TITUS
Otfrid von Weissenburg, Evangelienbuch
Part No. 14
Previous part

Chapter: 10  
p. 22r    

X. CANTICUM ZACHARIAE.


Verse: 1     Tho ward ther fáter alter   \   gótes wihi irfúlter,
Verse: 2     spráh er thaz uns thịẹ áltun   \   fórasagon záltun.


p. 22v    


Manuscript page: 22v 
Verse: 3     "Si drúhtin got gidíurto   \   therero lántliuto,
Verse: 4     ther únsih irlósta   \   joh selbo wísota.
Verse: 5     Zị uns ríht er horn héiles,   \   nales féhtannes,
Verse: 6     in kúnnẹ eines kúninges,   \   sines drúttheganes,
Verse: 7     Sós er thuruh álle   \   thie fórasagon síne
Verse: 8     theru góregun wórolti   \   was io gihéizenti.
Verse: 9     Ríht er zị uns ouh héilant,   \   thaz únsih midi fíant,
Verse: 10     joh álle thie líuti,   \   thie sint unser áhtenti.
Verse: 11     Nu wílit er ginádon   \   then unsen áltmagon,
Verse: 12     gihúgit thaz er hér iz liaz,   \   thaz er in ófto gihiaz;
Verse: 13     Sos ér gihiaz ju wánne   \   themo drútmanne,
Verse: 14     thaz ér uns sin gisíuni   \   in líchamen gábi;
Verse: 15     Tház wir so gidróste,   \   fon fíanton irlóste,
Verse: 16     únfórahtenti   \   sin imo thíononti
Verse: 17     In wíhi intị in ríhti   \   fora síneru gisíhti
Verse: 18     álle dagafrísti,   \   thị er úns ist líhenti.
Verse: 19     Int ih scál thir sagen, chínd min:   \   thu bist fórasago sín,
Verse: 20     thu scalt drúhtine   \   rihten wéga sine;
Verse: 21     Thaz wízin these líuti,   \   thaz er ist héil gebenti,
Verse: 22     inti sẹ ouh irwénte   \   fon díufeles gibénte
Verse: 23     (Gináda sino wárun,   \   thaz wír nan harto rúwun,


p. 23r    


Manuscript page: 23r 
Verse: 24     bi thiu íst er selbọ in nóti   \   nu unser wísonti);
Verse: 25     Mit dróstu ouh thie gispréche,   \   thie sízzent innan béche,
Verse: 26     únse fuazi ouh ríhte   \   in síne wega réhte."
Verse: 27     Wúahs thaz kind in édili   \   mit gote thíhenti,
Verse: 28     joh fástota io zi nóte   \   in waldes éinote.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.