TITUS Texts: Corpus of Published Udi Texts

TITUS
Corpus of Published Udi Texts
Part No. 20

Source: Bezhanov_1888_SMOMPK_6
Bezhanov 1888

Rustam (udinskaja skazka),
soobščil zavedujuščij Vartashenskim dvuxklassnym učiliščem
Mixail Bežanov,
Sbornik Materialov dlja opisanija mestnostej i plemen Kavkaza,
vyp. 6, Priloženie,
pp. 7-28

Part: Rustam
Rustam

Page: 7
Sentence: 1     baneke sa čoban,
   Ба̀нек̓е са чоба̀н;

Sentence: 2     me čobani baṭakei sa čubux, sa ġar ič c̣i Rusṭam.
   ме чобані̀ батак̓ѐј са чубу̀х, са г̓ар іч ц̓і Руста̀м.

Sentence: 3     ari sa vaxta me čoban biesane;
   Арі̀ са вахта̀, ме чоба̀н біеса̀не;

Sentence: 4     ama ič čubux ṭema šavaṭṭe baksa te pasč̣aġen aḳesxolan benessa.
   ама̀ іч чубу̀х тѐма шава̀тте бак̓са т̓ѐ пасч̓аг̓ѐн акѐсхолан бѐнеса.

Sentence: 5     hälbätki pasč̣aġen ṭe čobani čubġox tanešsa ič ḳua, Rusṭamaxal tanešsa.
   һȧлјба̇т̓к̓і, пасч̓аг̓ен те чобані̀ чубг̓о̀х т̓а̀нешса іч куа̀, Рустамаха̀л т̓а̀нешса.

Sentence: 6     Rusṭam kalane baksa pasč̣aġun ćomol.
   Руста̀м к̓аланебак̓са̀ пасч̓аг̓у̀н чо̇мо̀л.

Sentence: 7     ama ḳic̣ḳeluġaxo mono gölö zorrune baksa.
   Ама̀ кіц̓келуг̓а̀хо моно̀ гӧлӧ зорру̀не бак̓са̀.

Sentence: 8     ič yoldašmuġoxol te čilingne ačiexa, čilingax te č̣agi tadaiq̇un, ṭesahat ailün kex xa͑xa͑pi čilingne serbesa;
   Іч јолдашмуг̓о̀хол т̓ѐ чілі̀нгне ачіеха̀, чілінга̀х т̓ѐ ч̓а̇гі̀ т̓адајqу̀н, тѐсаһат̓ аілӱн к̓ех ха̇ха̇п̓і̀ чілі̀нгне сербеса̀;

Sentence: 9     niḳo ačiḳaxun, niḳonax č̣agi tadaiq̇un, ailuġo bex čuki. niḳonun ganu bonesa.
   ніко̀ ачікаху̀н, нікона̀х ч̓а̇гі т̓ада̀јqун, а̀јлуг̓о бех чук̓і̀, нікону̀н гану̀ бо̀неса.

Sentence: 10     pasč̣aġun ṭo͑ġo͑l gölö ärzäčiuxne esai;
   Пасч̓аг̓у̀н то̇г̓о̇лј гӧлӧ а̇рза̇чіу̀хне еса̀ј;

Sentence: 11     pasč̣aġ lap bezarrebake;
   пасч̓а̀г̓ лап̓ беза̀рребак̓е;

Sentence: 12     teṭuaba, etärq̇an meṭux batevḳi.
   т̓ѐтуаба, ет̓а̇рqан метух бат̓евкі̀.

Sentence: 13     sa karvano enesa pasč̣aġun ṭo͑ġo͑l, exne te fulan č̣älägi xib dövne karxesa:
   Са к̓арвано̀ ѐнеса пасч̓аг̓у̀н то̇г̓о̇лј, ѐхне т̓е фулан ч̓а̇ла̇гі̀ хіб дӧвне к̓а̀рхеса:

Sentence: 14     "Rusṭamax yaq̇aba ušna baxṭin:
   "Рустама̀х ја̀qаба ушна̀ бахті̀н:

Sentence: 15     barta dövürġon kaiq̇aq̇un."
   ба̀рт̓а дӧвӱрг̓о̀н к̓а̇јqаqун".

Sentence: 16     pasč̣aġen ḳallexa Rusṭamax, exne te fulan čälägi un gäräg ušenḳ taġan.
   Пасч̓аг̓ѐн ка̀ллеха Рустама̀х, ѐхне т̓е фула̀н ч̓а̇ла̇гі̀ ун гја̇рја̇г ушѐнк т̓аг̓а̀н.

Sentence: 17     Rusṭamen exne:
   Рустамен ѐхне:

Sentence: 18     "šel! hazirbanan vu͑ġ q̇atir, sa tavar, sa ḳiro, haro ṗac̣c̣e put."
   "шелј! һазі̀рбанан ву̇г̓ qат̓і̀р, са т̓ава̀р, са кіро̀, һа̀ро па̇ц̓ц̓е п̓ут̓."

Sentence: 19     eḳate exne, [8] hazirq̇unbesa.
   Ека̀т̓е ѐхне, [8] һазірqунбеса.

Page: 8
Sentence: 20     Rusṭamen aq̇i vu͑ġ q̇atirax tavarax, ḳironax, tanesa ṭe čälägi;
   Рустамѐн, аqі̀ ву̇г̓ qат̓іра̀х, т̓авара̀х, кірона̀х, т̓а̀неса те ч̓а̇ла̇гі̀;

Sentence: 21     čälägi baesxolan dövürux laraṗq̇unesa.
   ч̓а̇ла̇гі̀ баѐсхолан, дӧвӱру̀х лара̀пqунеса.

Sentence: 22     Rusṭamen činesča ṗac̣c̣e putṭa tavarax q̇an ḳironax ḳac̣nexa dövürġox,
   Рустамен чінесча̀ па̇ц̓ц̓е п̓ут̓та̀ т̓авара̀х qан кірона̀х, ка̀ц̓неха дӧвӱрг̓о̀х,

Sentence: 23     xellebsa har dövnux sa q̇atirun laxo,
   хѐллебса һар дӧвнух са qат̓іру̀н ла̀хо,

Sentence: 24     biṗ q̇atiraxal xellebsa ušen, enesča pasč̣aġun ćomol cinexa.
   біп qат̓іра̀хал хѐллебса ушѐн, ѐнесча, п̓асч̓аг̓ун чомо̇л ці̀неха.

Sentence: 25     pasč̣aġ č̣enesa, be͑neġsa, aq̇nesa.
   Пасч̓аг̓ ч̓ѐнеса, бѐнег̓са, а̀qнеса.

Sentence: 26     saema vaxṭ č̣enebaksa, sa q̇oǯa ḳafṭarre pasč̣aġun ṭo͑ġo͑l esa,
   Са̀ема вахт ч̓ѐнебак̓са, са qо̀џа кафта̀рре п̓асч̓аг̓у̀н то̇г̓о̇лј еса,

Sentence: 27     exne te fulan ganu mac̣i dövne karxesa:
   ехнет̓е фула̀нгану мац̓і̀ дӧвне к̓археса̀:

Sentence: 28     yaq̇aba Rusṭamax ṭe dövnuxol mušalapsan.
   јаqа̀ба Рустама̀х те дӧвну̀хол мушалап̓са̀н.

Sentence: 29     pasč̣aġen yaq̇anebsa me ġarax ṭe mac̣i dövna ṭo͑ġo͑l mušalapsan;
   Пасч̓аг̓ѐн јаqа̀небса ме г̓ара̀х те мац̓і̀ дӧвна̀ то̇г̓о̇лј мушалап̓са̀н;

Sentence: 30     mono tanesa.
   мо̀но т̓а̀неса.

Sentence: 31     döven exne te gäräg ṗa͑q̇o ġi c̣um efayan,
   дӧвѐн ѐхнет̓е гја̇рја̇г па̇qо г̓і ц̓умѐфајан,

Sentence: 32     Rusṭam irazinebaksa.
   Руста̀м іразі̀небак̓са.

Sentence: 33     ṗa͑q̇o ġinaxo ośa Rusṭam gölö halixo binesta, fükürrebsa te enex döven šeṭux gurdalle,
   Па̇qо г̓іна̀хо о̇ша, Рустам гӧлӧ һалі̀хо бі̀нест̓а, фӱк̓ӱребса т̓ѐ енѐх дӧвѐн шѐтух гурда̀лле,

Sentence: 34     meṭa baxṭin tanesa ič nanaxol dürüsṭluġon pesan.
   мета̀ бахті̀н т̓а̀неса іч нана̀хол дӱрӱстлуг̓о̀н п̓еса̀н.

Sentence: 35     ḳua nanai boxeci dadalṭa baksa, exne ič ġara:
   Куа̀ нана̀ј бохеці̀ дада̀лта бак̓са̀, ѐхне іч г̓ара̀:

Sentence: 36     uka! ġar tene irazibaksa.
   у̀к̓а! г̓ар т̓ене іразі̀бак̓са.

Sentence: 37     zorin ukesnesṭa, ama sa ḳuṭorte aq̇i ič źomone laxsa, ṭesahat haisaq̇nexa:
   Зорі̀н ук̓ѐснеста, ама̀ са куто̀рт̓е аqі̀ іч жомо̀не лахса, тѐсаһат̓ һајса̀qнеха:

Sentence: 38     q̇oq̇exo boš tene taisa!
   qоqѐхо бош т̓ѐнет̓ајса!

Sentence: 39     nanax dürüsṭluġon pi, tanesa dövnuxol mušalapsan.
   Нана̀х дӱрӱстлуг̓онп̓і̀, т̓а̀неса дӧвнухол мушалап̓са̀н.

Sentence: 40     sunsunax šeṭär biq̇unq̇esa, šeṭär ṗeṭq̇unbesa, te ṗa͑lenal gögilq̇un laisa.
   Сунсуна̀х шѐт̓а̇р бі̀qунqеса, шет̓а̇р пѐтqунбеса, т̓е па̇ленал гӧгі̀лqун лајса̀.

Page: 9
Sentence: 41     Rusṭamen [9] mia biq̇i šortea q̇apṭesa dövnux, döv xib adul o͑ča͑lane baisa;
   Рустамѐн [9] міа̀ біqі̀ шорт̓ѐа qа̀п̓теса дӧвнух, дӧв хіб аду̀л о̇ча̇ла̀не бајса̀;

Sentence: 42     melan č̣eri, ṗuran taci bineq̇esa.
   мѐлан ч̓ері̀, пу̀ран т̓аці̀ бі̀неqеса.

Sentence: 43     Rusṭamen sal biq̇i šortea q̇apṭesa, döv xašxaš ḳena pasnebaksa.
   Рустамѐн сал біqі̀ шорт̓ѐа qа̀п̓теса, дӧв, хашха̀ш кена̀, п̓а̀снебак̓са.

Sentence: 44     Rusṭam dövnux besbi enesa ḳua.
   Руста̀м, дӧвну̀х бесбі̀, енеса̀ куа̀.

Sentence: 45     sa para vaxṭ mannesṭa, be͑neġsa te ičux me ḳua teq̇o buq̇sa.
   Са п̓ара̀ вахт ма̀ннеста, бѐнег̓са, т̓е ічу̀х ме куа̀ т̓еqо̀буqса.

Sentence: 46     bütünṭuxo dürüsṭluġon pi bul aq̇i tanesa.
   Бӱт̓ӱн тухо дӱрӱстлуг̓онп̓і бул аqі̀ т̓а̀неса.

Sentence: 47     yaq̇al meṭu sa adamarre lamandesa, maṭinte ič kex u͑q̇na xodax biq̇i exbalġonḳ xoǯinebsa.
   Јаqа̀л мету̀ са адама̀рре ламандеса̀, маті̀нт̓е, іч к̓ех уqнахода̀х біqі̀, ехбалг̓о̀нјк хоџі̀небса.

Sentence: 48     Rusṭamen exne: "mono e hünarrubsa?"
   Рустамен ѐхне: "моно е һӱна̇ррубса"?

Sentence: 49     šeṭin exne: "mono e hünärä! hünär Rusṭamenne besa!"
   шѐтін ѐхне: "моно̀ е һӱна̇ра̇! һӱна̇р Рустамѐнне беса!"

Sentence: 50     Rusṭamen exne: "kano e pešaga ašbesunasṭa?
   Рустамен ѐхне: "к̓ано̀ е п̓еша̇га̀ ашбѐсунаста?

Sentence: 51     eke bul aq̇a taġen!"
   ек̓ѐ булаqа̀ т̓а̀г̓ен!"

Sentence: 52     exne: "šel, taġen!"
   Ехне: "шелј, т̓а̀г̓ен!"

Sentence: 53     monor ṗa͑lenax taq̇unsa, taq̇unsa, be͑q̇unġesa te sa išen ič turmuġol lavḳene ṗa͑ źo͑mo źenax xarine berxesa.
   Мо̀нор па̇ленах т̓а̀qунса, т̓а̀qунса. беqунг̓еса, т̓ѐ са ішѐн іч т̓урмуг̓о̀л лавкѐне па̇ жо̇можена̀х, харі̀не берхеса̀.

Sentence: 54     Rusṭamen exne meṭux: "kano e hünärru besa?"
   Рустамѐн ѐхне мѐтух: "к̓ано̀ е һӱна̇рру беса̀"? --

Sentence: 55     "meno e hünära! hünär Rusṭamenne besa!"
   "Мѐно е һӱна̇ра̇! һӱна̀р Рустамѐнне беса!"

Sentence: 56     šeṭin ǯuġabne tasṭa.
   шеті̀н џуг̓абне т̓аста̀.

Sentence: 57     Rusṭamen exne: "barta ka pešagax, eke yaxol, taġen!"
   Рустамен ѐхне: "ба̀рт̓а к̓а п̓еша̇га̀х, ек̓е ја̀хол, т̓а̀г̓ен!"

Sentence: 58     meṭin exne: "šel! ṗa͑ viči ma baken, baken xib."
   Меті̀н ѐхне: "шелј! па̇ вічі̀ ма бак̓ѐн, бак̓ѐн хіб".

Sentence: 59     monor taq̇unsa, taq̇unsa, be͑q̇unġesa te sa adamar arcine uqe boš, eq̇arate xene esa, bütün c̣umnexa.
   Моно̀р т̓а̀qунса, т̓а̀qунса, беqу̀нг̓еса, т̓ѐ са адама̀р а̀рціне уҟѐ бош, ѐqара т̓е хѐне еса, бӱт̓ӱн ц̓у̀мнеха.

Sentence: 60     Rusṭamen meṭux exne: "eḳala hünärru besa?"
   Рустамен мѐтух ѐхне: "ек̓ала һӱна̇ррубеса"? --

Page: 10
Sentence: 61     "hünär [10] zu tezbesa;
   "һӱна̇р [10] зу т̓ѐзбеса;

Sentence: 62     hünärax Rusṭamenne besa!
   һӱна̇ра̀х рустамѐнне беса!

Sentence: 63     Rusṭamen meṭux exne te barta vi pešagax, eke yaxol taġen!"
   Рустамен мѐтух ѐхне т̓е ба̀рт̓а ві п̓еша̇га̀х, ек̓ѐ ја̀хол т̓а̀г̓ен!"

Sentence: 64     mono irazine baksa, tanesa meṭuġoxol.
   моно̀ іразі̀небак̓са, т̓а̀неса метуго̀хол.

Sentence: 65     monor taq̇unsa, sa č̣älägi sa da͑ria͑q̇un biq̇sa.
   Мо̀нор т̓а̀qунса, са ч̓а̇ла̇гі̀ са да̇ріа̇qун біqса̀.

Sentence: 66     harġi novaden so mannedesa ḳua xorag boxsan, mandior gena taq̇unsa o͑xa͑la.
   һарг̓і новадѐн со ма̀ннедеса куа̀ хора̀гбохсан, мандјо̀р кена т̓а̀qунса о̇ха̇ла̇.

Sentence: 67     be͑śun ġi mannesṭa ḳua u͑qna xod biq̇alo.
   Бешу̀нг̓і ма̀ннеста куа̀ уqнахо̀д біqа̀ло.

Sentence: 68     meṭin bonexsa xuṗax, xoragax bütün hazirrebsa.
   Меті̀н бо̀нехса хупа̀х, хорага̀х бӱт̓ӱн һазі̀рребса.

Sentence: 69     me vaxṭa enesa sa aǯdaha, benessa meṭuxo halma.
   Ме ва̀хта ѐнеса са а̀ч̓даһа, бѐнесса мѐтухо һа̇лјма̇.

Sentence: 70     meṭin exne: "portba, barta yoldašmux ariq̇aq̇un!"
   Мѐтін ѐхне: "п̓о̀рт̓ба, ба̀рт̓а јолдашму̀х а̀ріqаqун!"

Sentence: 71     aǯdaha aǯuġonebaksa, exne te hala vi yoldašmuġox be͑ġalzu!"
   Ач̓даһа̀ аџуг̓о̀небак̓са, ѐхне т̓е һала̀ ві јолдашмуг̓о̀х бег̓алзу̀!

Sentence: 72     činesča ič biġnuxo sa pop, meṭux mia ġać̣pi saneksa, ičen gena bütün xoragax uksane, taisa.
   чі̀несча іч біг̓нухо̀ са п̓оп̓, мету̀х міа̀ г̓а̀чп̓і, са̀нек̓са, ічен кена̀ бӱт̓ӱн хорага̀х ук̓санѐ, т̓ајса̀.

Sentence: 73     meṭin sa zorin biġnux ḳac̣nexa, burreqsa täzadän xorag boxsax.
   Мѐтін сазорі̀н біг̓ну̀х ка̀ц̓неха, бу̀рреqса т̓а̇зада̇н хора̀г бохса̀х.

Sentence: 74     yoldašmux eq̇unsa, be͑q̇unġesa te hala xorag hazir tene, xabarq̇unaq̇sa eṭe xorag hazir tea.
   Јолдашму̀х ѐqунса, беqунг̓еса т̓е һала̀ хора̀г һазі̀рт̓ене, хабарqунаqса, етѐ хора̀г һазі̀рт̓еа.

Sentence: 75     exne te vädinax tez abai, evax boxazui;
   Ехне т̓е ва̇діна̀х т̓ѐзабај, ева̀х бохазу̀ј;

Sentence: 76     ama Rusṭam q̇amišnebaksa te mia sa aš bune.
   ама̀ Руста̀м qамішнебак̓са т̓е міа̀ са а̀ш бу̀не.

Sentence: 77     ośun ġi źomoxberxalone mandesa, meṭa belal šetär oinne esa;
   Ошу̇н г̓і̀ жомохберхалоне мандеса̀, мета̀ бела̀л шет̓а̇р оі̀нне еса;

Sentence: 78     xibumǯi ġi xeq̇uč̣ḳali belle esa me oin;
   хібумч̓і г̓і хеqу̀ч̓калі бѐлле еса̀ ме оін;

Sentence: 79     biṗumǯi ġi ḳua mannesṭa Rusṭam.
   біпумџі г̓і куа̀ ма̀ннеста Руста̀м.

Sentence: 80     xorag boxi te čixareḳsa, aǯdaha enesa; halmäne bessa.
   Хора̀г бохі т̓ѐ чіха̀рекса, ач̓даһа̀ ѐнеса; һа̇лма̇не бесса̀.

Sentence: 81     Rusṭamen exne te eča {?}, bez bexo irähätbaka {?}!
   Рустамѐн ехне т̓ѐ а̇ча̇, без бѐхо ірјадбак̓а!

Page: 11
Sentence: 82     aǯdahan činesča [11] sa pop ič biġnuxo, buṭuq̇sa Rusṭamax ġać̣ḳane.
   Ач̓даһа̀н чінесча [11] са п̓оп̓ іч біг̓ну̀хо, бу̀туqса Рустама̀х г̓а̀ч̓кане.

Sentence: 83     Rusṭamen meṭa bex čuḳsane, boesa, be͑ġsane te me ač̣dahin bul ṭunḳuripsin tacine sa kurru biti.
   Рустамѐн мета бѐх чукса̀не, боеса̀, бег̓са̀не, т̓е ме ач̓даһін бул тункурі̀п̓сін т̓аці̀не са к̓урру̀ біт̓і̀.

Sentence: 84     yoldašmux eq̇unsa, xoragax kaiṭuxo ośa Rusṭamen naġəllepsa te metär ašne bake;
   Јолдашму̀х ѐqунса хорага̀х к̓ајтухо о̀ша Рустамѐн наг̓ѵ̀ллеп̓са т̓е мѐт̓а̇р а̀шне бак̓ѐ;

Sentence: 85     yoldašmuġonal exq̇un ičuġo belal etär aša are,
   јолдашмуг̓онал ѐхqун ічуг̓о̀ бѐлал ет̓а̇р а̀ша арѐ,

Sentence: 86     ama oṭixo teq̇unpe.
   ама̀ оті̀хо т̓ѐqунп̓е.

Sentence: 87     Rusṭamen exne: "taġen, be͑ġen kurra boš eḳabu!"
   Рустамѐн ѐхне: "т̓а̀г̓ен, бѐг̓ен к̓у̀рра бош ека̀бу"!

Sentence: 88     be͑ġsaq̇un te kur gölö bo͑ġa͑lune, eḳal tene aḳesa;
   бег̓са̀qунт̓е к̓ур гӧлӧ буг̓алју̀не, ека̀л т̓енѐ акѐса;

Sentence: 89     exq̇un te ekenan so baiġen.
   ѐхqун т̓е ек̓ѐнан со ба̇јг̓ен.

Sentence: 90     uqna xod efalṭux kändiren suruḳq̇unbesa;
   уҟнахо̀дефалтух к̓ӓндірѐн суру̀кqунбеса;

Sentence: 91     saḳi te suruḳq̇unbesa meṭin c̣i͑ġi͑nexa:
   сакі̀ т̓е суру̀кqунбеса метін ц̓іг̓і̀неха:

Sentence: 92     "ai, bozki! hai, čičanan zax!"
   "ај, бо̀зк̓і! һај, чіча̀нан зах"!

Sentence: 93     ṭesahat čiq̇unčesa.
   Тѐсаһат̓ чіqунчеса.

Sentence: 94     źomoxberxalṭuxq̇un suruḳbesa;
   Жомо̀xберхалтухqу̀н суру̀кбеса;

Sentence: 95     šeṭin hašetär c̣i͑ġi͑nexa: bozḳi!
   шѐтін һашѐт̓а̇р ц̓іг̓і̀неха: бо̀зкі!

Sentence: 96     čiq̇unčesa;
   чіqу̀нчеса;

Sentence: 97     xeq̇uč̣ḳalenal hašetärre besa;
   хеqу̀ч̓калѐнал һашет̓а̇рре беса;

Sentence: 98     mannesṭa Rusṭam.
   ма̀ннеста Рустам.

Sentence: 99     Rusṭamen exne: "eq̇arate c̣i͑ġi͑ḳaiz: bozḳi!
   Рустамен ѐхне: "еqарат̓ѐ ц̓іг̓і̀кајз: бо̀зкі!

Sentence: 100     zax ma alabanan, suruḳbanan lap kurra tumel ciriḳ!"
   зах ма̀ алабанан, суру̀кбанан лап̓ к̓у̀рра т̓умѐлј цірік"!

Sentence: 101     hašetäräl beq̇unsa:
   һашѐт̓а̇ра̇лј беqунса:

Sentence: 102     eq̇ara c̣i͑ġi͑nexa: bozḳi! teq̇un imuxlaxsa;
   ѐqара ц̓іг̓і̀неха: бо̀зкі! т̓еqу̀н іму̀хлахса;

Sentence: 103     baneṗsa kurra ośex, be͑neġsa, te sa zidonun davrazane bu,
   ба̀непса к̓урра̀ ошѐх, бѐнег̓са, т̓ѐ са зідону̀н давраза̀не бу,

Sentence: 104     xa͑xa͑nexa, bainesa, ṗuran be͑ġsane davrazane bu, meṭux xa͑xa͑nexa;
   ха̇ха̇неха, бајнеса, пура̀н бег̓са̀не давраза̀не бу, мѐтух ха̇ха̇неха;

Sentence: 105     metärluġen vu͑ġ davrazane xa͑xa͑exa, lap bošne taisa;
   мет̓а̇рлуг̓ѐн ву̇г̓ давраза̀не ха̀ха̇еха, лап̓ бошне т̓ајса̀;

Sentence: 106     taci be͑ġsane:
   т̓аці бег̓сане:

Sentence: 107     sa xinär arcine, ič ḳäḳäṗal sa döv basḳine.
   са хінӓр арці̀не, іч кӓкӓпа̀л са дӧв ба̀скіне.

Sentence: 108     me xinären exne: "ai ġar mia eḳalnu [12] are.
   Ме хінӓрѐн ѐхне: "ај г̓ар, міа̀ ека̀лну [12] арѐ.

Page: 12
Sentence: 109     haisa döv aizal vax ukalle!"
   һа̀јса дӧв аіза̀л вах ук̓а̀ллје"!

Sentence: 110     döv moġorrebaksa, adde biq̇sa, exne:
   Дӧв мог̓о̀рребак̓са̀, а̀дде біqса̀, ѐхне:

Sentence: 111     "adamari addesa!
   "адамарі̀ а̀ддеса!

Sentence: 112     gölö vaxṭe adamari eq̇ tez kei."
   гӧлӧ вахтѐ адамарі̀ еq т̓ез к̓еј."

Sentence: 113     Rusṭamen, bex čuki bonessa;
   Рустамѐн, бех чук̓і̀, бо̀несса;

Sentence: 114     xinärax čixarḳesnesṭa.
   хінӓра̀х чіхаркѐснеста.

Sentence: 115     xinären exne te un za me šelluġa benu;
   Хінӓрѐн ѐхнет̓е ун за ме шеллуг̓а̀ бѐну;

Sentence: 116     ṭe ćo bez xunčine bu dövnä kex;
   те чо̇ без хунчі̀небу дӧвна̀ к̓ех;

Sentence: 117     take šeṭuxal čixarḳesṭa!"
   т̓ак̓ѐ шѐтухал чіхаркѐста!"

Sentence: 118     Rusṭamen taci davrazinax xa͑xa͑pi dövnux besnebsa;
   Рустамѐн т̓аці̀ давразіна̀х ха̇ха̇п̓і̀, дӧвну̀х бѐснебса;

Sentence: 119     metärlġen xib xinär dövnä kexo čixarḳesnesṭa;
   мет̓а̇рлуг̓ѐн хіб хінӓр дӧвна̀ к̓ѐхо чіхаркѐснеста;

Sentence: 120     axrax taci be͑ġsane sa osṭavar davrazin boš, arcine nut aḳeci šavaṭ xinär, ič ḳäḳäṗalal basḳine sa ma͑in döv;
   ахра̀х т̓аці̀ бег̓са̀не са остава̀р давразі̀н бош, а̀рціне нут̓ акеці̀ шава̀т хінӓр, іч кӓкӓпа̀лал ба̀скіне са маі̀н дӧв;

Sentence: 121     sataharen davrazinax xa͑xa͑pi boš bainesa, be͑ġsane te ṭe ač̣dahin bul miane, arene arznux;
   сат̓а̇һа̇рѐн давразіна̀х ха̇ха̇п̓і̀, бош ба̀јнеса, бег̓санѐ, т̓е те ач̓даһі̀н бул мі̀а̀не, арене а̇рзну̀х;

Sentence: 122     meṭux patevneḳsa, dövnuxal besnebsa; exne:
   мѐтух п̓ат̓ѐвнекса, дӧвну̀хал бѐснебса; ехне:

Sentence: 123     "ṭe xib xinär bez xib yoldašùn, mono gena bezi."
   "те хіб хінӓр без хіб јолдашу̀н, мо̀но кѐна бѐзі."

Sentence: 124     me xinärmuġox tanesša ḳändirun ṭo͑ġo͑l, ṭe xib xinärax soso ġać̣pi ala čičesnesṭa;
   Ме хінӓрмуг̓о̀х т̓а̀несша кӓндіру̀н то̇г̓о̇лј, те хіб хінӓра̀х со̀со г̓ачп̓і̀, ала̀ чічѐснеста;

Sentence: 125     mandesaq̇un Rusṭam q̇an šavaṭ xinär.
   мандесаqу̀н Руста̀м qан шава̀т хінӓр.

Sentence: 126     Rusṭamen exne te gäräg be͑ś un laiġan, ośa zu!"
   Рустамѐн ѐхне т̓е гја̇рја̇г бӓш ун лајг̓а̀н, о̇ша̇ зу!"

Sentence: 127     Rusṭama q̇əṭubsa te be͑ś ič laiġane, ośa xinära nu buq̇aṭu laisun;
   Рустама̀ qѵтубса т̓е бӓш іч лајг̓анѐ, о̇ша̇ хінӓра̀ ну буqату̀ лајсу̀н;

Sentence: 128     xinären gena exne Rusṭamax te be͑ś gäräg un laiġan,
   хінӓрѐн кена̀ ѐхне Рустама̀х т̓е бӓш гја̇рја̇г ун ла̀јг̓ан, --

Sentence: 129     xinära gena q̇əṭubsa te ič laiġane, yoldašmuġo aḳaq̇o te mono bütünṭuxo šavaṭṭe,
   хінӓра̀ кена̀ qѵтубса т̓е іч ла̀јг̓ане, јолдашмуг̓о̀ а̀каqо т̓е мо̀но бӱт̓ӱнтухо шава̀тте,

Sentence: 130     Rusṭamax nu laičaq̇un.
   Рустама̀х ну лајчаqу̀н.

Sentence: 131     axri Rusṭamen exne xinärax te un näin laiġo, zu laiġalo tezu, [13] xinären činesča ič ǯübnuxo ṗa͑ q̇alam, tanesṭa Rusṭama, exne:
   Ахрі̀ Рустамѐн ѐхне хінӓра̀х т̓е ун на̀јн лајг̓о̀, зу лајг̓ало̀ т̓ѐзу, [13] хінӓрѐн чі̀несча іч џӱбну̀хо па̇ qа̇лја̀м, т̓а̀неста Рустама̀, ѐхне:

Page: 13
Sentence: 132     "zu isa laizuġo, pesbakal tene ägänä vax yoldašmuġon nainq̇un laičo, me q̇alamax sunsunaxol duġa, ṭesahat eġalle sa mac̣i eġel, sa ma͑in vel:
   "зу і̀са ла̇јзуг̓о, п̓ѐсбак̓ал т̓ѐне а̇гја̇на̀ вах јолдашмуг̓о̀н најнqун лајчо̀, ме qа̇лја̇ма̀х сунсуна̀хол ду̀г̓а, тѐсаһат̓ ег̓аллѐ са мац̓і ег̓ѐлј, са ма̇і̀н велј:

Sentence: 133     ägänä eġelallu arci, vax laičalle alun düniani, vellullu arci, tašalle oq̇un düniani!"
   а̇гја̇на̀ ег̓елаллу арці̀, вах лајча̀лле алу̀н дӱніані̀, велјлу̀ллу арці̀, т̓аша̀лле оqу̀н дӱніані̀"!

Sentence: 134     xinär lainesa, me yoldašmuġo te xinärax aq̇oḳsa, aq̇q̇unesa, enex čaax {!} teq̇un bossa, te Rusṭam laiġone;
   Хінӓр ла̇јнеса, ме јолдашмуг̓о̀ т̓е хінӓра̀х а̀qокса̀, аqqунеса, енѐх ч̓аа̀х т̓ѐqун босса̀, т̓е Руста̀м лајг̓оне;

Sentence: 135     buq̇oq̇sa te šavaṭ xinär ičuġo mandane.
   буqоqса т̓е шава̀т хінӓр і̀чуг̓о манданѐ.

Sentence: 136     Rusṭamen be͑ġsane te ičux teq̇un laičesa; gölö namusne esa, aǯuġonnebaksa, ćo oq̇a binesta;
   Рустамѐн бег̓са̀не т̓е і̀чух т̓еqун лајчеса̀; гӧлӧ наму̀сне еса̀, аџуг̓о̀ннебак̓са̀, чо̇ оqа̀ бінест̓а;

Sentence: 137     xib ġi hametär bitine baksa,
   хіб г̓і һамѐт̓а̇р біт̓і̀не бак̓са,

Sentence: 138     meṭin birdän qalamġox ixnebaksa, činesča sunsunax duneġesa, ṭesahat enesa sa mac̣i eġel, sa ma͑in vel.
   мѐтін бірда̇н qа̇лја̇мг̓ох і̀хнебасак̓са, чі̀несча сунсуна̀х ду̀нег̓еса, тѐсаһат̓ ѐнеса са мац̓і ег̓ѐлј, са маі̀н велј.

Sentence: 139     Rusṭama buṭuq̇sa eġelun laxo arcane,
   Рустама̀ бу̀туqса ег̓елјун ла̀хо арцанѐ,

Sentence: 140     vel ari q̇ati bainesa;
   велј арі̀ qат̓і̀ ба̀јнеса;

Sentence: 141     eq̇ara čalušmišnebaksa eġelal arcane;
   ѐqара чалушмі̀шнебак̓са̀ ег̓ела̀л арцанѐ;

Sentence: 142     teṭu baksa, axri velulle arcesa,
   т̓ѐту бак̓са̀, ахрі̀ велу̀ллје арцеса̀,

Sentence: 143     velen tanesša oq̇un düniani.
   велјѐн т̓а̀несша оqу̀н дӱніані.

Sentence: 144     taci sa karvano ḳua cinesa, me karvanoxo xene bessa;
   т̓аці̀ са к̓арвано̀ куа̀ ці̀неса, ме к̓арвано̀хо хѐне бесса̀;

Sentence: 145     karvanon lägär xene esča, Rusṭamen me xenan bonessa, exne;
   к̓арвано̀н ла̇г̓а̇р хѐне ѐсча, Рустамѐн ме хена̀н бо̀несса, ѐхне:

Sentence: 146     "šel xe tada!"
   "шелј хе т̓ада̀!"

Sentence: 147     karvanon exne: "šel xe tebeš bu; beš oreina sa diziḳne bu, šeṭin tene barexa xe tasšan, gäräg ġennax sunṭin peškäš tašane te xe aq̇ane;
   к̓арвано̀н ѐхне: "шелј хе т̓ѐбешбу; беш ореіна̀ са дізі̀кне бу, шеті̀н т̓ѐне бареха̀ хе т̓а̀сшан, гја̇рја̀г г̓енна̀х су̀нтін п̓ѐшк̓ӓш т̓ашане т̓ѐ хе аqанѐ;

Sentence: 148     ġe pasč̣aġun xinäri novadde."
   г̓е п̓асч̓аг̓у̀н хінӓрі нова̀дде"

Page: 14
Sentence: 149     Rusṭamen exne: "ṭe oreinax za aḳesṭa!"
   Рустамѐн ѐхне: "те орејна̀х за акѐста!"

Sentence: 150     karvanon aḳesnesṭa.
   к̓арвано̀н акѐснеста.

Sentence: 151     Rusṭam arresca, oreinun ṭo͑ġo͑l be͑neġsa.
   Руста̀м а̀рресца, орејну̀н то̇г̓о̀лј бѐнег̓са.

Sentence: 152     saema vädinaxo ośa pasč̣aġun xinär sa mäźmein xuṗen enesa.
   Саема̀ ва̇діна̇хо о̀ша̇ п̓асч̓аг̓у̀н хінӓр са ма̇жмѐін хупен ѐнеса.

Sentence: 153     Rusṭamen xuṗax me xinäraxo benessa.
   Рустамѐн хупах ме хінӓра̀хо бѐнесса.

Sentence: 154     xinären exne: "me xuṗ diziḳenḳne, isa šeno č̣eġal, ukalle,
   Хінӓрѐн ѐхне: "ме хуп дізікенјкне, і̀са шено̀ ч̓ег̓а̀л, ук̓а̀лле,

Sentence: 155     ośa za xe tadalle;
   о̀ша̇ за хе т̓ада̀лле;

Sentence: 156     xuṗaxva te tadaiz, xe malzu tašo?"
   хупа̀х ва̀т̓е т̓а̀даіз, -- хе ма̀лзу т̓аш̆о̀"?

Sentence: 157     Rusṭamen exne: "vi borǯ tene, un xuṗax za tada: za azaba!"
   Рустамѐн ѐхне: "ві борџт̓ѐне, ун хупа̀х за̀ т̓ада: за̀заба"!

Sentence: 158     xinären xuṗax tanesṭa Rusṭama.
   Хінӓрѐн хупа̀х т̓а̀неста Рустама̀.

Sentence: 159     Rusṭamen xuṗax uneksa, diziḳax be͑neġsa.
   Рустамѐн хупа̀х у̀нек̓са, дізіка̀х бѐнег̓са.

Sentence: 160     sahoraxo diziḳ č̣enesa;
   Саһора̀хо дізі̀к ч̓ѐнеса;

Sentence: 161     Rusṭamen ḳac̣pi besnebsa;
   Рустамѐн кац̓п̓і̀ бѐснебса;

Sentence: 162     xe bütün ṗinenne baksa.
   хе бӱтӱн пінѐнне бак̓са̀.

Sentence: 163     pasč̣aġun xinären ič kex ṗina čapi,
   п̓асч̓аг̓у̀н хінӓрѐн іч к̓ех піна̀ чап̓і̀,

Sentence: 164     ġari bać̣anel duneġesa.
   г̓арі̀ бач̓анел ду̀нег̓еса.

Sentence: 165     pasč̣aġa iṭubaksa te diziḳax besq̇unbe, bütün adamarġox ḳallexa,
   Ҧасч̓аг̓а̀ і̀тубак̓са т̓ѐ дізіка̀х бѐсqунбе, бӱтӱн адамарг̓о̀х ка̀ллеха, --

Sentence: 166     buṭuq̇sa ababakaṭu, šua me ġar.
   бу̀туqса, аба̀бак̓ату, шу̀а ме г̓ар.

Sentence: 167     pasč̣aġun xinären be͑ġsane xalxna laxo, tene bo͑ġa͑bsa, exne:
   п̓асч̓аг̓у̀н хінӓрѐн бег̓са̀не халхна̀ ла̀хо, т̓ѐне бог̓абса̀, ѐхне:

Sentence: 168     "ṭe ġar fulan karvano ḳuane, taci eq̇unčesa.
   "те, г̓ар фула̀н к̓арвано̀ куа̀не, т̓аці̀ ѐqунчеса.

Sentence: 169     xinären exne: "šor, hamenone."
   Хінӓрѐн ѐхне: "шор, һамѐноне"!

Sentence: 170     pasč̣aġen exne: "eṭinva čalxesa?"
   п̓асч̓аг̓ѐн ѐхне: "еті̀нва чалхеса̀?"

Sentence: 171     xinären aḳesnesṭa bać̣anex mate ič kin ṗinen mühürre duġe.
   Хінӓрѐн акѐснеста бач̓анѐх ма т̓е іч к̓і̀н пінѐн мӱһӱррѐ дуг̓е.

Sentence: 172     ṭevaxṭ pasč̣aġen exne Rusṭamax:
   Тѐвахт п̓асч̓аг̓ѐн ѐхне Рустама̀х:

Sentence: 173     "q̇oč̣aġ, eḳava buq̇sa, besa, zu venḳ häzirzu."
   "qоч̓аг̓, ека̀ва буqса̀, бѐса, -- зу венк һа̇зірзу"!

Sentence: 174     Rusṭamen exne: "zu vaxo, pasč̣aġ, eḳal teza buq̇sa,
   Рустамѐн ѐхне: "зу ва̀хо, п̓асч̓а̀г̓, ека̀л т̓ѐза буqса,

Sentence: 175     täksa zax alun düniani yaq̇aba."
   т̓а̀к̓са зах алу̀н дӱніані̀ јаqаба".

Sentence: 176     pasč̣aġen exne te haka ašlax za teza bako;
   п̓асч̓аг̓ѐн ѐхне т̓е һак̓а̀ ашла̀х за т̓ѐзабак̓о̀;

Sentence: 177     fulan ganu bune sa q̇uš, [15] šeṭa tulurġox diziḳen hammaša uneksa:
   фула̀нгану̀ бу̀не са qуш, [15] шета̀ т̓улург̓о̀х дізікѐн һа̀ммаша у̀нек̓са:

Page: 15
Sentence: 178     ägänä ṭe diziḳax besbain, bäligä ṭe q̇ušen tašane alun düniani."
   а̇гја̇на̇ те дізіка̀х бесба̀јн, ба̇ліга̇ те qушѐн т̓а̀шане алу̀н дӱніані̀."

Sentence: 179     Rusṭam tanesa, ṭe diziḳax besnebsa, ośa mandaḳbaki, basneksa.
   Руста̀м т̓а̀неса, те дізіка̀х бѐснебса, о̇ша̀ мандакбак̓і̀, ба̀снек̓са.

Sentence: 180     q̇uš esa ġarax aḳsaṭu, šor be͑ġsane, te ič tulurġox ḳac̣ḳalo monone,
   qуш еса̀ г̓ара̀х акса̀ту, шор бег̓сане, т̓е іч т̓улург̓о̀х кац̓кало̀ мо̀ноне,

Sentence: 181     buṭuq̇sa taġane besbane;
   бу̀туqса т̓а̀г̓ане бѐсбане;

Sentence: 182     ṭevaxṭ ič tulurġon exq̇un, te kaṭul ma lafṭa, yax ukalo ṭe ḳac̣pi diziḳne,
   тѐвахт іч т̓улург̓о̀н ѐхqун, т̓е к̓а̀тул ма̀лафта, јах ук̓а̀ло те кац̓п̓і̀ дізі̀кне,

Sentence: 183     me ġarenne ari besbe.
   ме г̓арѐнне арі̀ бесбѐ.

Sentence: 184     me q̇ušen ṭesahat taisane, ič q̇anadax pasṭi, me ġari laxo xoǯinebsa.
   Ме qушен тѐсаһат̓ т̓ајса̀не, іч qа̇на̇да̀х п̓асті̀, ме г̓арі̀ ла̀хо хоџі̀небса.

Sentence: 185     Rusṭam te moġorrebaksa, q̇ušnuġ aṭuḳsa, q̇ə͑ṭubsa;
   Руста̀м т̓е мог̓о̀рребак̓са, qушну̀г̓ а̀тукса, qѵ̀тубса;

Sentence: 186     q̇ušen exne: "maq̇ava q̇ə͑bi, zu vi q̇ulluġa hazirzu, bürmišba."
   qушѐн ѐхне: "ма̀qава qѵбі, зу ві qуллуг̓а̀ һа̇зі̀рзу, бӱрјмішба". --

Sentence: 187     Rusṭamen exne: "zax alun düniani taša!"
   Рустамѐн ѐхне: "зах алу̀н дӱніані̀ т̓аша̀!"

Sentence: 188     q̇ušen exne te un zaxo gölö koǯ q̇ulluġnu bessa,
   qушѐн ѐхне т̓е ун захо̀ гӧлӧ к̓оџ qуллу̀г̓ну бесса̀,

Sentence: 189     ägänä zu ǯähilgiz bakei, oxarinei, isa q̇oǯazu, ama eḳaz bo, un te kala šelluġa benu, zual gäräg vi tavaxq̇inax tambazu;
   а̇гја̇на̇ зу џаһілјгізбак̓ѐј, охарінеј, іса̀ qоџа̀зу, ама̀ ека̀збо, ун т̓е к̓ала̀ шеллуг̓а̀ бѐну, зу̀ал гја̇ра̇г ві т̓авахqіна̀х т̓амбазу;

Sentence: 190     take pasč̣aġaxo, vu͑ġ put eq̇, vu͑ġ put xe esča!"
   т̓а̀к̓е п̓асч̓аг̓ахо̀, ву̇г̓ п̓ут̓ еq, ву̇г̓ п̓ут̓ хе ѐсча"!

Sentence: 191     Rusṭam tanesa, pasč̣aġaxo besi enesča.
   Рустам т̓а̀неса, п̓асч̓аг̓ахо̀ бесі̀ ѐнесча.

Sentence: 192     q̇ušen xenax, eq̇nux aneq̇sa,
   qушѐн хена̀х, еqну̀х а̀неqса,

Sentence: 193     Rusṭamax ič laxo arcesnesṭa.
   Рустама̀х іч ла̀хо арц̓еснеста̀.

Sentence: 194     exne q̇ušen: "isa zu purḳalzu, har säsbaxun, sa put xe, sa put eq̇ bez źomon boso."
   ѐхне qушѐн: "іса зу п̓урка̀лзу, һар са̇сбаху̀н, са п̓ут̓ хе, са п̓ут̓ еq без жомон босо̀".

Sentence: 195     me ġaren hašorre besa.
   Ме г̓арѐн һашо̀рре беса̀.

Sentence: 196     baṗal ganu axrun puttux eq̇nai bosaxun, eq̇ taraexane, bisṭa;
   Бапа̀лгану̀ ахру̀н п̓ут̓тух ѐqнај боса̀хун, еq т̓араеха̀не, біста̀;

Sentence: 197     me ġaren ṭesahat ič budda eq̇nux bosṭane, tasṭa;
   ме г̓арѐн тѐсаһат̓ іч будда̀ еqну̀х боста̀не, т̓аста̀;

Page: 16
Sentence: 198     q̇ušnu abaṭubaksa [16] eṭete adamari eq̇ muć̣ane baksa.
   qушну̀ абатубак̓са̀ [16] етѐт̓е адамарі̀ ѐq му̇ч̓а̇не бак̓са̀.

Sentence: 199     q̇ušen meṭux ič muzna q̇ati enefsa;
   qушѐн мѐтух іч музна̀ qат̓і̀ ѐнефса;

Sentence: 200     q̇uš te banepsa alun düniani, ġarax cirevneḳesa.
   qуш т̓ѐ ба̀неп̓са алу̀н дӱніані̀, г̓ара̀х цірѐвнекеса.

Sentence: 201     Rusṭam ṭesahat arresca;
   Руста̀м тѐсаһат̓ а̀рресца;

Sentence: 202     q̇ušen exne: "ajza, take, eḳan arce?"
   qушѐн ѐхне: "ајза, т̓а̀к̓е, ека̀н арцѐ?"

Sentence: 203     q̇ušen exne: "mandaḳzubake!"
   Метін ѐхне: "манда̀кзубак̓е"!

Sentence: 204     q̇ušen exne: "vax ečerio zu, mandaḳbakalo un!"
   qушѐн ѐхне: "вах ечеріо̀ зу, мандакбак̓а̀ло ун!"

Sentence: 205     q̇ušna xatiraxo tene, č̣esa aizeri tanesa.
   qушна̀ хат̓іра̀хо т̓ѐне, ч̓еса̀ ајзері̀ т̓а̀неса.

Sentence: 206     q̇ušen be͑neġsa te meṭin ḳalanexa, xabarreaq̇sa, eṭea ḳalaexa;
   qушѐн бенег̓са, т̓е мѐтін кала̀неха, хаба̀рреаqса, етѐа кала̀еха;

Sentence: 207     Rusṭamen exne te eq̇ kambakiṭan, ič budduxo boneṭe.
   Рустамѐн ѐхне т̓ѐ еq к̓амбак̓і̀тан, іч буддухо бо̀нете.

Sentence: 208     q̇ušen činesča ič muzna oq̇axo lačaq̇nesṭa, qalamen lanesṭa:
   qушѐн чі̀несча іч музна̀ оqа̀хо лача̀qнеста, qа̇лја̇мѐн ла̀неста:

Sentence: 209     Rusṭami tur ṭesahat šellebaksa.
   Рустамі̀ т̓ур тѐсаһат̓ шѐллебак̓са.

Sentence: 210     ośa q̇ušen ičuxo ṗa͑ q̇alam tanesṭa Rusṭama, exne:
   о̀ша̇ qушѐн і̀чухо па̇ qа̇лја̇м т̓а̀неста Рустама̀, ѐхне:

Sentence: 211     "evaxṭte ṭarganu bakain q̇alamax sunsunax duġa, zu vi ṭo͑ġo͑l hazirzu!"
   "ѐвахт т̓ѐ та̀ргану ба̀к̓ајн qа̇лја̇ма̀х сунсуна̀х ду̀г̓а, зу ві то̇г̓о̀лј һазі̀рзу"!

Sentence: 212     Rusṭam melan düz tanesa ṭe č̣älägi, mate da͑ria͑q̇un biq̇e;
   Руста̀м мела̀н дӱз т̓а̀неса те ч̓ала̇гі̀, ма̀т̓е да̇рја̇qу̀н біqѐ;

Sentence: 213     taci be͑ġsane ič yoldašmuġon höǯätq̇unbesa šavaṭ xinäri laxo.
   т̓аці̀ бег̓са̀не іч јолдашмуг̓о̀н һо̇ч̓а̀т̓qунбеса шава̀т хінӓрі̀ ла̀хо.

Sentence: 214     Rusṭamax aḳesxolan monor aq̇q̇unesa, oṭalq̇obesa;
   Рустама̀х акесхола̀н, мо̀нор а̀qqунеса, о̀талqобеса;

Sentence: 215     ari Rusṭami turin oq̇a biti, xoiśq̇unbesa, te mono sa ašne beyan baġišlamišba,
   арі̀ Рустамі̀ т̓урі̀н оqа̀ біт̓і̀, хоі̀шqунбеса, т̓ѐ мо̀но са а̀шне бѐјан баг̓ішламі̀шба,

Sentence: 216     Rusṭamen baġišlamišnebsa.
   Рустамѐн баг̓ішламішнебса.

Sentence: 217     Rusṭamen aneq̇esa šavaṭ xinärax, yoldašmuġonal harṭin so ṭe xib xinäraxo.
   Рустамѐн а̀неqеса шава̀т хінӓра̀х, јолдашмуг̓о̀нал һа̀ртін со те хіб хінӓрахо̀.

Sentence: 218     meṭuġon maslahatq̇unbesa te haro, ǯoḳbaki taġaq̇un sa ölkina.
   Метуг̓он маслаһа̀т̓qунбеса т̓ѐ һа̀ро, џокбак̓і̀ т̓а̀г̓аqун са ӧлјк̓іна.

Sentence: 219     biṗ yoldašenal sunsuna taq̇undesa harṭin sa baboča͑l;
   Біп јолдашѐнал су̀нсуна т̓а̀qундеса һа̀ртін са бабоча̇л;

Page: 17
Sentence: 220     evaxṭte [17] yoldašun so ṭarġəna bakain, baboč̣a͑lun pulurux ma͑in bakalle,
   ева̀хтте [17] јолдашу̀н со та̀рг̓eна бак̓ајн, бабоч̓а̇лу̀н п̓улуру̀х маі̀н бак̓а̀лле,

Sentence: 221     ṭevaxṭ yoldašmuġo baq̇oko kämäga taies;
   тѐвахт јолдашмуг̓о ба̀qок̓о к̓ӧма̇га̀ т̓а̀јес;

Sentence: 222     mia dürüsṭluġon pi haro sa ćo tanesa.
   міа дӱрӱстлуг̓о̀н п̓і һа̀ро са чо̇ т̓а̀неса.

Sentence: 223     Rusṭam šavaṭ xinäraxol sa pasč̣aġluġa tanesa, be͑neġsa te sa šel ḳoǯne bu;
   Руста̀м шава̀т хінӓрахо̀л са п̓асч̓аг̓луг̓а̀ т̓а̀несса, бѐнег̓еса т̓е са шѐлј ко̀џнебу;

Sentence: 224     xabarreaq̇sa me ḳoǯ šia?
   хаба̀рреаqса мѐ коџ шіа"?

Sentence: 225     exq̇un: "dövnaine."
   ехqу̀н: дӧвна̀јне̇

Sentence: 226     Rusṭam bainesa ḳua dövnux besnebsa;
   Руста̀м ба̀јнеса куа дӧвну̀х бѐснебса;

Sentence: 227     dövna čubġoxal aneq̇esa, baṭaḳsa ṗa͑ čubux, dövnä ḳua karrexsa.
   дӧвна̀ чубг̓о̀хал а̀неqеса, ба̀такса па̇ чубу̀х, дӧвна̀ куа̀ к̓а̀ррехса.

Sentence: 228     miaun pasč̣aġun pul gölö vaxṭe ṭe dövna čubġo laxonei,
   Міау̀н п̓асч̓аг̓у̀н п̓ул гӧлӧ ва̀хте тѐ дӧвна̀ чубг̓о̀ ла̀хонеј,

Sentence: 229     ama dövnä q̇ə͑ixo eḳal teṭu baksai;
   ама̀ дӧвна̀ qѵ̀іхо ека̀л т̓ѐту бак̓са̀ј;

Sentence: 230     isa te iṭubakei Rusṭamen dövnux besbi čubġox ičenne aq̇e,
   ісат̓ѐ і̀тубак̓еј Рустамѐн дӧвну̀х бесбі̀ чубг̓о̀х ічѐнне аqѐ,

Sentence: 231     buṭuq̇sai Rusṭami kexo sa fänden aq̇ane.
   бутуqса̀ј Рустамі̀ к̓ѐхо са фа̇ндѐнј а̀qане.

Sentence: 232     sa karvano esa, exne: "zu ṭe čubġox mia esčo, un sa šetär sanduġ serbesṭa,
   Са к̓арвано̀ еса̀, ѐхне: зу тѐ чубг̓о̀х міа̀ есчо, ун са шет̓а̇р санду̀г̓ сербѐста,

Sentence: 233     Rusṭami paki yaq̇aba te ič boš arci hačarax č̣urq̇az, ṭesahat sanduġ eġane vi ćomol;
   Рустамі̀ п̓ак̓і̀ јаqаба т̓ѐ іч бо̀ш арці̀ һачара̀х ч̓у̀рqаз, тѐсаһат̓ санду̀г̓ ѐг̓ане ві чо̇мо̇лј;

Sentence: 234     pasč̣aġen exne: "zu un uḳal sanduġax serbeszudo,
   п̓асч̓аг̓ѐн ѐхне: "зу ун ука̀л сандуг̓а̀х сербѐсзудо,

Sentence: 235     ägänä un ṭe čubġox ečesbakaiva, zu va vi binaxi q̇əzəl tadalzu.
   а̇гја̇на̇ ун тѐ чубг̓о̀х ечесбак̓а̀јва, зу ва ві бѵнахі̀ qѵзѵл т̓ада̀лзу.

Sentence: 236     me karvano arresca Rusṭami davrazin oq̇a.
   Ме к̓арвано̀ арресца Рустамі давразі̀н оqа̀.

Sentence: 237     Rusṭam te o͑xa͑la͑xo enesa ḳua,
   Руста̀м т̓е о̇ха̇ла̇хо енеса куа.

Sentence: 238     karvanon exne meṭux te zu busa biesaz.
   к̓арвано̀н ехне мету̀(г̓) т̓е зу буса̀ біеса̀з!

Sentence: 239     zax sa bukun śumal q̇ulluġči biq̇a.
   зах са бук̓у̀н ш̆ума̀л qуллуг̓чі̀ біqа̀.

Sentence: 240     Rusṭamen exne: "vaxo eḳal teza buq̇sa; eke, karxa!"
   Рустамѐн ѐхне: "вахо̀ екал т̓ѐза буqса̀; ѐк̓е, к̓а̀рха!"

Sentence: 241     ośun čubġoi kefil tene esa.
   Ошу̀н чубг̓о̀ј к̓ефі̀лј т̓ѐне еса̀.

Sentence: 242     exne: "kaṭuxo ya xatane lafṭo!"
   Ехне: "к̓а̀тухо ја хат̓а̀нелафто!" --

Page: 18
Sentence: 243     me karvano [18] sapara vaxṭ karrexsa,
   Ме к̓арвано̀ [18] сап̓ара̀ вахт к̓а̀ррехса,

Sentence: 244     ośun čubġoxol dosṭebaksa.
   ошу̀н чубг̓о̀хол достебак̓са.

Sentence: 245     sakärän karvanon meṭux xabarreaq̇sa: "vi iše zor mano ganuṭai?"
   Сак̓ӓрӓн к̓арвано̀н мѐтух хаба̀рреаqса: "ві іше зор мано̀ ганута̀ј?"

Sentence: 246     čubġon exne: "teza aba!"
   Чубг̓о̀н ѐхне: "т̓ѐзаба"!

Sentence: 247     karvanon exne: "un etär čubuxnu, te teva aba vi iše zor maa?"
   к̓арвано̀н ѐхне: "ун ет̓а̇р чубу̀хну, т̓е т̓еваба ві ішѐ зор маа?"

Sentence: 248     čubġon taci Rusṭamax xabarreaq̇sa, te maṭai zor.
   Чубг̓о̀н т̓аці̀ Рустама̀х хаба̀рреаqса, т̓е матај зор.

Sentence: 249     Rusṭamen be͑ś tene exa, gölö xoiśbiṭuxo ośa exne:
   Рустамѐн бӓш т̓ѐне еха̀, гӧлӧ хоішбітухо о̀ша̇ ѐхне:

Sentence: 250     "bez zor bez kin baboča͑lasṭane:
   "без зор безкі̀н бабоча̇ла̀стане:

Sentence: 251     ägänä me baboča͑lax čičaiq̇un, zu palaz-ḳenaz bako, turelal aizes bakalteza;
   а̇гја̇на̇ ме бабоча̇ла̀х чіча̀јqун, зу п̓ала̀зкеназ бак̓о̀, т̓урѐлал а̀јзес бак̓а̀лт̓еза;

Sentence: 252     ṗa͑q̇o ġi šetär mandaiz bi(e)oz."
   па̇qо г̓і шет̓а̇р манда̀јз, біоз".

Sentence: 253     karvano bütün iṭubaksa.
   к̓арвано̀ бӱтӱн і̀тубак̓са.

Sentence: 254     me ġi Rusṭam paki baskine baksa;
   Ме г̓і Рустам п̓ак̓і ба̀ск̓іне бак̓са̀;

Sentence: 255     me karvano esane, yavašluġon Rusṭami ḳašina ć̣ain ladi, baboča͑lax čisčane houza bossa.
   ме к̓арвано̀ еса̀не, јавашлуг̓о̀н Рустамі̀ кашіна̀ ч̓аі̀н ладі̀, бабоча̇ла̀х чісча̀не һоуза̀ босса̀.

Sentence: 256     Rusṭam baksane ṗuri-ḳena.
   Рустам бак̓са̀не пурі̀ кена.

Sentence: 257     karvano ṭesahat tanesa ḳua, čubġox exne:
   к̓арвано̀ тѐсаһат̓ т̓а̀неса куа, чубг̓о̀х ехне:

Sentence: 258     "e šel ġia! taġen paki furuḳen!"
   "е шелј г̓іа! т̓а̀г̓ен п̓ак̓і̀ фуру̀кен!"

Sentence: 259     me čubġox tanesča düz ṭia, mate sanduġ laxne;
   Ме чубг̓о̀х т̓анесша дӱз тіа, ма т̓е санду̀г̓ ла̀хне;

Sentence: 260     me sanduġun ṭo͑ġo͑xo͑ č̣ebakaxun, taci sanduġun boš arresca čubġoxal ḳallexa,
   ме сандуг̓у̀н то̇г̓о̇хо̇ ч̓ебак̓ахун, т̓аці сандуг̓у̀н бош арресца чубг̓о̀хал ка̀ллеха,

Sentence: 261     exne: "eke, mia arca, be͑ġa etär šela!
   ѐхне: "ѐк̓е, міа арца̀, бег̓а̀ ет̓а̇р шела̀!

Sentence: 262     meṭux šina serbe?"
   Мету̀г̓ ші̀на сербѐ?"

Sentence: 263     me čubux te taci arresca, karvanon hačarax č̣urrexa, sanduġ ṭesahat pasč̣aġun ćomol tanesa.
   Ме чубу̀х т̓е т̓аці̀ арресца, к̓арвано̀н һачара̀х ч̓у̀рреха, сандуг̓ тѐсаһат̓ пасч̓аг̓у̀н чо̇мо̇лј т̓анеса.

Sentence: 264     me šavaṭ xinära eḳal teṭu ababaksa, maq̇un tace ma te.
   Ме шава̀т хінӓра̇ ека̀л т̓ѐту абабак̓са̀, ма̀qун т̓ацѐ ма̀ т̓е.

Sentence: 265     yoldašmoġoi baboča͑li pul ma͑innebaksa,
   Јолдашмог̓о̀ј бабоча̇лі̀ п̓ул ма̀јннебак̓са,

Sentence: 266     ṭesahat abaq̇obaksa te Rusṭam ṭarġenane.
   тѐсаһат̓ аба̀qобак̓са̀т̓е Руста̀м та̀рг̓енане.

Page: 19
Sentence: 267     monor ari čuresin [19] bo͑ġa͑q̇unbesa, be͑ġsaq̇un te ṗuri-ḳena bitine;
   Моно̀р арі̀, чу̀ресін [19] бог̓аqунбеса, бег̓са̀qунт̓е пурі кена біт̓і̀не;

Sentence: 268     aq̇oḳesa te ič kel zorra baboča͑l tene bu;
   аqокеса т̓ѐ іч к̓елј зорра̀ бабоча̇л т̓ѐнебу;

Sentence: 269     furuq̇unexa, teq̇un bo͑ġa͑bsa.
   фуру̀qунеха, т̓ѐqун бог̓абса.

Sentence: 270     xeq̇uč̣ḳalen hovuzax c̣umnexa, baboča͑lax hovuzun tumexo bo͑ġa͑nebsa, ečeri ič kel lavq̇unḳesa.
   Хеqуч̓калѐн һоуза̀х ц̓у̀мнеха, бабоча̇ла̀х һоуqу̀н т̓умѐхо бог̓а̀небса, ечері іч к̓елј ла̀вqункеса.

Sentence: 271     Rusṭam ṭesahat ainessa, yoldašmuġox aḳi muq̇nebaksa,
   Руста̀м тѐсаһат̓ а̀јнесса, јолдашмуг̓о̀х акі̀ му̀qнебак̓са,

Sentence: 272     exne: "e gölöz baske!"
   ѐхне: "е гӧлӧз баск̓ѐ"!

Sentence: 273     šoṭġon exq̇un: "un basḳi tenui, ṗurinui!"
   Шо̀туг̓он ѐхqун: "ун баскі̀ т̓енуј, пурі̀нуј!"

Sentence: 274     bütün ixṭilatq̇unbesa.
   Бӱтӱн іхтіла̀т̓qунбеса.

Sentence: 275     mono aq̇nesa, aizeri, tanesa ḳua, be͑ġsane täksa šavaṭ xinärre ḳua.
   Моно̀ а̀qнеса, ајзері̀, т̓а̀неса куа̀, бег̓са̀не т̓ак̓са ша̀ва̀т хінӓрре куа.

Sentence: 276     Rusṭamen xabarreaq̇sa: "maq̇un karvano q̇an čubux?"
   Рустамѐн хабаррѐаqса: "ма̀qун к̓арвано̀ qан чубу̀х?"

Sentence: 277     šavaṭ xinären exne: "teza aba!"
   Шава̀т хі̀нӓрен ѐхне: "т̓ѐза аба!"

Sentence: 278     meṭu abaṭubaksa te šonor pasč̣aġun ḳuaq̇un.
   Мету̀ аба̀тубак̓са т̓е шо̇но̇р пасч̓аг̓у̀н куа̀qун.

Sentence: 279     monor e͑kal arci, taci pasč̣aġaxal, ič q̇ošinaxal ḳac̣q̇unexa, čubġox eq̇unčesa, šel kefq̇unbesa.
   Монор, ӓк̓алј арці̀, т̓аці̀, пасч̓аг̓а̀хал, іч qошіна̀хал ка̀ц̓qунеха, чубг̓ох ѐqунчеса, шелј к̓ефqу̀нбеса.

Sentence: 280     yoldašmuġoxol saganu ḳarq̇unxesa.
   Јолдашмуг̓охол сагану карqунхеса. --

Sentence: 281     bixaxo bineti xib e͑š:
   Бѵха̇хо бінет̓і хіб еш:

Sentence: 282     so zenḳ, so naġluḳalṭenḳ, soal imuxlaxalṭuġonḳ!
   со зенк, со нахлукалтенк, соал імухлахалтуг̓онк!

This text is part of the TITUS edition of Corpus of Published Udi Texts.

Copyright TITUS Project, Frankfurt a/M, 17.12.2016. No parts of this document may be republished in any form without prior permission by the copyright holder.