TITUS
Otfrid von Weissenburg, Evangelienbuch
Part No. 68
Previous part

Chapter: 10  
p. 83v    

X. DE MULIERE CHANANAEA.


Verse: 1     Sus in wége quam ein wíb,   \   wéinota thaz íra lib,
Verse: 2     fólgeta in then lóuftin   \   mit grozen ánaruaftin.
Verse: 3     Ni quam er drúhtine   \   fon héidinemo wibe
Verse: 4     in gánge odo in lóufti   \   sulih ánaruafti.
Verse: 5     Si quam rúafenti,   \   kúmta thio iro thúrfti,
Verse: 6     klágota ira wéwa   \   bi ira dóhter liaba;
Verse: 7     Mit míhilon ríuwon,   \   io so wíb sint giwón,
Verse: 8     io mér inti mér   \   zálta imo thaz ira sér.
Verse: 9     "Ginádo, druhtin", quad si, "mír,   \   bi thiu rúafu ih zi thir,
Verse: 10     hélfa thino uns ráten,   \   Davídes sun thes gúaten!
Verse: 11     Min dóhter ist mit séru   \   in únwizzin zi wáru;
Verse: 12     ther díufal ist iru ínne,   \   ther fíant ist io mánne."
Verse: 13     Thaz fuar si rédinonti,   \   after imo hárenti,
Verse: 14     klágota iogilícho   \   thia dohter wénaglicho.


p. 84r    


Manuscript page: 84r 
Verse: 15     Thiu drúhtines mílti   \   ni gab es ántwurti;
Verse: 16     thaz wíb io suslih rédota,   \   sélbo druhtin thágeta.
Verse: 17     Tho sprachun thár, so gizám,   \   thie wolawílligun man,
Verse: 18     thie selbun drúta sine   \   húlfun themo wíbe.
Verse: 19     "Frumi, drúhtin, thaz wib,   \   thaz si unsih láze haben líb,
Verse: 20     si héra sus ni lóufe   \   joh after úns ni ruafe.
Verse: 21     Ja hilfist thu ío mit willen   \   thesen líutin allen,
Verse: 22     ríchen joh ármen;   \   laz sía thih ouh irbármen!"
Verse: 23     "Ih ni bín", quad er tho zi ín,   \   "giséntit hera in wórolt in,
Verse: 24     ni si théih gidue githíuti   \   thie mines fáter liuti;
Verse: 25     Íro ist filu irwórtan,   \   ni sínt ouh noh nu fúntan;
Verse: 26     ih quam bi théru noti,   \   theih thie gisámanoti."
Verse: 27     Si was es ágaleizi   \   joh fíal in sine fúazi,
Verse: 28     klagota ío thaz ira sér,   \   thaz iz irbármeti inan mér.
Verse: 29     "Drúhtin", quad si, "hílf mir!   \   then drost wéiz ih in thir;
Verse: 30     ginádo in therera ríuwi   \   thinera múadun thiuwi!
Verse: 31     Heili dóhter mina   \   thuruh gináda thina,
Verse: 32     dúa mir thaz gimúati   \   thuruh thin sélbes guati!"
Verse: 33     "Níst", quad er tho, "fruma tház,   \   thaz man zúkke thaz maz
Verse: 34     then kíndon ir then hánton   \   inti wérfez úz then húnton."
Verse: 35     "Drúhtin", quad si, "al ist iz só,   \   thaz wízzun wir giwísso;


p. 84v    


Manuscript page: 84v 
Verse: 36     álle man nintnéinent   \   thaz thínu wort giméinent.
Verse: 37     Giléchont thoh thie wélfa   \   (theist lába in joh ouh hélfa),
Verse: 38     thero brósmono sih fúllent   \   thie fon then dísgin fallent,
Verse: 39     Thar héreron thie wíse   \   sízzent zi iro múase,
Verse: 40     gismékent thoh thía méina   \   thera selbun áleiba."
Verse: 41     Thera gilóubun fésti   \   irkánt er in ther brústi;
Verse: 42     was drúhtine iz gimúati,   \   joh lóbota sus thio gúati:
Verse: 43     "In thiu wérk minu   \   so ist stárk gilóuba thinu;
Verse: 44     nu wérden al thio dáti   \   so thú mih hiar nu báti."
Verse: 45     Tho ward bi théru wilu   \   thiu dóhter sar io héilu;
Verse: 46     gibot iz Kríst guater   \   thes bát iru thiu múater.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.