Page of ms. P: 285r ვხედევდ, ვითარ მოვიდოდეს ექუს კაც გზასა მას მაღალსა მათ ბჭეთასა, რომელი ხედავს ჩრდილოჲთ კერძო, და თითოეულსა ცული ჴელთა თჳსთა. და კაც ერთ დგა შორის მათსა და შთაეცუა პალეკარტი ზეეზისაჲ ბრჭლადმდე და სარტყელი ლესული ერტყა წელთა მისთა. მოვიდა და შევიდა და დადგა წინაშე საკურ\თხეველსა Page of ms. P: 159v მას სპილენძისასა.
დიდებაჲ იგი უფლისა ღმრთისა ისრაჱლისაჲ, რომელი-იგი დამკჳდრებულ იყო ზედა ქერობინთა მათ, აღმაღლდის და აღჴდის ერდოსა მას ტაძრისასა. ჴმაჲ იყო ზედა კაცსა მას, რომელსა ეცუა ზეეზი იგი და ერტყა ლუსტჳრი წელითა მისთა,
და ჰრქუა მას უფალმან: განვლე შენ შორის იერუსალჱმსა ქალაქსა და დასდევ ნიში შუბლთა მაგათ კაცთასა, რომელნი-ეგე კუნესიან და სულთ-ითქუმენ ყოველსა ზედა ურჩულოებასა მათსა, რომელი იქმნების შორისა მათსა.
და ესევითართა კაცთა ჰრქუაა: შეუდეგით თქუენ კუალსა მაგისსა, შევედით ქალაქსა მას, სცემდით და მოჰკლევდით, მოსწყუედდით, ნუ ერიდებით თუალითა თქუენითა, ნუ გეწყალიედ!
მოხუცებულნი ყრმათა თანა მოწყჳდენით, ჭაბუკნი და ქალწულნი, ქმარნი და ცოლნი, ჩჩჳლნი და ნინევნი მოწყჳდენით, ნუ ჰრიდებთ, ნუ გეწყალინ, რაჲთა მოისრნენ და არა განერნენ, გარნა მათ ხოლო, რომელთა ნიშანი ზედა ედვას, ნუ შეეხებით ...
