TITUS
Otfrid von Weissenburg, Evangelienbuch
Part No. 67
Previous part

Chapter: 9  
p. 83r    

IX. OPTULERUNT EI OMNES MALE HABENTES.


Verse: 1     Ther líut tho géiscota thaz   \   thaz drúhtin thara queman was;
Verse: 2     ingégin fuarun fólkon   \   zen séltsanen wérkon.
Verse: 3     Sie quamun ál zisamane,   \   thiu zéichan thar zi séhanne,
Verse: 4     manag séltsani;   \   bi thiu wérd iz thar so mári.
Verse: 5     Sie brahtun úmmahti   \   joh ellu krúmbu wihti,
Verse: 6     ouh hórngibruader suáre,   \   thaz ságen ih thir zi wáre,
Verse: 7     Blínte joh ouh dóube   \   (thaz mánnilih gilóube);
Verse: 8     ouh thara zi ímo quamun   \   thie in únwizzin warun.
Verse: 9     Sie wúnsgtun, muasin rínan   \   thoh sinan trádon einan
Verse: 10     in sínen giwátin;   \   thaz méra sie ni bátin.
Verse: 11     So wér so nan birúarta,   \   er fruma thána fuarta;
Verse: 12     sálida inti héili   \   thaz wás in thar giméini.
Verse: 13     Sie héili thar io scúafun   \   thie mit gilóubu riafun,
Verse: 14     álles guates io ginúht,   \   wanta ér ist thisu wóroltzuht;


p. 83v    


Manuscript page: 83v 
Verse: 15     Wanta ér giscuaf thesa érda   \   joh hímilisga wúnna,
Verse: 16     ouh then sé hiar nídana;   \   bi thiu gíang er thar so óbana.
Verse: 17     Thaz was bi thíu, in war mín:   \   ther selbo wág ther was sín,
Verse: 18     ther selbo sé, thaz ist war;   \   bi thiu nintwéih er mo thár;
Verse: 19     Er was io in théra fristi   \   zi sinen fúazon fésti,
Verse: 20     nintweih imo iowánne   \   zi sínes selbes gánge.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.