TITUS
Otfrid von Weissenburg, Evangelienbuch
Part No. 8
Previous part

Chapter: 4  
p. 15v    

IV. FUIT IN DIEBUS HERODIS REGIS SACERDOS NOMINE ZACHARIAS.


Verse: 1     In dágon eines kúninges,   \   joh hárto firdánes,
Verse: 2     was ein éwarto,   \   zi gúate sị er ginánto!
Verse: 3     Zi híun er mo quénun las,   \   so thár in lante sítu was;
Verse: 4     wanta warun thánne   \   thie biscofa éinkunne.
Verse: 5     Wárun siu béthu   \   góte filu drúdu
Verse: 6     joh íogiwar sínaz   \   gibot fúllentaz,


p. 16r    


Manuscript page: 16r 
Verse: 7     Wízzod sínan   \   ío wírkendan
Verse: 8     joh reht mínnonti   \   ana méindati.
Verse: 9     Únbera was thiu quéna   \   kindo zéizero;
Verse: 10     so wárun se unzan élti   \   thaz lib léitendi.
Verse: 11     Zít ward tho giréisot,   \   thaz er gíangi furi gót;
Verse: 12     ópphoron er scólta   \   bi thie síno súnta,
Verse: 13     Zi góte ouh thanne thígiti,   \   thaz er giscówoti
Verse: 14     then líut ther gináda   \   tharuze béitota.
Verse: 15     Thiu hériscaf thes líutes   \   stuant thar úzwertes,
Verse: 16     sie wárun iro hénti   \   zi gote héffenti;
Verse: 17     Sinerọ éregrehti   \   warun thíggenti,
Verse: 18     tház er ouh gihórti   \   thaz ther éwarto bati.
Verse: 19     Íngiang er tho skíoro,   \   góldo garo zíero,
Verse: 20     mit zínseru in hénti   \   thaz hus róuhenti.
Verse: 21     Thár gisah er stántan   \   gótes boton sconan;
Verse: 22     zi thes álteres zésawi   \   was sin béitonti.
Verse: 23     Híntarquam tho hárto   \   ther gotes éwarto,
Verse: 24     intríat er thaz gisíuni,   \   want íz was filu scóni;
Verse: 25     Er irbléicheta,   \   joh fárawun er wánta.
Verse: 26     ther éngil imo zúasprah,   \   tho er nan scíuhen gisah:
Verse: 27     "Ni fórihti thir, bíscof,   \   ih ni térru thir drof;
Verse: 28     wanta ist gibét thinaz   \   fon drúhtine gihórtaz,


p. 16v    


Manuscript page: 16v 
Verse: 29     Joh áltquéna thinu   \   ist thir kínd berantu,
Verse: 30     sun filu zéizan;   \   Johánnes scal er héizan.
Verse: 31     Er ist thir hérzblidi,   \   ouh wírdit filu mári;
Verse: 32     ist síneru gibúrti   \   sih worolt méndenti.
Verse: 33     Gúati so ịst er hóher   \   joh góte filu líuber;
Verse: 34     íst er ouh fon júgendi   \   filu fástenti.
Verse: 35     Ni fúllit er sih wínes,   \   ouh lídes nihéines;
Verse: 36     fon réve thera múater   \   so íst er io giwíhter;
Verse: 37     Fílu thesses líutes   \   in abuh írrentes
Verse: 38     ist er zi gótes henti   \   wola chérenti.
Verse: 39     Er férit fora Kríste   \   mit sélbomo géiste,
Verse: 40     then ju in áltworolti   \   Helías was ouh hábenti.
Verse: 41     Gikérit er scóno   \   thaz herza fórdrono
Verse: 42     in kindọ ínbrusti   \   zi gotes ánalusti;
Verse: 43     Thie ungilóubige   \   gekérit er zi líbe,
Verse: 44     thie dúmbon duat ouh thánne   \   zi wísemo manne;
Verse: 45     Zi thíu thaz er gigárawe   \   thie liuti wírdige,
Verse: 46     selb drúhtine   \   stráza zi drétanne."
Verse: 47     Thó sprah ther bíscof,   \   harto fóraht er mo thoh,
Verse: 48     ni was imọ ánawani   \   thaz árunti sconi:
Verse: 49     "Chúmig bin ih járo   \   ju filu mánegero,


p. 17r    


Manuscript page: 17r 
Verse: 50     joh thiu quéna minu   \   ist kinthes úrminnu.
Verse: 51     Uns sint kínd zi béranne   \   ju dága furifárane;
Verse: 52     áltduam suáraz   \   duit uns iz úrwanaz.
Verse: 53     Iz hábet ubarstígana   \   in uns júgund mánaga,
Verse: 54     ni gíbit uns thaz álta,   \   thaz thiu júgund scolta.
Verse: 55     Wio meg ih wízzan thanne,   \   thaz uns kínd werde?
Verse: 56     int uns íst iz in ther élti   \   binóman unz in énti."
Verse: 57     Sprah ther gótes boto thó,   \   ni thoh irbólgono,
Verse: 58     was er mo avur ságenti   \   thaz selba árunti:
Verse: 59     "Íh bin ein thero síbino,   \   thero gotes drútbotono,
Verse: 60     thie ịn síneru gisíhti   \   sint io stántenti,
Verse: 61     Thi er héra in worolt séntit,   \   thann er kráft wirkit,
Verse: 62     joh wérk filu hébigu   \   ist iru kúndentu.
Verse: 63     Sánt er mih fon hímile,   \   thiz sélba thir zi ságanne,
Verse: 64     fon hímilriches hóhi,   \   theih thir iz wís dati.
Verse: 65     Nu thu thaz árunti   \   so hárto bist formónanti:
Verse: 66     nu wird thu stúmmer sar,   \   unz thú ịz gisehes álawar;
Verse: 67     Wanta thu ábahonti   \   bist gotes árunti,
Verse: 68     int óuh thaz bist fyrságenti   \   thaz sélbo got ist gébenti.
Verse: 69     Iz wírdit thoh irfúllit,   \   so got gisázta thia zít;
Verse: 70     unz tház tharbe hárto   \   thero thínero wórto."


p. 17v    


Manuscript page: 17v 
Verse: 71     Úze stuant ther líut thar,   \   wás sie filu wúntar,
Verse: 72     ziu ther éwarto   \   duáleti so hárto;
Verse: 73     Gibetes ántfangi   \   fon góte ni giságeti,
Verse: 74     mit síneru hénti   \   sie ouh wari wíhenti.
Verse: 75     Gíang er uz tho spáto,   \   híntarqueman thráto;
Verse: 76     theru spráhạ er bilémit was,   \   want er gilóubig ni was.
Verse: 77     Tho was er bóuhnenti,   \   nales spréchenti,
Verse: 78     thaz ménigi thes líutes   \   fuari héimortes.
Verse: 79     Sie fuarun drúrenti   \   joh ouh tho áhtonti,
Verse: 80     want er wíht zin ni spráh,   \   thaz er thar wúntar gisah.
Verse: 81     Thes ópheres zíti   \   warun éntonti,
Verse: 82     fúar er ouh tho sáre   \   zi sínemo gifúare.
Verse: 83     Thera spráha mórnenti,   \   thes wánes was sih fréwenti;
Verse: 84     gilóubt er filu spáto,   \   bi thiu béitota er so nóto.
Verse: 85     Thiu quena sun was drágenti   \   jóh sih harto scámenti,
Verse: 86     tház siu scolta in élti   \   mit kínde gan in hénti.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.