TITUS
Otfrid von Weissenburg, Evangelienbuch
Part No. 9
Previous part

Chapter: 5  
p. 17v    

V. MISSUS EST GABRIHEL ANGELUS.


Verse: 1     Ward áfter thiu irscrítan sár,   \   so móht es sin, ein halb jár,
Verse: 2     mánodo after ríme   \   thría stunta zuéne;
Verse: 3     Tho quam bóto fona góte,   \   éngil ir hímile,
Verse: 4     bráht er therera wórolti   \   diuri árunti.


p. 18r    


Manuscript page: 18r 
Verse: 5     Floug er súnnun pad,   \   stérrono stráza,
Verse: 6     wega wólkono   \   zi theru ítis frono;
Verse: 7     Zị édiles fróuun,   \   sélbun sancta Máriun,
Verse: 8     thie fórdoron bi bárne   \   warun chúningạ alle.
Verse: 9     Gíang er in thia pálinza,   \   fand sia drúrenta,
Verse: 10     mit sálteru in hénti,   \   then sáng sị unz in énti;
Verse: 11     Wáhero dúacho   \   werk wírkento
Verse: 12     díurero gárno,   \   thaz déda siụ io gérno.
Verse: 13     Tho sprach er érlicho ubar ál,   \   so man zi frówun scal,
Verse: 14     so bóto scal io gúater,   \   zi drúhtines muater:
Verse: 15     "Heil mágad zieri,   \   thíarna so scóni,
Verse: 16     állero wíbo   \   gote zéizosto!
Verse: 17     Ni brútti thih múates,   \   noh thines ánluzzes
Verse: 18     fárawa ni wenti;   \   fol bistu gótes ensti!
Verse: 19     Fórosagon súngun   \   fon thir sáligun,
Verse: 20     wárun sẹ allo wórolti   \   zi thir zéigonti.
Verse: 21     Gímma thiu wíza,   \   magad scínenta,
Verse: 22     múater thiu díura   \   scált thu wesan éina.
Verse: 23     Thú scalt beran éinan   \   alawáltendan
Verse: 24     érdun joh hímiles   \   int alles líphaftes,
Verse: 25     Scépheri wórolti   \   (theist min árunti),


p. 18v    


Manuscript page: 18v 
Verse: 26     fátere gibóranan   \   ebanéwigan.
Verse: 27     Got gíbit imo wíha   \   joh éra filu hóha
Verse: 28     (drof ni zuívolo thu thés),   \   Davídes sez thes kúninges.
Verse: 29     Er ríchisot githíuto   \   kúning therero líuto;
Verse: 30     (thaz steit in gótes henti)   \   ána theheinig énti.
Verse: 31     Állera wórolti   \   ist er líb gebenti,
Verse: 32     tház er ouh inspérre   \   hímilrichi mánne."
Verse: 33     Thiu thíarna filu scóno   \   sprah zi bóten frono,
Verse: 34     gab si ịmo ántwurti   \   mit súazera giwurti:
Verse: 35     "Wánanạ ist iz, fró min,   \   thaz ih es wírdig bin,
Verse: 36     thaz ih drúhtine   \   sinan sún souge?
Verse: 37     Wio meg iz ío werdan wár,   \   thaz ih werde suángar?
Verse: 38     mih io gómman nihein   \   in min múat ni biréin.
Verse: 39     Háben ih giméinit,   \   in múate bicléibit,
Verse: 40     thaz ih éinluzzo   \   mina wórolt nuzzo."
Verse: 41     Zị iru spráh tho ubarlút   \   ther selbo drúhtines drút
Verse: 42     árunti gáhaz   \   joh hárto filu wáhaz:
Verse: 43     "Ih scál thir sagen, thíarna,   \   rácha filu dóugna,
Verse: 44     sálida ist in éwu   \   mit thíneru sélu.
Verse: 45     Ságen ih thir éinaz:   \   thaz selba kínd thinaz
Verse: 46     héizzit iz scóno   \   gótes sún frono.


p. 19r    


Manuscript page: 19r 
Verse: 47     Ist sédal sínaz   \   in hímile gistátaz;
Verse: 48     kúning nist in wórolti,   \   ni si imo thíononti;
Verse: 49     Noh kéisor untar mánne,   \   nị imo géba bringe
Verse: 50     fuazfállonti   \   int inan érenti.
Verse: 51     Ér scal sinen drúton   \   thráto gimúnton,
Verse: 52     then alten sátanasan   \   wílit er gifáhan.
Verse: 53     Nist in érdriche   \   thár er imọ ío instríche,
Verse: 54     noh wínkil untar hímile   \   thár er sih ginérie.
Verse: 55     Flíuhit er in then sé,   \   thar gidúat er ịmo wé,
Verse: 56     gidúat er imo frémidi   \   thaz hoha hímilrichi.
Verse: 57     Thoh hábet er mo ịrdéilit   \   joh sélbo giméinit,
Verse: 58     tház er nan in béche   \   mit kétinu zibréche.
Verse: 59     Ist éin thin gisíbba   \   reves úmberenta,
Verse: 60     jú mánageru zíti   \   ist daga léitenti;
Verse: 61     Nust siu gibúrdinot thes   \   kindes so díures,
Verse: 62     so fúrira bi wórolti   \   nist quéna berenti.
Verse: 63     Nist wíht suntar wérde,   \   in thiu ịz gót wolle;
Verse: 64     nóh thaz widarstánte   \   drúhtines wórte."
Verse: 65     "Íh bin", quad si, "gótes thiu   \   zerbe gibóraniu;
Verse: 66     si wort sínaz   \   in mir wáhsentaz!"
Verse: 67     Wolagạ ótmuati,   \   so gúat bistu io in nóti;


p. 19v    


Manuscript page: 19v 
Verse: 68     thu wári in ira wórte   \   zi follemo ántwurte.
Verse: 69     Drúhtin kos sia gúater   \   zi éigeneru múater;
Verse: 70     si quad, si wári sin thíu   \   zi thíonoste gárawu.
Verse: 71     Éngil floug zi hímile   \   zi selb drúhtine;
Verse: 72     ságatạ er in fróno   \   thaz árunti scóno.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.