TITUS
Otfrid von Weissenburg, Evangelienbuch
Part No. 65
Previous part

Chapter: 7  
p. 79v    

VII. SPIRITALITER.


Verse: 1     Drúhtin min ther gúato,   \   nu ríhti mih gimúato,
Verse: 2     zi thísu mir then húgu dua   \   joh thaz hérza tharzua,
Verse: 3     Tház ih hiar gizéine   \   waz thiu thin góuma meine,
Verse: 4     mit géistlichen rédinon   \   then thínen liobon thégenon.
Verse: 5     Giwisso wízzun wir tház   \   theiz fora then óstoron wás,
Verse: 6     tho drúhtin wolt es wáltan,   \   fon themo grábe irstántan;
Verse: 7     Símes ouh giwísse:   \   fora themo irstántnisse
Verse: 8     mit mínnon io ginúagen   \   zisámane unsih fúagen!
Verse: 9     Scówomes ouh thánne:   \   wára druhtin gánge,


p. 80r    


Manuscript page: 80r 
Verse: 10     wir únsih imo io náhen,   \   thaz wír ni missifáhen.
Verse: 11     Ni si uns wíht méra   \   thánne thiu sin léra;
Verse: 12     ni mínno wiht so súazo   \   io so spór thero fúazo!
Verse: 13     Galiléa, thaz ih quád,   \   theist in frénkisgon rád,
Verse: 14     thaz sih io úmbi zerbit   \   joh émmizigen wérbit.
Verse: 15     Ther sé ist zéssonti,   \   sih sélbon missihábenti,
Verse: 16     stózot sih io in thráti   \   mit mihileru únstati.
Verse: 17     Thiu méinent wio sih zérbit   \   joh thisu wórolt werbit,
Verse: 18     mit úngimachu thuruh nót   \   sih émmizigen stózot.
Verse: 19     Tho selben drúhtines máht   \   súlih untar fúaz drat,
Verse: 20     mit sínes selbes tódu   \   úbarfuar thiu bédu:
Verse: 21     Tho folgeta ímo thuruh tház   \   so er ufan hímile gisaz,
Verse: 22     gilóubtun sino gúati   \   manogo wóroltliuti.
Verse: 23     Thes sarphen wízodes nót   \   bizéinot thisu fínf brot,
Verse: 24     mit thíu er io in nóti   \   thuángta thie líuti.
Verse: 25     Gidar ih zéllen ubarlút:   \   hért ist gerstun kórnes hut,
Verse: 26     ist óuh, so ih forn ju wésta,   \   sínes léibes krusta;
Verse: 27     Thoh findu ih mélo tharínne,   \   in thíu ih es bigínne,
Verse: 28     joh brósmun súaza in alawár:   \   thes senses léib indue ih thár.
Verse: 29     So ist ther wízzod alter   \   úzana hérter;
Verse: 30     thar ist ínne manag gúat   \   thaz géistlicho uns io wóla duat.


p. 80v    


Manuscript page: 80v 
Verse: 31     Thaz deta drúhtin, thaz man wéiz,   \   tho er thia krústun firsléiz;
Verse: 32     thaz man thia frúma thar gisáh,   \   tho er thia ríntun firbrah.
Verse: 33     Thie selbun físga zeinent   \   waz fórasagon méinent;
Verse: 34     thiu góuma losget tháre   \   so físg in themo wáge.
Verse: 35     Óba thu ra rúachis,   \   thu thar sia díofo suachis,
Verse: 36     joh thar irfísgot thinaz múat   \   harto mánagfaltaz gúat.
Verse: 37     Ther knéht ther thaz allaz drúag,   \   er es wíht ni giwúag,
Verse: 38     er ímo iz ni ginúzta,   \   furi ándere ouh ni sázta;
Verse: 39     So duent thie Júdeon in wár:   \   sie drágent iro búah thar,
Verse: 40     noh ín thia fruma níazent   \   noh ándere ni lázent.
Verse: 41     Thaz spéntot druhtin híare,   \   thaz ságen ih thir zi wáre;
Verse: 42     nim es hárto gouma:   \   thiz sínt thio selbun góuma.
Verse: 43     Thaz spéntot er in múate   \   uns zi allemo ánaguate
Verse: 44     joh ouh wórolti ubar ál,   \   er unsih wíht es ni hál.
Verse: 45     Waz fórasagon zéllent   \   joh uns thie sélmi singent,
Verse: 46     ouh gibót thaz álta,   \   er géistlicho uns iz zálta;
Verse: 47     Thaz spéntot er nu líutin   \   mit géistlichen dátin,
Verse: 48     mit géistlicheru léru,   \   thaz ságen ih thir zi wáru.
Verse: 49     Ob iz war zi thíu gigat   \   thaz man thia díufi ni firstát,
Verse: 50     thero brósmono kléini   \   joh thes brótes reini:
Verse: 51     Lésent zi ín thia rédina   \   thie hóhun gotes thégana;


p. 81r    


Manuscript page: 81r 
Verse: 52     in giscríp iz kléibent   \   thaz míne gilichon léibent.
Verse: 53     So wár so iz ío zi thíu gigeit   \   thaz mín gilícho iz ni firstéit:
Verse: 54     in búah sie iz duent zisámane,   \   giháltan thar zi hábanne;
Verse: 55     Thaz man iz lése tháre   \   giháltan ío bi járe,
Verse: 56     thaz síe uns scono zélitun   \   inti in thie kórbi legitun.
Verse: 57     Sie éigun thaz giwéizit,   \   bi hiu man sie kórbi heizit,
Verse: 58     wanta thiu íro guati   \   hiar thultit ármuati.
Verse: 59     Kórp theist scálklichaz fáz;   \   thoh ni rúachent sie bi tház,
Verse: 60     ni mán sie sus iowánne   \   zi kórbin ginenne;
Verse: 61     Wánta sie sint álle   \   thera Krístes lera fólle,
Verse: 62     thia selba kléinun wizzi   \   thia scríbent sie uns zi núzzi.
Verse: 63     Thaz gras sint ákusti,   \   thes líchamen lústi;
Verse: 64     sie blýent hiar in mánne   \   sar zirthórrenne.
Verse: 65     Wir scúlun thes bigínnan,   \   súlih gras io thuíngan
Verse: 66     jóh thio sino súazi   \   al drétan untar fúazi,
Verse: 67     Thaz siu mit thémo werke   \   al untar úns irwélke
Verse: 68     joh síh ouh widar réhte   \   fúrdir zi úns ni irrihte.
Verse: 69     Ni múgun wir, thoh wir wóllen,   \   thoh wír es ouh bigínnen,
Verse: 70     zi then Kristes góumon sizzen,   \   wir sélbon ni giwizzen.
Verse: 71     Firdrít, so ih quád, thia súazi   \   al úntar thine fúazi,
Verse: 72     thaz siu thir wíht ni derre,   \   thera góuma ni gimérre.


p. 81v    


Manuscript page: 81v 
Verse: 73     So thu thaz thánne giduas,   \   so wehsit thir thaz Kristes múas
Verse: 74     in múnde joh in múate   \   zi thínes selbes gúate.
Verse: 75     Lís thir mit giwúrti   \   in thero búahstabo hérti,
Verse: 76     grúbilo in giríhti   \   in thes giscríbes slihti:
Verse: 77     Thar findist thu ío thuruh nót   \   filu géistlichaz brót
Verse: 78     úntar themo gikrúste,   \   in thiu thih es wóla luste.
Verse: 79     Oba thu iz thíko filu dúas,   \   so wéhsit thir thaz Kristes múas
Verse: 80     émmizigen thanne;   \   so quimit iz wóla manne.
Verse: 81     So thú io in thía redina   \   thar lángor sizis óbana:
Verse: 82     so thir ther ábaho githank   \   welket mér ana wank;
Verse: 83     Joh sih thaz grás thar untar thír   \   min irríhtit widar thír,
Verse: 84     thio argun gilústi   \   gébent thir furdir frísti;
Verse: 85     Joh findist thu óuh ana tház   \   thar dréso filu díuraz,
Verse: 86     then fórasagon máron,   \   ther sih thiu brót hiaz meron.
Verse: 87     Thie líuti datun mári   \   thaz fórasago er wári;
Verse: 88     quam úns gilóuba hérasun   \   thaz ér ist selbo gótes sun.
Verse: 89     Er wérd unsih giblíden   \   io zen góumon sinen,
Verse: 90     húngere biwérien   \   joh ouh fon tóde nerien!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.