TITUS
Otfrid von Weissenburg, Evangelienbuch
Part No. 6
Previous part

Chapter: 2  
p. 13r    

II. INVOCATIO SCRIPTORIS AD DEUM.


Verse: 1     Wola drúhtin mín,   \   já bin ih scálc thin,
Verse: 2     thiu arma múater min   \   eigan thíu ist si thin!
Verse: 3     Fíngar thínan   \   dua anan múnd minan,
Verse: 4     theni ouh hánt thina   \   in thia zúngun mina,
Verse: 5     Thaz ih lób thinaz   \   si lútentaz,
Verse: 6     giburt súnes thines,   \   drúhtines mines;
Verse: 7     Joh íh biginne rédinon,   \   wio ér bigonda brédigon,
Verse: 8     thaz íh giwar si hárto   \   thero sínero worto;
Verse: 9     Joh zéichan thiu er déda tho,   \   thes wir bírun nu so fró,
Verse: 10     joh wío thiu selba héili   \   nu ịst wórolti giméini;
Verse: 11     Thaz íh ouh hiar giscríbe   \   uns zi réhtemo líbe,


p. 13v    


Manuscript page: 13v 
Verse: 12     wio firdán er unsih fánd,   \   thọ er selbo tóthes ginand;
Verse: 13     Joh wíọ er fuar ouh thánne   \   ubar hímilạ alle,
Verse: 14     ubar súnnun lioht   \   joh állan thesan wóroltthiot;
Verse: 15     Thaz ih, drúhtin, thanne   \   in theru ságu ni firspírne,
Verse: 16     nóh in themo wáhen   \   thiu wórt ni missifáhen;
Verse: 17     Thaz ih ni scríbu thuruh rúam,   \   súntar bi thin lób duan,
Verse: 18     thaz mír iz iowanne   \   zi wíze nirgange.
Verse: 19     Ob iz zi thíu thoh gigéit   \   thúruh mina dúmpheit:
Verse: 20     thia súnta, druhtin, míno   \   ginádlicho dílo,
Verse: 21     Wanta (ih zéllu thir in wán)   \   iz nist bi bálawe gidan;
Verse: 22     joh íh iz ouh bimíde   \   bi nihéinigemo níde.
Verse: 23     Then wan zéll ih bi tház,   \   thaz hérza wéist thu filu báz;
Verse: 24     thoh iz búe innan mír,   \   ist harto kúndera thir.
Verse: 25     Bi thíu thu io, druhtin,   \   ginado fóllicho mín,
Verse: 26     húgi in mir mit kréfti   \   thera thínera giscefti!
Verse: 27     Hiar húgi mines wórtes,   \   tház thu iz harto háltes,
Verse: 28     gizáwa mo firlíhe   \   ginada thín, theiz thíhe;
Verse: 29     Ouh ther wídarwerto thín   \   ni quém er innan múat min,
Verse: 30     thaz ér mir hiar ni dérre,   \   ouh wíht mih ni gimérre!
Verse: 31     Únkust rumo sínu,   \   joh nah gináda thinu;
Verse: 32     irfírrit werde bálo sin,   \   thu drúhtin rihti wórt min!


p. 14r    


Manuscript page: 14r 
Verse: 33     Al gizúngilo, thaz íst --   \   thu drúhtin éin es alles bíst;
Verse: 34     wéltis thu thes líutes   \   joh alles wóroltthiotes.
Verse: 35     Mit thíneru giwélti   \   sie datị al spréchenti,
Verse: 36     joh sálida in gilúngun   \   thiu wórt in iro zúngun;
Verse: 37     Thaz síe thin io gihógetin,   \   in éwon iamer lóbotin,
Verse: 38     jóh sie thih irknátin   \   inti thíonost thinaz dátin.
Verse: 39     Sar thuzar théru menigi   \   scéithist thin githígini:
Verse: 40     so laz mih, drúhtin min,   \   mit druton thínen iamer sin!
Verse: 41     Joh theih thir híar nu ziaro   \   in mína zungun thíono
Verse: 42     (ouh in ál gizungi,   \   in thíu thaz ih iz kúnni),
Verse: 43     Thaz ih in hímilriche   \   thir, drúhtin, iamer líche,
Verse: 44     joh íamer frewe in ríhti   \   in thíneru gisihti
Verse: 45     Mit éngilon thínen:   \   thaz nist bi wérkon minen,
Verse: 46     suntar réhto in waru   \   bi thíneru ginadu.
Verse: 47     Thu hilfis ío mit krefti   \   theru thínera giscefti;
Verse: 48     dua húldi thino ubar míh,   \   thaz íh thanne iamer lóbo thih,
Verse: 49     Thaz íh ouh nu gisído thaz,   \   thaz mir es ío mer si thiu baz,
Verse: 50     theih thíonost thinaz fúlle,   \   wiht álles io ni wólle;
Verse: 51     Joh mír io hiar zi líbe   \   wiht álles io ni klíbe,
Verse: 52     ni si, drúhtin, thaz thin wíllọ ist,   \   thu io ginádiger bist.
Verse: 53     Thih bíttụ ih mines múates,   \   thaz mír quemẹ alles gúates


p. 14v    


Manuscript page: 14v 
Verse: 54     in éwon ginuagi,   \   joh zi drúton thinen fúagi;
Verse: 55     Thaz ih íamer, druhtin mín,   \   mit themo dróste megi sín,
Verse: 56     mit themo gúate ih frawo thár   \   mina daga intị ellu jár,
Verse: 57     Fon járe zi járe   \   ih íamer frawo tháre,
Verse: 58     fon éwon unz in éwon   \   mit then sáligen sélon!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.