TITUS
Otfrid von Weissenburg, Evangelienbuch
Part No. 16
Previous part

Chapter: 12  
p. 24v    

XII. ET PASTORES ERANT IN REGIONE EADEM.


Verse: 1     Tho wárun thar in lánte   \   hirta háltente,
Verse: 2     thes féhes datun wárta   \   widar fíanta.
Verse: 3     Zị ín quam bóto sconi,   \   engil scínenti,
Verse: 4     joh wúrtun sie inlíuhte   \   fon hímilisgen líahte.
Verse: 5     Fórahtun sịẹ in tho gáhun,   \   so sinan ánasahun,
Verse: 6     joh híntarquamun hárto   \   thes gotes bóten worto.
Verse: 7     Sprah ther gótes boto sár:   \   "ih scal iu sagen wúntar;
Verse: 8     iu scal sin fon góte heil,   \   nales fórahta nihéin.
Verse: 9     Ih scál iu sagen ímbot,   \   gibot ther hímilisgo got,
Verse: 10     ouh níst ther er gihórti   \   so fronisg árunti.
Verse: 11     Thes wirdit wórolt sinu   \   zị éwidon blídu,
Verse: 12     joh ál giscaft thiu in wórolti   \   thesạ érdun ist ouh drétenti.
Verse: 13     Níuwiboran habet thiz lánt   \   then hímilisgon héilant,
Verse: 14     theist drúhtin Krist gúater,   \   fon júngeru múater
Verse: 15     In Béthlem -- thiue kúninga,   \   thie wárun alle thánana;
Verse: 16     fon ín ward ouh gibóraniu   \   sin múater, magad scóniu.


p. 25r    


Manuscript page: 25r 
Verse: 17     Ságen ih iu, gúate man,   \   wio ír nan sculut fíndan,
Verse: 18     zéichan ouh gizámi   \   thuruh thaz séltsani.
Verse: 19     Zi theru búrgi faret hínana,   \   ir fíndet, sọ ih iu ságeta,
Verse: 20     kínd níwiboranaz,   \   in krípphun gilégitaz."
Verse: 21     Thó quam, unz er zi ín tho sprah,   \   éngilo hériscaf,
Verse: 22     hímilisgu ménigi,   \   sus alle síngenti:
Verse: 23     In hímilriches hóhi   \   si gote gúallichi,
Verse: 24     si in érdu fridu ouh állen,   \   thie fól sin guates wíllen!
Verse: 25     Mystice. Sie kúndtun uns thia frúma frúa   \   joh lértun ouh thar sáng zua;
Verse: 26     in hérzen hugi thụ ínne,   \   wáz thaz fers sínge:
Verse: 27     Ni láz thir innan thina brúst   \   arges wíllen gilúst,
Verse: 28     thaz er fon thír nirstríche   \   then fridu in hímilriche.
Verse: 29     Wir sculun úaben thaz sáng,   \   theist scóni gotes ántfang,
Verse: 30     wantạ éngila uns zi bílide   \   bráhtun iz fon hímile.
Verse: 31     Bíscof ther sih wáchorot   \   ubar krístinaz thíot,
Verse: 32     ther íst ouh wirdig scónes   \   éngilo gisíunes.
Verse: 33     Thịẹ éngila zi hímile   \   flugun síngente
Verse: 34     in gisíht frono;   \   thar zámun se scono.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.