TITUS
Otfrid von Weissenburg, Evangelienbuch
Part No. 12
Previous part

Chapter: 8  
p. 20v    

VIII. CUM ESSET DESPONSATA MATER JESU.


Verse: 1     Ther mán theih noh ni ságeta,   \   ther thaz wíb mahalta --
Verse: 2     was ímo iz harto úngimah,   \   tho er sa háfta gisah.
Verse: 3     Ih ságen thir in war mín,   \   sí ni mohta inbéran sin
Verse: 4     in flúhti joh in zúhti,   \   theiz álles wesan móhti;
Verse: 5     Ouh sọ iz zi thísu wurti,   \   iz díufal ni bifúnti;
Verse: 6     joh thiu rácha sus gidán   \   nam thes húares thana wán.
Verse: 7     Ér sia érlicho zóh,   \   in Aegýptum miti flóh
Verse: 8     joh bráhta sạ afur thánne   \   zi themo ira héiminge.
Verse: 9     Gidar ih lóbon inan frám;   \   er was súlih, sọ er gizám,


p. 21r    


Manuscript page: 21r 
Verse: 10     er was in sítin frúater   \   joh héilag inti gúater.
Verse: 11     Iz was imo úngimuati   \   thúruh sino gúati,
Verse: 12     joh tháhta, iz imo sázi,   \   ób er sia firlíazi;
Verse: 13     Er tháhta imọ ouh in gáhi   \   thia mánagfaltun wíhi,
Verse: 14     joh thia hóhun wirdi;   \   ni wólta thaz iz wúrdi.
Verse: 15     Er nam góuma líbes   \   thes héilegen wíbes
Verse: 16     joh híntarquam bi nóti   \   thera míhilun gúati;
Verse: 17     Tháht er bi thia gúati,   \   er sih fon íru dati,
Verse: 18     joh theiz gidóugno wurti,   \   er síh fon iru irfírti.
Verse: 19     Unz er thára thahta,   \   ther éngil imo náhta,
Verse: 20     kúndt er imo in droume,   \   er thes wíbes wola góume.
Verse: 21     Ér quad, thes ni tháhti,   \   ni ér sih iru náhti;
Verse: 22     joh thárazua ouh hógeti,   \   mit thíonostụ iru fágoti.
Verse: 23     Quad, állaz thaz gizámi   \   fon selben góte quami;
Verse: 24     "joh ther héilogo géist --   \   fon imo wéhsit iz meist.
Verse: 25     Si birit sún zeizan,   \   ther ófto ist iu gihéizan;
Verse: 26     thie búah fon imo síngent,   \   wioz fórasagon zéllent.
Verse: 27     Er gihéilit thiz lant,   \   héiz inan ouh héilant;
Verse: 28     gihéilit thiu sin gúati   \   allo wóroltliuti."


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.