TITUS
Otfrid von Weissenburg, Evangelienbuch
Part No. 20
Previous part

Chapter: 16  
p. 27v    

XVI. DE ANNA PROPHETISSA.


Verse: 1     Ánna hiaz ein wíb thar,   \   si thíonota thar mánag jar,
Verse: 2     ált was si járo   \   ju filu mánegero.
Verse: 3     Si was fórasagin gúat,   \   zi gote ríhta sị iru múat,
Verse: 4     wítua gimúati   \   gihíalt si fram thio gúati.
Verse: 5     Sid si thárben bigan   \   thes líobes zị iro gómman,


p. 28r    


Manuscript page: 28r 
Verse: 6     so hábeta sị in githáhti,   \   war si then dróst suahti.
Verse: 7     Zi themo gotes hús fuar si sár,   \   joh léita si ira dága thar,
Verse: 8     kúmta thár thaz ira sér,   \   ni ruahta gómmannes mér;
Verse: 9     Déta si tho then githánc   \   zi gotes thíonoste ana wánc
Verse: 10     joh thíonota íogilícho   \   thar gote dríulicho.
Verse: 11     Si állo stunta bétota   \   joh filu ouh fásteta,
Verse: 12     gótes willen húatta   \   joh thíonost sinaz úabta.
Verse: 13     Dages inti náhtes   \   fléiz si thar thes réhtes;
Verse: 14     in júgundi ward si wítua,   \   mit thísu irálteta.
Verse: 15     Tho quam si in thésen stunton   \   thị ih zálta bi then álton,
Verse: 16     thaz kíndilin si thar gisáh   \   joh lob ouh drúhtines spráh.
Verse: 17     Si kundta thár sos iz wás,   \   thaz in thiu fruma quéman was,
Verse: 18     sálida zi líbe,   \   gómmanne joh wíbe;
Verse: 19     "Álte joh júnge --   \   in thíu ẹr tharzua githinge,
Verse: 20     níotot er sih líbes   \   joh éwiniges líobes."
Verse: 21     So síu tho thar irfúltun,   \   so in thio búah gizaltun,
Verse: 22     sie flízzun sar thes sínthes   \   thes iro héiminges.
Verse: 23     Thaz kínd wuahs untar mánnon   \   so lília untar thórnon;
Verse: 24     so blúama thar in crúte   \   so scóno theh zi gúate.
Verse: 25     Wízzi théh imo ana sár,   \   thaz was gilúmflih in war;
Verse: 26     sih wísduames irfúlta,   \   so gótes sún scolta.


p. 28v    


Manuscript page: 28v 
Verse: 27     Gótes geist imo ánawas;   \   ni tharft thu wúntoron thaz,
Verse: 28     want iz wás imọ anan hénti   \   zi síneru giwelti.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.