॒हर॑न्न॒न्यम्॑न्यं
   पादौ इव प्र॒हर॑न् अ॒न्यम्॑न्यम्
   पादा॑व् इव प्र॒हर॑न्न् अ॒न्यम्॑न्यं

Halfverse: d    कृ॒णोति॒ पूर्व॒मप॑रं॒ शची॑भिः ।।
   कृ॒णोति पूर्व॑म् अप॑रम् शची॑भिः ।।
   कृ॒णोति पूर्व॑म् अप॑रं शची॑भिः ।।


Verse: 16 
Halfverse: a    शृ॒ण्वे वी॒र उ॒ग्रम्॑ुग्रं दमा॒यन्न॒न्यम्॑न्यमतिनेनी॒यमा॑नः ।
   शृ॒ण्वे वी॒र उ॒ग्रम्॑ुग्रं दमा॒यन्न्
   शृ॒ण्वे वी॒रः उ॒ग्रम्॑ुग्रम् दमा॒यन्
   शृ॒ण्वे वी॒र उ॒ग्रम्॑ुग्रं दमा॒यन्न्

Halfverse: b    अ॒न्यम्॑न्यमतिनेनी॒यमा॑नः ।
   अ॒न्यम्॑न्यम् अतिनेनी॒यमा॑नः ।
   अ॒न्यम्॑न्यम् अतिनेनी॒यमा॑नः ।

Halfverse: c    ए॑धमान॒द्विळु॒भय॑स्य॒ राजा॑ चोष्कू॒यते॒ विश॒ इन्द्रो॑ मनु॒ष्या॑न् ।।
   ए॑धमान॒द्विळु॒भय॑स्य॒ राजा
   एधमान॒द्विट् उ॒भय॑स्य राजा
   एधमान॒द्विळ् उ॒भय॑स्य राजा

Halfverse: d    चोष्कू॒यते॒ विश॒ इन्द्रो॑ मनु॒ष्या॑न् ।।
   चो॑ष्कू॒यते विशः इन्द्रः मनु॒ष्या॑न् ।।
   चो॑ष्कू॒यते विश इन्द्रो मनु॒ष्या॑न् ।।


Verse: 17 
Halfverse: a    परा॒ पूर्वे॑षां स॒ख्या वृ॑णक्ति वि॒तर्तु॑राणो॒ अप॑रेभिरेति ।
   परा॒ पूर्वे॑षां स॒ख्या वृ॑णक्ति
   परा पूर्वे॑षाम् स॒ख्या वृ॑णक्ति
   परा पूर्वे॑षां सखि॒या वृ॑णक्ति

Halfverse: b    वि॒तर्तु॑राणो॒ अप॑रेभिरेति ।
   वि॒तर्तु॑राणः अप॑रेभिः एति ।
   वि॒तर्तु॑राणो अप॑रेभिर् एति ।

Halfverse: c    अना॑नुभूतीरवधून्वा॒नः पू॒र्वीरिन्द्रः॑ श॒रद॑स्तर्तरीति ।।
   अना॑नुभूतीरवधून्वा॒नः
   अना॑नुभूतीः अवधून्वा॒नः
   अना॑नुभूतीर् अवधूनुवा॒नः

Halfverse: d    पू॒र्वीरिन्द्रः॑ श॒रद॑स्तर्तरीति ।।
   पू॒र्वीः इन्द्रः श॒रदः तर्तरीति ।।
   पू॒र्वीर् इन्द्रः श॒रद॑स् तर्तरीति ।।


Verse: 18 
Halfverse: a    रू॒पंरू॑प॒म्प्रति॑रूपो बभूव॒ तद॑स्य रू॒पम्प्र॑ति॒चक्ष॑णाय ।
   रू॒पंरू॑प॒म्प्रति॑रूपो बभूव
   रू॒पंरू॑पम् प्रति॑रूपः बभूव
   रू॒पंरू॑पम् प्रति॑रूपो बभूव

Halfverse: b    तद॑स्य रू॒पम्प्र॑ति॒चक्ष॑णाय ।
   तत् अस्य रू॒पम् प्रति॒चक्ष॑णाय ।
   तद् अस्य रू॒पम् प्रति॒चक्ष॑णाय ।

Halfverse: c    इन्द्रो॑ मा॒याभिः॑ पुरु॒रूप॑ ईयते यु॒क्ता ह्य॑स्य॒ हर॑यः श॒ता दश॑ ।।
   इन्द्रो॑ मा॒याभिः॑ पुरु॒रूप॑ ईयते
   इन्द्रः मा॒याभिः पुरु॒रूपः ईयते
   इन्द्रो मा॒याभिः पुरु॒रूप ईयते

Halfverse: d    यु॒क्ता ह्य॑स्य॒ हर॑यः श॒ता दश॑ ।।
   यु॒क्ताः हि अ॑स्य हर॑यः श॒ता दश ।।
   यु॒क्ता हि अ॑स्य हर॑यः श॒ता दश ।।


Verse: 19 
Halfverse: a    यु॑जा॒नो ह॒रिता॒ रथे॒ भूरि॒ त्वष्टे॒ह रा॑जति ।
   यु॑जा॒नो ह॒रिता॒ रथे
   युजा॒नः ह॒रिता रथे
   युजा॒नो ह॒रिता रथे

Halfverse: b    भूरि॒ त्वष्टे॒ह रा॑जति ।
   भूरि त्वष्टा इ॒ह रा॑जति ।
   भूरि त्वष्टे॒ह रा॑जति ।

Halfverse: c    को वि॒श्वाहा॑ द्विष॒तः पक्ष॑ आसत उ॒तासी॑नेषु सू॒रिषु॑ ।।
   को वि॒श्वाहा॑ द्विष॒तः पक्ष॑ आसत
   कः वि॒श्वाहा द्विष॒तः पक्षः आसते
   को वि॒श्वाहा द्विष॒तः पक्ष आसत

Halfverse: d    उ॒तासी॑नेषु सू॒रिषु॑ ।।
   उ॒त आसी॑नेषु सू॒रिषु ।।
   उ॒तासी॑नेषु सू॒रिषु ।।


Verse: 20 
Halfverse: a    अ॑गव्यू॒ति क्षेत्र॒माग॑न्म देवा उ॒र्वी स॒ती भूमि॑रंहूर॒णाभू॑त् ।
   अ॑गव्यू॒ति क्षेत्र॒माग॑न्म देवा
   अगव्यू॒ति क्षेत्र॑म् आ अ॑गन्म देवाः
   अगव्यू॒ति क्षेत्र॑म् आग॑न्म देवा

Halfverse: b    उ॒र्वी स॒ती भूमि॑रंहूर॒णाभू॑त् ।
   उ॒र्वी स॒ती भूमिः अंहूर॒णा अ॑भूत् ।
   उ॒र्वी स॒ती भूमि॑र् अंहूर॒णाभू॑त् ।

Halfverse: c    बृह॑स्पते॒ प्र चि॑कित्सा॒ गवि॑ष्टावि॒त्था स॒ते ज॑रि॒त्र इ॑न्द्र॒ पन्था॑म् ।।
   बृह॑स्पते॒ प्र चि॑कित्सा॒ गवि॑ष्टाव्
   बृह॑स्पते प्र चि॑कित्स+ गवि॑ष्टौ
   बृह॑स्पते प्र चि॑कित्सा गवि॑ष्टाव्

Halfverse: d    इ॒त्था स॒ते ज॑रि॒त्र इ॑न्द्र॒ पन्था॑म् ।।
   इ॒त्था स॒ते ज॑रि॒त्रे इ॑न्द्र पन्था॑म् ।।
   इ॒त्था स॒ते ज॑रि॒त्र इ॑न्द्र पन्था॑म् ।।


Verse: 21 
Halfverse: a    दि॒वेदि॑वे स॒दृशी॑र॒न्यमर्धं॑ कृ॒ष्णा अ॑सेध॒दप॒ सद्म॑नो॒ जाः ।
   दि॒वेदि॑वे स॒दृशी॑र॒न्यमर्धं
   दि॒वेदि॑वे स॒दृशीः अ॒न्यम् अर्ध॑म्
   दि॒वेदि॑वे स॒दृशी॑र् अ॒न्यम् अर्धं

Halfverse: b    कृ॒ष्णा अ॑सेधद् ।!। अप॒ सद्म॑नो॒ जाः ।
   कृ॒ष्णाः अ॑सेधत् अप सद्म॑नः जाः ।
   कृ॒ष्णा अ॑सेधद् अप सद्म॑नो जाः ।

Halfverse: c    अह॑न्दा॒सा वृ॑ष॒भो व॑स्न॒यन्तो॒दव्र॑जे व॒र्चिनं॒ शम्ब॑रं च ।।
   अह॑न्दा॒सा वृ॑ष॒भो व॑स्न॒यन्ता
   अह॑न् दा॒सा वृ॑ष॒भः व॑स्न॒यन्ता
   अह॑न् दा॒सा वृ॑ष॒भो व॑स्न॒यन्त

Halfverse: d     ॑उ॒दव्र॑जे व॒र्चिनं॒ शम्ब॑रं च ।।
   उ॒दव्र॑जे व॒र्चिन॑म् शम्ब॑रम् च ।।
   उ॒दव्र॑जे व॒र्चिनं शम्ब॑रं च ।।


Verse: 22 
Halfverse: a    प्र॑स्तो॒क इन्नु राध॑सस्त इन्द्र॒ दश॒ कोश॑यी॒र्दश॑ वा॒जिनो॑ ऽदात् ।
   प्र॑स्तो॒क इन्नु राध॑सस्त इन्द्र
   प्रस्तो॒कः इत् नु राध॑सः ते इन्द्र
   प्रस्तो॒क इन् नु राध॑सस् त इन्द्र

Halfverse: b    दश॒ कोश॑यी॒र्दश॑ वा॒जिनो॑ ऽदात् ।
   दश कोश॑यीः दश वा॒जिनः अदात् ।
   दश कोश॑यीर् दश वा॒जिनो ऽदात् ।

Halfverse: c    दिवो॑दासादतिथि॒ग्वस्य॒ राधः॑ शाम्ब॒रं वसु॒ प्रत्य॑ग्रभीष्म ।।
   दिवो॑दासादतिथि॒ग्वस्य॒ राधः
   दिवो॑दासात् अतिथि॒ग्वस्य राधः
   दिवो॑दासाद् अतिथि॒ग्वस्य राधः

Halfverse: d    शाम्ब॒रं वसु॒ प्रत्य॑ग्रभीष्म ।।
   शा॑म्ब॒रम् वसु प्रति अग्रभीष्म ।।
   शा॑म्ब॒रं वसु प्रति अग्रभीष्म ।।


Verse: 23 
Halfverse: a    दशाश्वा॒न्दश॒ कोशा॒न्दश॒ वस्त्राधि॑भोजना ।
   दशाश्वा॒न्दश॒ कोशा॑न्
   दश अश्वा॑न् दश कोशा॑न्
   दश अश्वा॑न् दश कोशा॑न्

Halfverse: b    दश॒ वस्त्राधि॑भोजना ।
   दश वस्त्रा अधि॑भोजना ।
   दश वस्त्राधि॑भोजना ।

Halfverse: c    दशो॑ हिरण्यपि॒ण्डान्दिवो॑दासादसानिषम् ।।
   दशो॑ हिरण्यपि॒ण्डान्
   दश उ हिरण्यपि॒ण्डान्
   दशो हिरण्यपि॒ण्डान्

Halfverse: d    दिवो॑दासादसानिषम् ।।
   दिवो॑दासात् असानिषम् ।।
   दिवो॑दासाद् असानिषम् ।।


Verse: 24 
Halfverse: a    दश॒ रथा॒न्प्रष्टि॑मतः श॒तं गा अथ॑र्वभ्यः ।
   दश॒ रथा॒न्प्रष्टि॑मतः
   दश रथा॑न् प्रष्टि॑मतः
   दश रथा॑न् प्रष्टि॑मतः

Halfverse: b    श॒तं गा अथ॑र्वभ्यः ।
   श॒तम् गाः अथ॑र्वभ्यः ।
   श॒तं गाअ अथ॑र्वभ्यः ।

Halfverse: c    अ॑श्व॒थः पा॒यवे॑ ऽदात् ।।
   अ॑श्व॒थः पा॒यवे॑ ऽदात् ।।
   अ॑श्व॒थः पा॒यवे अदात् ।।
   अ॑श्व॒थः पा॒यवे अदात् ।।


Verse: 25 
Halfverse: a    महि॒ राधो॑ वि॒श्वज॑न्यं॒ दधा॑नान्भ॒रद्वा॑जान्सार्ञ्ज॒यो अ॒भ्य॑यष्ट ।।
   महि॒ राधो॑ वि॒श्वज॑न्यं॒ दधा॑नान्
   महि राधः वि॒श्वज॑न्यम् दधा॑नान्
   महि राधो वि॒श्वज॑न्यं दधा॑नान्

Halfverse: b    भ॒रद्वा॑जान्सार्ञ्ज॒यो अ॒भ्य॑यष्ट ।
   भ॒रद्वा॑जान् सार्ञ्ज॒यः अ॒भि अ॑यष्ट ।।
   भ॒रद्वा॑जान् सार्ञ्ज॒यो अ॑भ्य् अ॑यष्ट ।।


Verse: 26 
Halfverse: a    वन॑स्पते वी॒ड्व॑ङ्गो॒ हि भू॒या अ॒स्मत्स॑खा प्र॒तर॑णः सु॒वीरः॑ ।
   वन॑स्पते वी॒ड्व॑ङ्गो॒ हि भू॒या
   वन॑स्पते वी॒ड्व॑ङ्गः हि भू॒याः
   वन॑स्पते वीडुअङ्गो हि भू॒या

Halfverse: b    अ॒स्मत्स॑खा प्र॒तर॑णः सु॒वीरः॑ ।
   अ॒स्मत्स॑खा प्र॒तर॑णः सु॒वीरः ।
   अ॒स्मत्स॑खा प्र॒तर॑णः सु॒वीरः ।

Halfverse: c    गोभिः॒ संन॑द्धो असि वी॒ळय॑स्वास्था॒ता ते॑ जयतु॒ जेत्वा॑नि ।।
   गोभिः॒ संन॑द्धो असि वी॒ळय॑स्व
   गोभिः संन॑द्धः असि वी॒ळय॑स्व
   गोभिः संन॑द्धो असि वी॒ळय॑स्व

Halfverse: d     आस्था॒ता ते॑ जयतु॒ जेत्वा॑नि ।।
   आ॑स्था॒ता ते जयतु जेत्वा॑नि ।।
   आ॑स्था॒ता ते जयतु जेतु॑वानि ।।


Verse: 27 
Halfverse: a    दि॒वस्पृ॑थि॒व्याः पर्योज॒ उद्भृ॑तं॒ वन॒स्पति॑भ्यः॒ पर्याभृ॑तं॒ सहः॑ ।
   दि॒वस्पृ॑थि॒व्याः पर्योज॒ उद्भृ॑तं
   दि॒वः पृ॑थि॒व्याः परि ओजः उद्भृ॑तम्
   दि॒वस् पृथि॒व्याः परि ओज उद्भृ॑तं

Halfverse: b    वन॒स्पति॑भ्यः॒ पर्याभृ॑तं॒ सहः॑ ।
   वन॒स्पति॑भ्यः परि आभृ॑तम् सहः ।
   वन॒स्पति॑भ्यः परि आभृ॑तं सहः ।

Halfverse: c    अ॒पामो॒ज्मान॒म्परि॒ गोभि॒रावृ॑त॒मिन्द्र॑स्य॒ वज्रं॑ ह॒विषा॒ रथं॑ यज ।।
   अ॒पामो॒ज्मान॒म्परि॒ गोभि॒रावृ॑तम्
   अ॒पाम् ओ॒ज्मान॑म् परि गोभिः आवृ॑तम्
   अ॒पाम् ओ॒ज्मान॑म् परि गोभि॑र् आवृ॑तम्

Halfverse: d    इन्द्र॑स्य॒ वज्रं॑ ह॒विषा॒ रथं॑ यज ।।
   इन्द्र॑स्य वज्र॑म् ह॒विषा रथ॑म् यज ।।
   इन्द्र॑स्य वज्रं ह॒विषा रथं यज ।।


Verse: 28 
Halfverse: a    इन्द्र॑स्य॒ वज्रो॑ म॒रुता॒मनी॑कम्मि॒त्रस्य॒ गर्भो॒ वरु॑णस्य॒ नाभिः॑ ।
   इन्द्र॑स्य॒ वज्रो॑ म॒रुता॒मनी॑कम्
   इन्द्र॑स्य वज्रः म॒रुता॑म् अनी॑कम्
   इन्द्र॑स्य वज्रो म॒रुता॑म् अनी॑कम्

Halfverse: b    मि॒त्रस्य॒ गर्भो॒ वरु॑णस्य॒ नाभिः॑ ।
   मि॒त्रस्य गर्भः वरु॑णस्य नाभिः ।
   मि॒त्रस्य गर्भो वरु॑णस्य नाभिः ।

Halfverse: c    सेमां नो॑ ह॒व्यदा॑तिं जुषा॒णो देव॑ रथ॒ प्रति॑ ह॒व्या गृ॑भाय ।।
   सेमां नो॑ ह॒व्यदा॑तिं जुषा॒णो
   स इ॒माम् नः ह॒व्यदा॑तिम् जुषा॒णः
   स इ॒मां नो ह॒व्यदा॑तिं जुषा॒णो

Halfverse: d    देव॑ रथ॒ प्रति॑ ह॒व्या गृ॑भाय ।।
   देव रथ प्रति ह॒व्या गृ॑भाय ।।
   देव रथ प्रति ह॒व्या गृ॑भाय ।।


Verse: 29 
Halfverse: a    उप॑ श्वासय पृथि॒वीमु॒त द्याम्पु॑रु॒त्रा ते॑ मनुतां॒ विष्ठि॑तं॒ जग॑त् ।
   उप॑ श्वासय पृथि॒वीमु॒त द्याम्
   उप श्वासय पृथि॒वीम् उ॒त द्याम्
   उप श्वासय पृथि॒वीम् उ॒त द्याम्

Halfverse: b    पुरु॒त्रा ते॑ मनुतां॒ विष्ठि॑तं॒ जग॑त् ।
   पु॑रु॒त्रा ते मनुताम् विष्ठि॑तम् जग॑त् ।
   पु॑रु॒त्रा ते मनुतां विष्ठि॑तं जग॑त् ।

Halfverse: c    स दु॑न्दुभे स॒जूरिन्द्रे॑ण दे॒वैर्दू॒राद्दवी॑यो॒ अप॑ सेध॒ शत्रू॑न् ।।
   स दु॑न्दुभे स॒जूरिन्द्रे॑ण दे॒वैर्
   स दु॑न्दुभे स॒जूः इन्द्रे॑ण दे॒वैः
   स दु॑न्दुभे स॒जूर् इन्द्रे॑ण दे॒वैर्

Halfverse: d    दू॒राद्दवी॑यो॒ अप॑ सेध॒ शत्रू॑न् ।।
   दू॒रात् दवी॑यः अप सेध शत्रू॑न् ।।
   दू॒राद् दवी॑यो अप सेध शत्रू॑न् ।।


Verse: 30 
Halfverse: a    आ क्र॑न्दय॒ बल॒मोजो॑ न॒ आ धा॒ नि ष्ट॑निहि दुरि॒ता बाध॑मानः ।
   आ क्र॑न्दय॒ बल॒मोजो॑ न॒ आ धा
   आ क्र॑न्दय बल॑म् ओजः नः आ धाः
   आ क्र॑न्दय बल॑म् ओजो न आ धा

Halfverse: b    नि ष्ट॑निहि दुरि॒ता बाध॑मानः ।
   निः स्त॑निहि दुरि॒ता बाध॑मानः ।
   नि ष्ट॑निहि दुरि॒ता बाध॑मानः ।

Halfverse: c    अप॑ प्रोथ दुन्दुभे दु॒छुना॑ इ॒त इन्द्र॑स्य मु॒ष्टिर॑सि वी॒ळय॑स्व ।।
   अप॑ प्रोथ दुन्दुभे दु॒छुना॑ इ॒त
   अप प्रोथ दुन्दुभे दु॒छुनाः इ॒तः
   अप प्रोथ दुन्दुभे दु॒छुना इ॒त

Halfverse: d    इन्द्र॑स्य मु॒ष्टिर॑सि वी॒ळय॑स्व ।।
   इन्द्र॑स्य मु॒ष्टिः अ॑सि वी॒ळय॑स्व ।।
   इन्द्र॑स्य मु॒ष्टिर् असि वी॒ळय॑स्व ।।


Verse: 31 
Halfverse: a    आमूर॑ज प्र॒त्याव॑र्तये॒माः के॑तु॒मद्दु॑न्दु॒भिर्वा॑वदीति ।
   आमूर॑ज प्र॒त्याव॑र्तये॒माः
   आ अ॒मूः अ॑ज प्र॒त्याव॑र्तय इ॒माः
   आमूर् अज प्र॒तिआव॑र्तये॒माः

Halfverse: b    के॑तु॒मद्दु॑न्दु॒भिर्वा॑वदीति ।
   के॑तु॒मत् दुन्दु॒भिः वा॑वदीति ।
   के॑तु॒मद् ? दुन्दु॒भिर् वावदीति ।

Halfverse: c    समश्व॑पर्णा॒श्चर॑न्ति नो॒ नरो॒ ऽस्माक॑मिन्द्र र॒थिनो॑ जयन्तु ।।
   समश्व॑पर्णा॒श्चर॑न्ति नो॒ नरो
   सम् अश्व॑पर्णाः चर॑न्ति नः नरः
   सम् अश्व॑पर्णाश् चर॑न्ति नो नरो

Halfverse: d    ऽस्माक॑मिन्द्र र॒थिनो॑ जयन्तु ।।
   अ॒स्माक॑म् इन्द्र र॒थिनः जयन्तु ।।
   अ॒स्माक॑म् इन्द्र र॒थिनो जयन्तु ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.