TITUS
Otfrid von Weissenburg, Evangelienbuch
Part No. 7
Previous part

Chapter: 3  
p. 14v    

III. LIBER GENERATIONIS JESU CHRISTI FILII DAVID.


Verse: 1     Thiz sint búah frono:   \   sio zéigont filu scóno,
Verse: 2     uns zéllent sẹ ana bága   \   thie Kristes áltmaga.
Verse: 3     Zéllent sịẹ úns hiar filu frám,   \   wio sélbo er hera in wórolt quam,
Verse: 4     joh mihilo wúnni,   \   thaz sin ádalkunni.
Verse: 5     Ádam thero gómono   \   was manno éristo,
Verse: 6     áltfater márer,   \   fon drúhtine gidáner.
Verse: 7     Bi énterin wórolti   \   was er líut béranti;
Verse: 8     kúnni er io gibréitta,   \   unz Kríst sih uns yróugta.
Verse: 9     Ni was Noé, ih sagen thir éin,   \   in then thaz mínnista deil,
Verse: 10     fon themo thie líuti, thes was nót,   \   wúrtun avur gávarot,
Verse: 11     Ther thịạ árca sinen kíndon   \   ríhtạ in then úndon,
Verse: 12     thes wáges er sie wísta,   \   thera fréisun ouh irlósta.
Verse: 13     Sih Ábraham gigúatta   \   joh drúhtine ouh gilíubta,
Verse: 14     wántạ er was gihórsam;   \   bi thiu ist er giéret nu so frám.
Verse: 15     Thio búah duent unsih wísi,   \   er Kristes áltano sí,


p. 15r    


Manuscript page: 15r 
Verse: 16     joh zéllent uns ouh mári,   \   sin sún sin fáter wari:
Verse: 17     Thaz was Davíd, thero gomono éin,   \   ther zi kúninge giréim;
Verse: 18     er quam mit théganheiti   \   zi súlicheru gúati.
Verse: 19     Thaz lérta nan sin mílti,   \   thaz er súlih wurti,
Verse: 20     tház er ward githíuto   \   kúning thero líuto.
Verse: 21     Nist mán, thoh er wólle,   \   thaz gumisgị al gizélle,
Verse: 22     thoh sint thése noti   \   fúrista thera gúati.
Verse: 23     In thríu deil ana zuíval   \   so íst iz giscéidan,
Verse: 24     thaz édil in gibúrti   \   fon in wáhsenti:
Verse: 25     Thie hohun áltfatera   \   éntont anan kúninga,
Verse: 26     thiu thrítta zuahta thánana   \   thaz warun édilthegana.
Verse: 27     Thie warun wúrzelun   \   thera sáligun blúomun,
Verse: 28     múater thera márun,   \   thera gotes drútthiarnun.
Verse: 29     Húgi weih thir ságeti,   \   ni wis zi dúmpmuati,
Verse: 30     firním thesa léra,   \   so zéllụ ih thir es méra:
Verse: 31     Ih méinu sancta Máriun,   \   kúningin thia ríchun;
Verse: 32     sia ịst éngilo ménigi   \   in himile érenti.
Verse: 33     So wer sọ in érdriche   \   ouh sálida suache,
Verse: 34     irbíat er ira gúati   \   mihilo ótmuati.
Verse: 35     Fon ánagenge wórolti   \   unz anan íra ziti
Verse: 36     zéli thu thaz kúnni,   \   so ist éinlif stunton * sibini.


p. 15v    


Manuscript page: 15v 
Verse: 37     Iro dágo ward giwágo   \   fon alten wízagon,
Verse: 38     tház si ụns béran scolti   \   thér unsih gihéilti;
Verse: 39     Giwíhtan in éwon,   \   ginádot er uns then sélon
Verse: 40     joh állero wórolti;   \   so nu mánnilih ist séhenti.
Verse: 41     Sih, thaz héroti   \   theist imo thíomuati
Verse: 42     so wíto soso wórolt ist,   \   want er ther drúhtin ist;
Verse: 43     Er ist giwéltig filu frám   \   joh héra in worolt zị úns quam,
Verse: 44     wúntarlichen thíngon,   \   hera untar ménnisgon.
Verse: 45     Thaz wíll ih hiar gizéllen   \   gidríwen sinen állen,
Verse: 46     so wír nu hiar bigínnen,   \   worton frénkisgen.
Verse: 47     Thoh scríb ih hiar nu zi érist,   \   so ịn evangélion iz íst,
Verse: 48     wio gibóran ward ouh ér   \   Johánnes, thégan siner,
Verse: 49     Ther ímo ingegin gárota,   \   thaz wórolt missiwórahta,
Verse: 50     thie wega ríht er ịmo ubar ál,   \   so man héreren scal.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.