TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 745

Hymn: 22_(734)
Verse: 1
Halfverse: a    ए॒ते सोमा॑स आ॒शवो॒ रथा॑ इव॒ प्र वा॒जिनः॑ ।
   ए॒ते सोमा॑स आ॒शवो
   ए॒ते सोमा॑सः आ॒शवः
   ए॒ते सोमा॑स आ॒शवो

Halfverse: b    रथा॑ इव॒ प्र वा॒जिनः॑ ।
   रथाः इव प्र वा॒जिनः ।
   रथा इव प्र वा॒जिनः ।

Halfverse: c    सर्गाः॑ सृ॒ष्टा अ॑हेषत ।।
   सर्गाः॑ सृ॒ष्टा अ॑हेषत ।।
   सर्गाः सृ॒ष्टाः अ॑हेषत ।।
   सर्गाः सृ॒ष्टा अ॑हेषत ।।

Verse: 2
Halfverse: a    ए॒ते वाता॑ इवो॒रवः॑ प॒र्जन्य॑स्येव वृ॒ष्टयः॑ ।
   ए॒ते वाता॑ इवो॒रवः
   ए॒ते वाताः इव उ॒रवः
   ए॒ते वाता इवो॒रवः

Halfverse: b    प॒र्जन्य॑स्येव वृ॒ष्टयः॑ ।
   प॒र्जन्य॑स्य इव वृ॒ष्टयः ।
   प॒र्जन्य॑स्येव वृ॒ष्टयः ।

Halfverse: c    अ॒ग्नेरि॑व भ्र॒मा वृथा॑ ।।
   अ॒ग्नेरि॑व भ्र॒मा वृथा॑ ।।
   अ॒ग्नेः इ॑व भ्र॒माः वृथा ।।
   अ॒ग्नेर् इव भ्र॒मा वृथा ।।

Verse: 3
Halfverse: a    ए॒ते पू॒ता वि॑प॒श्चितः॒ सोमा॑सो॒ दध्या॑शिरः ।
   ए॒ते पू॒ता वि॑प॒श्चितः
   ए॒ते पू॒ताः वि॑प॒श्चितः
   ए॒ते पू॒ता वि॑प॒श्चितः

Halfverse: b    सोमा॑सो॒ दध्या॑शिरः ।
   सोमा॑सः दध्या॑शिरः ।
   सोमा॑सो दधिआ॑शिरः ।

Halfverse: c    वि॒पा व्या॑नशु॒र्धियः॑ ।।
   वि॒पा व्या॑नशु॒र्धियः॑ ।।
   वि॒पा वि आ॑नशुः धियः ।।
   वि॒पा वि आ॑नशुर् धियः ।।

Verse: 4
Halfverse: a    ए॒ते मृ॒ष्टा अम॑र्त्याः ससृ॒वांसो॒ न श॑श्रमुः ।
   ए॒ते मृ॒ष्टा अम॑र्त्याः
   ए॒ते मृ॒ष्टाः अम॑र्त्याः
   ए॒ते मृ॒ष्टा अम॑र्तियाः

Halfverse: b    ससृ॒वांसो॒ न श॑श्रमुः ।
   स॑सृ॒वांसः न श॑श्रमुः ।
   स॑सृ॒वांसो न श॑श्रमुः ।

Halfverse: c    इय॑क्षन्तः प॒थो रजः॑ ।।
   इय॑क्षन्तः प॒थो रजः॑ ।।
   इय॑क्षन्तः प॒थः रजः ।।
   इय॑क्षन्तः प॒थो रजः ।।

Verse: 5
Halfverse: a    ए॒ते पृ॒ष्ठानि॒ रोद॑सोर्विप्र॒यन्तो॒ व्या॑नशुः ।
   ए॒ते पृ॒ष्ठानि॒ रोद॑सोर्
   ए॒ते पृ॒ष्ठानि रोद॑सोः
   ए॒ते पृ॒ष्ठानि रोद॑सोर्

Halfverse: b    विप्र॒यन्तो॒ व्या॑नशुः ।
   वि॑प्र॒यन्तः वि आ॑नशुः ।
   वि॑प्र॒यन्तो वि आ॑नशुः ।

Halfverse: c    उ॒तेदमु॑त्त॒मं रजः॑ ।।
   उ॒तेदमु॑त्त॒मं रजः॑ ।।
   उ॒त इ॒दम् उत्त॒मम् रजः ।।
   उ॒तेदम् उत्त॒मं रजः ।।

Verse: 6
Halfverse: a    तन्तुं॑ तन्वा॒नमु॑त्त॒ममनु॑ प्र॒वत॑ आशत ।
   तन्तुं॑ तन्वा॒नमु॑त्त॒मम्
   तन्तु॑म् तन्वा॒नम् उत्त॒मम्
   तन्तुं तन्वा॒नम् उत्त॒मम्

Halfverse: b    अनु॑ प्र॒वत॑ आशत ।
   अनु प्र॒वतः आशत ।
   अनु प्र॒वत आशत ।

Halfverse: c    उ॒तेदमु॑त्त॒माय्य॑म् ।।
   उ॒तेदमु॑त्त॒माय्य॑म् ।।
   उ॒त इ॒दम् उत्त॒माय्य॑म् ।।
   उ॒तेदम् उत्त॒मायि॑यम् ।।

Verse: 7
Halfverse: a    त्वं सो॑म प॒णिभ्य॒ आ वसु॒ गव्या॑नि धारयः ।
   त्वं सो॑म प॒णिभ्य॒ आ
   त्वम् सोम प॒णिभ्यः आ
   तु॒वं सो॑म प॒णिभ्य आ

Halfverse: b    वसु॒ गव्या॑नि धारयः ।
   वसु गव्या॑नि धारयः ।
   वसु गव्या॑नि धारयः ।

Halfverse: c    त॒तं तन्तु॑मचिक्रदः ।।
   त॒तं तन्तु॑मचिक्रदः ।।
   त॒तम् तन्तु॑म् अचिक्रदः ।।
   त॒तं तन्तु॑म् अचिक्रदः ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.