TITUS
Otfrid von Weissenburg, Evangelienbuch
Part No. 15
Previous part

Chapter: 11  
p. 23r    

XI. EXIIT EDICTUM A CAESARE AUGUSTO.


Verse: 1     Wúntar ward tho máraz   \   joh filu séltsanaz,
Verse: 2     gibót iz ouh zi wáru   \   ther kéisor fona Rúmu.
Verse: 3     Sánt er filu wise   \   selbes bóton sine,
Verse: 4     so wíto sosọ in wórolti   \   man wári búenti;
Verse: 5     Thaz siẹ érdrichi záltin,   \   ouh wíht es io nirduáltin,
Verse: 6     in bríaf iz al ginámin   \   int imọ es zálạ irgábin.
Verse: 7     "Thaz si gómmán joh wíb   \   (in thíu se wóllen haben líb,
Verse: 8     in thíu se tház gilíezen,   \   thaz sẹ érdrihes níezen),
Verse: 9     Júnger joh álter --   \   tharána si er gizálter;
Verse: 10     ni si mán nihein so véigi,   \   ni sinan zíns eigi
Verse: 11     Héime", quad, "zi wáre,   \   zi sinemo áltgilare,
Verse: 12     so wíto so gisíge   \   ther himil ínnan then se;
Verse: 13     Búrg nist thes wénke,   \   noh bárn thes io githénke
Verse: 14     (in félde noh in wálde),   \   thaz es ío irbálde.
Verse: 15     Ellu wóroltenti   \   zi míneru henti,


p. 23v    


Manuscript page: 23v 
Verse: 16     so wár man sehẹ in waron   \   stérron odo mánon,
Verse: 17     So wara sọ in érdente   \   súnna sih biwénte --
Verse: 18     al sit iz bríeventi   \   zi míneru henti!"
Verse: 19     Tho fuarun líuti thuruh nót,   \   so ther kéisor gibot,
Verse: 20     zị éigenemo lánte   \   filu suórgente;
Verse: 21     Ouh wídorot ni wántin,   \   er siro zíns gultin,
Verse: 22     zi nóti thar man wésti   \   thero fórdorono vésti.
Verse: 23     Ein búrg ist thar in lánte,   \   thar warun ío ginánte
Verse: 24     hús inti wénti   \   zị édilingo hénti.
Verse: 25     Bi thíu ward thị ih nu ságeta,   \   thaz Jóseph sih irbúrita;
Verse: 26     zi théru steti fúart er   \   thia drúhtines múater;
Verse: 27     Want irạ ánon warun thánana   \   gotes drútthegana,
Verse: 28     fórdoron alte,   \   zi sálidon gizálte.
Verse: 29     Unz síu tho thar gistúltun,   \   thio zíti sih irvúltun,
Verse: 30     thaz si chínd bari   \   zi woraltị éinmari.
Verse: 31     Sún bar si tho zéizan,   \   ther wás uns io gihéizan;
Verse: 32     sin wás man allo wórolti   \   zi gote wúnsgenti.
Verse: 33     Wár sinan gibádoti   \   joh wár sinan gilégiti --
Verse: 34     ni wánu thaz sị iz wéssi   \   bi theru gástwissi.
Verse: 35     Biwánt sinan thoh tháre   \   mit * láhonon sáre,
Verse: 36     in thia kríppha sinan légita   \   bi nóte thih nu ságeta.


p. 24r    


Manuscript page: 24r 
Verse: 37     Tho bót si mit gilústi   \   thio kíndisgun brústi;
Verse: 38     ni méid sih, suntar sịe óugti,   \   then gotes sún sougti.
Verse: 39     Wóla ward thio brústi,   \   thio Kríst io gikústi,
Verse: 40     joh múater thiu nan quátta   \   inti émmizigen thágta;
Verse: 41     Wóla thiu nan túzta   \   intị in ira bárm sazta,
Verse: 42     scóno nan insuébita   \   inti bị íru nan gilégita!
Verse: 43     Sálig thiu nan wátta   \   int inan fándota,
Verse: 44     joh thiu in bétte ligit ínne   \   mit súlichemo kínde;
Verse: 45     Sálig thiu nan wérita,   \   than imo fróst derita;
Verse: 46     árma joh hénti   \   inan hélsenti!
Verse: 47     Er nist in érdringe   \   ther ira lób irsinge,
Verse: 48     noh mán io so gimúati,   \   ther irzéllẹ ira gúati;
Verse: 49     Dág inan ni rínit,   \   ouh súnna ni biscínit,
Verse: 50     ther iz ío bibringe,   \   thóh er es biginne!
Verse: 51     Wanta ira sún guato   \   díurit sia gimúato,
Verse: 52     ist ira lób joh giwáht,   \   thaz thu ịrrímen ni máht;
Verse: 53     Múater ist si máru,   \   joh thíarna thoh zi wáru,
Verse: 54     si bar uns thúruhnahtin   \   then hímilisgon drúhtin.
Verse: 55     Mystice. Drúhtin queman wólta,   \   tho man alla wórolt zalta,
Verse: 56     thaz wír sin al gilíche   \   gibriefte in hímilriche.
Verse: 57     In kríppha man nan légita,   \   thar man thaz fíhu nerita,


p. 24v    


Manuscript page: 24v 
Verse: 58     want er wílit unsih scówon   \   zí then éwinigen góumon.
Verse: 59     Ni wari thó thiu giburt,   \   tho wurti wórolti firwúrt;
Verse: 60     sia sátanas ginámi,   \   ób er tho ni quámi.
Verse: 61     Wir wárun in gibéntin,   \   in wídarwerten héntin;
Verse: 62     thụ uns hélpha, druhtin, dáti   \   ze thero óberostun noti!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.