TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 496

Hymn: 55_(496)
Verse: 1
Halfverse: a    एहि॒ वां वि॑मुचो नपा॒दाघृ॑णे॒ सं स॑चावहै ।
   एहि॒ वां वि॑मुचो नपाद्
   आ इ॑हि वाम् विमुचः नपात्
   एहि वां वि॑मुचो नपाद्

Halfverse: b    आघृ॑णे॒ सं स॑चावहै ।
   आघृ॑णे सम् सचावहै ।
   आघृ॑णे सं स॑चावहै ।

Halfverse: c    र॒थीरृ॒तस्य॑ नो भव ।।
   र॒थीरृ॒तस्य॑ नो भव ।।
   र॒थीः ऋ॒तस्य नः भव ।।
   र॒थीर् ऋ॒तस्य नो भव ।।

Verse: 2
Halfverse: a    र॒थीत॑मं कप॒र्दिन॒मीशा॑नं॒ राध॑सो म॒हः ।
   र॒थीत॑मं कप॒र्दिन॑म्
   र॒थीत॑मम् कप॒र्दिन॑म्
   र॒थीत॑मं कप॒र्दिन॑म्

Halfverse: b    ईशा॑नं॒ राध॑सो म॒हः ।
   ईशा॑नम् राध॑सः म॒हः ।
   ईशा॑नं राध॑सो म॒हः ।

Halfverse: c    रा॒यः सखा॑यमीमहे ।।
   रा॒यः सखा॑यमीमहे ।।
   रा॒यः सखा॑यम् ईमहे ।।
   रा॒यः सखा॑यम् ईमहे ।।

Verse: 3
Halfverse: a    रा॒यो धारा॑स्याघृणे॒ वसो॑ रा॒शिर॑जाश्व ।
   रा॒यो धारा॑स्याघृणे
   रा॒यः धारा असि आघृणे
   रा॒यो धारा॑सि आघृणे

Halfverse: b    वसो॑ रा॒शिर॑जाश्व ।
   वसोः रा॒शिः अ॑जाश्व ।
   वसो रा॒शिर् अजाशुव ।

Halfverse: c    धीव॑तोधीवतः॒ सखा॑ ।।
   धीव॑तोधीवतः॒ सखा॑ ।।
   धीव॑तोधीवतः सखा ।।
   धीव॑तोधीवतः सखा ।।

Verse: 4
Halfverse: a    पू॒षणं॒ न्व॒जाश्व॒मुप॑ स्तोषाम वा॒जिन॑म् ।
   पू॒षणं॒ न्व॒जाश्व॑म्
   पू॒षण॑म् नु अ॒जाश्व॑म्
   पू॒षणं नु अ॒जाशु॑वम्

Halfverse: b    उप॑ स्तोषाम वा॒जिन॑म् ।
   उप स्तोषाम वा॒जिन॑म् ।
   उप स्तोषाम वा॒जिन॑म् ।

Halfverse: c    स्वसु॒र्यो जा॒र उ॒च्यते॑ ।।
   स्वसु॒र्यो जा॒र उ॒च्यते॑ ।।
   स्वसुः यः जा॒रः उ॒च्यते ।।
   स्वसु॑र् यो जा॒र उ॒च्यते ।।

Verse: 5
Halfverse: a    मा॒तुर्दि॑धि॒षुम॑ब्रवं॒ स्वसु॑र्जा॒रः शृ॑णोतु नः ।
   मा॒तुर्दि॑धि॒षुम॑ब्रवं
   मा॒तुः दि॑धि॒षुम् अब्रवम्
   मा॒तुर् दिधि॒षुम् अब्रवं

Halfverse: b    स्वसु॑र्जा॒रः शृ॑णोतु नः ।
   स्वसुः जा॒रः शृ॑णोतु नः ।
   स्वसु॑र् जा॒रः शृ॑णोतु नः ।

Halfverse: c    भ्रातेन्द्र॑स्य॒ सखा॒ मम॑ ।।
   भ्रातेन्द्र॑स्य॒ सखा॒ मम॑ ।।
   भ्राता इन्द्र॑स्य सखा मम ।।
   भ्रातेन्द्र॑स्य सखा मम ।।

Verse: 6
Halfverse: a    आजासः॑ पू॒षणं॒ रथे॑ निशृ॒म्भास्ते ज॑न॒श्रिय॑म् ।
   आजासः॑ पू॒षणं॒ रथे
   आ अ॒जासः पू॒षण॑म् रथे
   आजासः पू॒षणं रथे

Halfverse: b    निशृ॒म्भास्ते ज॑न॒श्रिय॑म् ।
   नि॑शृ॒म्भाः ते ज॑न॒श्रिय॑म् ।
   नि॑शृ॒म्भास् ते ज॑न॒श्रिय॑म् ।

Halfverse: c    दे॒वं व॑हन्तु॒ बिभ्र॑तः ।।
   दे॒वं व॑हन्तु॒ बिभ्र॑तः ।।
   दे॒वम् वहन्तु बिभ्र॑तः ।।
   दे॒वं व॑हन्तु बिभ्र॑तः ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.