TITUS
Otfrid von Weissenburg, Evangelienbuch
Part No. 26
Previous part

Chapter: 22  
p. 33v    

Manuscript page: 33v 
XXII. CUM FACTUS ESSET JESUS ANNORUM XII.


Verse: 1     So er thó ward áltero,   \   zuiro séhs jaro:
Verse: 2     sie flízzun thaz sie gịíltin   \   zen hóhen gizítin.
Verse: 3     Thie zíti sint so héilag   \   thaz man irzéllen ni mag;
Verse: 4     wir fórahtlichọ iz wéizen   \   joh óstoron héizen.
Verse: 5     Zen wíhen zitin fúarun,   \   so siu giwón warun,
Verse: 6     thes wízodes gihúgitun,   \   thaz kind mit ín frumitun.
Verse: 7     So síe tho thar gibétotun,   \   thie fira giéntotun,
Verse: 8     so íltun sie héim sar,   \   drof ni duáletun thar.
Verse: 9     Thaz kínd giduálta thia fart,   \   ni wúrtun siu es ánawart
Verse: 10     joh then éinegon sun   \   góumilosan líazun.
Verse: 11     Jósep wanta frúater,   \   er wári mit ther múater;
Verse: 12     si wanta in álawari,   \   thaz er mit ímo wari.
Verse: 13     Ni si thih thés wuntar:   \   thiu wíb thiu giangun súntar;
Verse: 14     thie gómman fuarun thánne   \   in themọ áfteren gange;
Verse: 15     Thiu kind thiu fólgetun   \   so wédar so siu wóltun,
Verse: 16     líafun miti stíllo,   \   sos in was múatwillo.
Verse: 17     Sus mit únredinu   \   so wúrtun siu bidrógenu;
Verse: 18     gigíangun si es in érnust,   \   in thráta mihila ángust.
Verse: 19     So siu tho héim quamun,   \   sih úmbi bisáhun
Verse: 20     sar io thés sinthes:   \   so místun siu thes kíndes.


p. 34r    


Manuscript page: 34r 
Verse: 21     Sie súahtun untar kúndon   \   joh untar gátilingon,
Verse: 22     ni fúntun sie nan wergin thár,   \   sie ni bráhtun nan sar;
Verse: 23     Tho híntarquam thiu múater   \   (ther sún ther ist so gúater!),
Verse: 24     joh rúartun thịọ iru brústi   \   tho managọ ángusti.
Verse: 25     Thio slúag si mit then hánton,   \   bigan iz hárto anton,
Verse: 26     kumta séro then grun;   \   iz was irạ éinego sun.
Verse: 27     Siu wuntun érnustin,   \   mit grozen ángustin
Verse: 28     sar io thía wila;   \   hébig was in thịụ íla.
Verse: 29     Theru muater wás es filu not,   \   bi thiu íltun siu sar wídarort;
Verse: 30     rúarta sia thiu smérza   \   ínnan ira hérza;
Verse: 31     Siu fúarun filu gáhun   \   zi theru búrg thar siu wárun;
Verse: 32     tho thes thrítten dages sár,   \   so fúntun siu thaz kínd thar.
Verse: 33     Er was thár, er giang sar ín   \   mit then brédigarin,
Verse: 34     sih fúagt er io zi nóte   \   zi themo hérote;
Verse: 35     Er lósota iro wórto   \   joh giwáro hárto,
Verse: 36     in mítten saz er éino   \   inti frágeta sie kléino.
Verse: 37     Wúntar was sie hárto   \   thes júngen kindes wórto,
Verse: 38     joh lósetun mit giwúrti   \   thero sinero ántwurti.
Verse: 39     In lánte warun mánage   \   wísduames biládane;
Verse: 40     ni was er ío so mari,   \   ni thiz bifóra wari!
Verse: 41     So síu gisah then líoban man,   \   int iru thaz hérza biquam,


p. 34v    


Manuscript page: 34v 
Verse: 42     tho spráh si zi themo kínde   \   mit gidróstemo sínne:
Verse: 43     "Wio wárd thaz ih ni wésta,   \   manno líobosta,
Verse: 44     tház thu hiar irwúnti   \   mir úntar theru hénti;
Verse: 45     Joh tház thu hiar giduáltos,   \   min múat mir so irfáltos,
Verse: 46     min sún guater,   \   thera éinigun muater?
Verse: 47     Ruarta míh ouh thes thiu mér   \   in min hérza thaz sér,
Verse: 48     thaz ih iz ér ni westa,   \   so gáhun thin firmísta!
Verse: 49     So ih erist místa thin, sún,   \   so ílt ih sar hérasun,
Verse: 50     joh híntarquam íh sar thín,   \   thu bist éinego min!
Verse: 51     Wir warun suórgenti   \   ther thíneru gisúnti;
Verse: 52     waz mág ih quedan méra,   \   min éinega séla?"
Verse: 53     "Waz íst", quad er, "so hébigaz,   \   thaz ir mih súahtut bi thaz?
Verse: 54     ja límphit mir theih wérbe   \   in mines fáter erbe."
Verse: 55     Siu so héim quamun,   \   es wíht ni firnámun
Verse: 56     zi nihéineru héiti,   \   waz ér mit thiu méinti.
Verse: 57     Untarthío was er ín,   \   ni was er drúhtin thes thiu mín,
Verse: 58     noh sin giwált sih wánota,   \   thaz er in thíonota.
Verse: 59     Er wólta unsih léren,   \   wir unsan fáter eren,
Verse: 60     joh thia múater tharmít;   \   bi thiu íst iz hiar gibílidit.
Verse: 61     Thaz kind théh io filu fram   \   so sélben gotes súne zam,
Verse: 62     in wáhsmen joh giwízze   \   uns állen io zi núzze.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.