TITUS
Otfrid von Weissenburg, Evangelienbuch
Part No. 66
Previous part

Chapter: 8  
p. 81v    

VIII. VOLUIT EUM POPULUS REGEM FACERE, ET QUOMODO AMBULABAT SUPER MARE.


Verse: 1     Wóltun tho thie líuti   \   fáhan nan bi nóti,
Verse: 2     giwísso, thaz ni hílu ịh thih,   \   duan zi kúninge ubar síh.


p. 82r    


Manuscript page: 82r 
Verse: 3     Er flóh in thaz gibírgi,   \   thaz ér sih thar gibúrgi;
Verse: 4     giwisso er détaz thuruh tház,   \   bi thiu sin zít noh tho ni was,
Verse: 5     Thaz er nóh tho wolti   \   sin kúning mit giwélti
Verse: 6     ófono zi wáre;   \   bi thiu flóh er sie tho tháre.
Verse: 7     Er tho then júngoron gibot,   \   tház sie fuarin wídorort,
Verse: 8     thaz sie ouh giwár warin   \   joh ubar thaz fár fuarin.
Verse: 9     Síe ouh tho so dátun,   \   joh ángusti sie rúartun;
Verse: 10     mihil úngiwitiri   \   wás in harto wídari.
Verse: 11     So síe in thaz scíf gigiangun,   \   sie wétar sar bifíangun;
Verse: 12     joh féritun sie giwáro   \   in then úndon filu suáro.
Verse: 13     Ther wint thaz scíf fuar jágonti,   \   thie undon blíuenti;
Verse: 14     wás in thrato hérti   \   thaz wétar in theru férti.
Verse: 15     Drúhtin after ín tho giang,   \   so ther líut tho zigiang,
Verse: 16     joh thíe nan firlíazun   \   thie thar zen góumon sazun.
Verse: 17     Gíang er after ín tho sar   \   oba themo wázare thar,
Verse: 18     fásto oba ther úndu,   \   so wír duen hiar in érdu;
Verse: 19     Giang er wégerihti,   \   súahta sin gikníhti,
Verse: 20     sine líebun thégana   \   in then úndon thar tho óbana.
Verse: 21     Bizóh se, tho iz zi dáge want,   \   er sie quámin in lant,
Verse: 22     unz sie in álathrati   \   wárun in ther nóti.
Verse: 23     Sie mér ouh hintarquámun,   \   so síe nan tho gisáhun;


p. 82v    


Manuscript page: 82v 
Verse: 24     firnámun in giwári   \   theiz ein gidróg wari.
Verse: 25     Sie tho lúto irháretun   \   thuruh thia suárun fórahtun,
Verse: 26     thuruh thaz míhila úngimah,   \   wanta ér man súlih ni gisáh,
Verse: 27     Thaz mán io thes githáhti,   \   thaz súlih io bibráhti,
Verse: 28     ódo ouh thaz gidáti,   \   thaz wázar er so drati.
Verse: 29     Sprah tho drúhtin innan thíu,   \   quad: "wiht ni fórahtet ir iu;
Verse: 30     gihábet iuih báldo,   \   bin íh giwisso iz sélbo!"
Verse: 31     So Petrus tház tho gisáh,   \   fon themo skíff er zi imo spráh,
Verse: 32     gruazta báldo (ih sagen thir tház)   \   then méistar so er giwón was.
Verse: 33     "Drúhtin", quád er, "oba thu ịz bíst   \   joh sélbo thu thar géngist,
Verse: 34     thanne", quad, "gibíut mir,   \   thaz ih quéme thara zi thir."
Verse: 35     "Quím!" quad druhtin zi imo in wár;   \   wiht ni duálta er es sar,
Verse: 36     nub er zi gánne in thrati   \   sih fon themo skífe dati.
Verse: 37     Er erist wóla sih gifnáh;   \   so er avur then wínt tho gisah,
Verse: 38     joh waz thio úndun worahtun,   \   so rúartun inan fórahtun.
Verse: 39     Ther se nan sár tho sankta,   \   so imo ther hugu wankta;
Verse: 40     ni drúag inan thaz zuíval,   \   so thiu gilóuba ubar ál.
Verse: 41     "Drúhtin", quad er, "hílf mir,   \   theih thuruh quéme thara zi thír,
Verse: 42     theih híar nu ni firwérde,   \   firlóran ouh ni wérde!"
Verse: 43     Er sína hant tho thénita,   \   then sinan knéht thar nerita,
Verse: 44     ráfsta nan tho wórto   \   thera úngilouba hárto;


p. 83r    


Manuscript page: 83r 
Verse: 45     Ziu er scólti io thes githénken   \   joh múates io giwénken
Verse: 46     ouh forahten tódes suari   \   unz er mit ímo wari.
Verse: 47     In thaz skíf er giang tho zi ín,   \   ni fórahtun síe in thes thiu mín;
Verse: 48     tho ward in theru stúlli   \   thaz wétar filu stílli.
Verse: 49     Inan ál tho betota   \   thier fón then fréison retita,
Verse: 50     quádun ouh sos iz íst:   \   "thu sélben gotes sún bist."


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.