TITUS Texts: Corpus of Published Udi Texts

TITUS
Corpus of Published Udi Texts
Part No. 26

Part: 3_Religions
3_Religions

Page: 68
Sentence: 1     sa adamaren fikirrebsa te dünyani ṗa͑c̣c̣e xačparazne bu.
   Sa adamarèn fikՙìr-re-bsa tՙe düni̯anì pȧc՚c՚e xačpՙaràz-ne-bu.

Sentence: 2     "be͑ġen meṭoġo manoa šel!"
   "Bẹγen metoγò manòa śel!"

Sentence: 3     aizeri tanesa furupsan dünyani, xabaraq̇ane be͑ġen manoa šel.
   Ai̯zerì tՙànesa furupՙsàn düni̯anì, xabàraqane bẹγèn manòa śel.

Sentence: 4     tanesa, taci sa düzi be͑ġsane sa išu ḳoc̣bakene,
   Tՙànesa, tՙaci sa düzì bẹγsàne sa išù koc՚bakՙène,

Sentence: 5     ṭesa išenal bać̣anel cacne laexa,
   tesà išèn-al bač՚anèl càc-ne-laexà,

Sentence: 6     baneko te ṗa͑ araba cac lapi bakane,
   bànekՙo tՙe pȧ̱ arabà cac lapՙi bakՙàne,

Sentence: 7     ič bać̣an xurunebaksa, ṗuran exne "bapa!"
   ič bač՚àn xurùnebakՙsa, pùran èxne "bàpՙa!"

Sentence: 8     meno iśane taisa, exne:
   Menò iśà-ne tՙai̯sà, èxne:

Sentence: 9     "ef ḳoǯ maqan gureci, eḳanan besa, bać̣an ṗa͑ q̇atṭe baki, xurunebaki."
   "ef koǰ mà-qan gurecì, ekà-nan besà, bač՚àn pȧ̱-qatՙ-te bakՙì, xurùnebakՙi".

Sentence: 10     hame aiturġox pesxolan, saal ṭiane [69] be͑ġsa ye adamarux tene bu, ye cac.
   Hamè aitՙurγòx pՙesxolan, sà-al tìane [69] bẹγsà je adamarùx tՙe-ne bu, je cac.

Page: 69
Sentence: 11     mono tanesa melan, taci be͑ġsane sa kötiḳal ṗa͑c̣c̣e čüt ulaġq̇un ġać̣pe,
   Monò tՙànesa melàn, tՙacì bẹγsàne sa kՙötՙikàl pȧ̱c՚c՚e čütՙ ulàγ-qun γač՚pՙè,

Sentence: 12     amma kötiḳax teq̇o baksa tašes, kötiḳ ič ganu bitine;
   àmma kՙötՙikàx tՙèqobakՙsa tՙašès, kՙötՙìk ič ganù bìtՙine;

Sentence: 13     sa čüt ulaġen ṭećone zaṗexa, ṭesa čüten mećo, sa aiten har čüten sa ćone zaṗexa.
   sa čütՙ ulaγèn tèč՚o-ne zàpexa, tesà čütՙèn mèč՚o, sa ai̯tՙèn har čütՙèn sa č՚ò-ne zapexà.

Sentence: 14     me išen taci exne:
   Me išèn tՙaci exne:

Sentence: 15     "čurpanan, čurpanan, eḳanan besa?
   "čùrpՙanan, čùrpՙanan, ekà-nan besà?

Sentence: 16     ṗa͑c̣c̣e čütṭux ġać̣penan tašes teva baksa, šadbanan, zu kaṭux ṗa͑ čüten tasšo!"
   pȧ̱c՚c՚e čütՙtùx γač՚pՙènan tՙašes tՙe-wa-bakՙsa, šàdbanan, zu kՙatùx pȧ̱ čütՙèn tՙàsšo!"

Sentence: 17     šadq̇unbesa, meṭin ečeri sa čütṭux ġać̣nexa, sunṭuxal ičbeš, buṭuq̇sai te šor č̣iġane.
   Ṡàdqunbesa, metìn ečerì sa čütՙtùx γàč՚nexa, sùntuxal ič-beš, bùtuqsai̯ tՙe šor č՚ìγane.

Sentence: 18     sal ṭiane be͑ġsa te ye kötiḳ tene bu, ye ulaġ, ye adamarux, mono aq̇nesa te mono e älämäta?
   Sal tìa-ne bẹγsà tՙe je kՙötՙìk tՙèn-e bu, je ulàγ, je adamarùx, mono àqnesa tՙe monò e älämätՙa?

Sentence: 19     melan tanesa me išu, taci sa q̇oǯa išelle lamandesa, mac̣i ḳaǯuġon, ič kexal sa ḳobal tanesa.
   Melàn tՙànesa me išù, tՙacì sa qoǰà išèl-le lamandesà, mac՚ì kaǰuγòn, ič kՙèx-al sa kobàl tՙànesa.

Sentence: 20     q̇oǯa išen exne meṭux te: "man taisa?"
   Qoǰa išèn èxne metùx tՙe: "ma-n tՙai̯sa?"

Sentence: 21     meṭin ixṭilätṭebesa, exne ičul etärq̇un lamande cac laḳalo, kötiḳ tašalor.
   Metìn ixtilä̀tՙ-te-besa, exne ičùl etՙä̀r-qun lamandè cac lakàlo, kՙötՙìk tՙàšalor.

Sentence: 22     q̇oǯa išen exne:
   Qoǰà išèn èxne:

Sentence: 23     "ṭe caclaḳal unnu;
   "te cac-lakàl ùn-nu;

Sentence: 24     vi günäh gölövi, amma saḳial gölön q̇azamišbesa,
   vi günä̀h gölö-vi, àmma sàki-al gölö̀-n qazamìšbesa,

Sentence: 25     vi laxo cacnu lacesṭesa. exnu taġa be͑ġaz ši mässäba šel;
   vi-làxo càc-nu lacèstesà, èxnu tՙaγà-bẹγàz ši mässä̀ba śel;

Sentence: 26     ka ašen un vi laxo abuz günähnu q̇azamišbesa.
   kՙa ašèn un vi-làxo abùz günä̀h-nu qazamìšbesà.

Sentence: 27     ṭe kötiḳgena Xrisṭosne ṭe ṗa͑c̣c̣e čüt ulaġgena ṗa͑c̣c̣e xačparazne;
   Tՙe kՙötՙik-gená Xristòs-ne, te pȧ̱c՚c՚e čütՙ ulàγ-gená pȧ̱c՚c՚e xačpՙaràz-ne;

Sentence: 28     Xrisṭos tumne, bütünṭuġonal Xrisṭosaq̇un va͑baksa;
   Xristòs tՙùm-ne, bütՙüntuγòn-al Xristosà qun vȧbakՙsà;

Sentence: 29     šuḳalaal teṭubako pes te beš mässäb šelle; hakataral un.
   šukalà-al tՙètu-bakՙó pՙes tՙe beš mässä̀b śel-le; hakՙàtՙar-al un.

Sentence: 30     take eḳate vi mässäben bürmišnebsa, šeṭux tamba!"
   Tՙàkՙe ekàtՙe vi mässäbèn bürmìšnebsa, šetùx tՙàmba!"

Sentence: 31     hame aitaxte me qoǯa išen pesxolan, enex aḳesatene.
   Hamè ai̯tՙàxtՙe me qoǰa išèn pՙèsxolan, enèx akesa-tՙè-ne.

Sentence: 32     me išu melangär qainebaksa; taci ič mässäba šel qulluġnebsa.
   Me išù melangä̀r k̯ài̯nebakՙsa; tՙacì ič mässäbà śel qullùγnebsa.

This text is part of the TITUS edition of Corpus of Published Udi Texts.

Copyright TITUS Project, Frankfurt a/M, 17.12.2016. No parts of this document may be republished in any form without prior permission by the copyright holder.