TITUS
Otfrid von Weissenburg, Evangelienbuch
Part No. 17
Previous part

Chapter: 13  
p. 25r    

XIII. PASTORES LOQUEBANTUR AD INVICEM.


Verse: 1     Spráchun tho thie hírta,   \   thie selbun féhewarta
Verse: 2     (sie áhtotun thaz ímbot,   \   thiu selbun éngiles wort):


p. 25v    


Manuscript page: 25v 
Verse: 3     "Ílemes nu álle   \   zi themo kástelle,
Verse: 4     thaz wír ouh mit then gówon   \   thaz gotes wórt scowon,
Verse: 5     Thaz drúhtin dúan wolta   \   int iz hérạ in worolt sánta;
Verse: 6     ja óugtạ uns zi érist thaz gibót   \   ther ginádigo got."
Verse: 7     Tho fuarun sịẹ ílenti   \   joh filu gáhonti;
Verse: 8     irhúabun sie sih fílu frua,   \   sie thahtun hárto tharzua.
Verse: 9     So sie tho thára quamun,   \   thia múater gisáhun,
Verse: 10     in ira bárm si sazta   \   barno bézista;
Verse: 11     Joh ther siu thára fuarta,   \   thar íro zueio húatta;
Verse: 12     thaz scólta sin bi nóti,   \   thaz er in thíonoti.
Verse: 13     Gisáhun sie thaz wórt thar   \   joh irkántun iz sar,
Verse: 14     thaz thịẹ éngila in iróugtun,   \   thar sie thes féhes goumtun.
Verse: 15     Álle thie ịz gihórtun,   \   hárto sie iz intríetun,
Verse: 16     joh fórahtun mér ouh habetun,   \   so thie hírta thiz giságetun.
Verse: 17     Thiu múater barg mit fésti   \   thiu wórt in iru brústi,
Verse: 18     in hérzen mit githáhti   \   thiz ébonọ áhtonti,
Verse: 19     Wio thiu wórt hiar gágantin,   \   thiu er fórasagon ságetin,
Verse: 20     joh thíz al mit gizámi   \   ouh thárazua biquámi.
Verse: 21     Fúarun sar thes sínthes   \   thie hirta héimortes,
Verse: 22     thero wárono worto   \   blídtun sie sih hárto.
Verse: 23     Sie ịz állaz thar irkántun,   \   so thịẹ éngila in gizáltun,


p. 26r    


Manuscript page: 26r 
Verse: 24     thes lóbotun sie iogilicho   \   drúhtin gúallicho.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.