TITUS
Otfrid von Weissenburg, Evangelienbuch
Part No. 11
Previous part

Chapter: 7  
p. 20r    

VII. DE CANTICO SANCTAE MARIAE.


Verse: 1     Thó sprah sancta Mária   \   thaz siu zi húge hábeta;
Verse: 2     si was sih blídenti   \   bi thaz árunti.
Verse: 3     "Nu scal géist miner,   \   mit sélu gifúagter,
Verse: 4     mit lidin líchamen   \   drúhtinan díuren.
Verse: 5     Ih frawon drúhtine   \   alle dága mine,
Verse: 6     fréw ih mih in múate   \   gote héilante;
Verse: 7     Want er ótmuati   \   in mir was scówonti;
Verse: 8     nu sáligont mih álle,   \   wórolt io bi mánne.
Verse: 9     Máhtig drúhtin,   \   wih námo siner;
Verse: 10     det er wérk maru   \   in mir ármeru.
Verse: 11     Fon ánagenge wórolti   \   ist er ginádonti,
Verse: 12     fon kúnne zi kúnne,   \   in thíu man nan erkénne.
Verse: 13     Dét er mit giwélti   \   síneru hénti,
Verse: 14     thaz er úbarmuati   \   giscíad fon ther gúati;
Verse: 15     Fona hóhsedale   \   zistíaz er thie ríche,
Verse: 16     gisídalt er in hímile   \   thie ótmúatige.
Verse: 17     Thie húngorogun múadon   \   gilábot er in éwon;


p. 20v    


Manuscript page: 20v 
Verse: 18     thie ódegun álle   \   firliaz er ítale.
Verse: 19     Nú intfiang drúhtin   \   drutlíut sinan,
Verse: 20     nu wílit er ginádon   \   then unsen áltmagon.
Verse: 21     Tház er allo wórolti   \   zị ín was spréchenti,
Verse: 22     joh ío gihéizenti,   \   nu hábent sie ịz in hénti."
Verse: 23     Was sịụ áfter thiu mit íru sar   \   thri mánodo thár;
Verse: 24     so fúar si zị iro sélidon   \   mit allen sálidon.
Verse: 25     Nu férgomes thia thíarnun,   \   sélbun sancta Máriun,
Verse: 26     thaz sí uns allo wórolti   \   si zị iru súne wegonti.
Verse: 27     Johannes drúhtines drut   \   wílit es bithíhan,
Verse: 28     tház er uns firdánen   \   giwérdo ginádon.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.