TITUS
Otfrid von Weissenburg, Evangelienbuch
Part No. 18
Previous part

Chapter: 14  
p. 26r    

XIV. DE CIRCUMCISIONE PUERI ET DE PURGATIONE SANCTAE MARIAE.


Verse: 1     So ther ántdag sih tho óugta,   \   thaz siu thaz kínd sougta,
Verse: 2     tho scóltun siu mit wíllen   \   then wízod irfúllen,
Verse: 3     Then sítu ouh then io thie áltun   \   fórdoron irvúltun;
Verse: 4     thes namen wéstun sịẹ ouh giwánt,   \   híazun inan héilant,
Verse: 5     So ther éngil iz gizálta   \   int in iz zéigota,
Verse: 6     er sí zi theru gibúrti   \   thes kindes háft wurti.
Verse: 7     Ist wóla so giméinit,   \   wanta er then líut heilit;
Verse: 8     ther engil kúndt iz er tho sár,   \   joh gispúnot ist ther námo thar.
Verse: 9     Wízzod thero líuto   \   gibót in filu nóto
Verse: 10     (thaz wír ouh nu mit wíllen   \   io émmizigen fúllen),
Verse: 11     So welih wíb so wari   \   thaz thégankind gibári,
Verse: 12     thaz sị únreini thera gibúrti   \   fíarzug dago wurti;
Verse: 13     Sih ínnan thes inthábeti,   \   in themo gótes hus ni bétoti;
Verse: 14     after thíu thanne sár   \   gióugti thaz kínd thar;
Verse: 15     Tház kind ouh thaz wurti   \   fon gómmannes gibúrti;
Verse: 16     bi thíu ni drafun thárasun   \   thiu thíarna noh ther íra sun.
Verse: 17     Si quám thoh so si scólta,   \   so ther wízzod iz gizálta,
Verse: 18     so thia fárt iru ni wéritun   \   thia dága thie wir nu ságetun.


p. 26v    


Manuscript page: 26v 
Verse: 19     Siu fúarun fon theru búrg úz   \   zi themo drúhtines hús,
Verse: 20     thes gibótes siu githáhtun,   \   thaz kind ouh thára brahtun;
Verse: 21     Wánta was iz thégankind,   \   thes wibes érista kind
Verse: 22     (ih scál iu sagen wúntar):   \   iz was gótes suntar;
Verse: 23     Thaz síu ouh furi thaz kínd sar   \   ópphorotin góte thar,
Verse: 24     so ther wízzod hiaz iz máchon,   \   zua dúbono gimáchon.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.