TITUS
Otfrid von Weissenburg, Evangelienbuch
Part No. 69
Previous part

Chapter: 11  
p. 84v    

XI. MORALITER.


Verse: 1     Si hábeta, so er wésta,   \   gilóuba filu fésta;
Verse: 2     thaz giscéinta si thár,   \   thaz ságen ih thir in álawar.
Verse: 3     Fúar si thérero dato   \   rédihaftor thráto
Verse: 4     joh báz in thereru nóti   \   thanne ther kúning dati.
Verse: 5     Er bát thaz druhtin fúari   \   thar ther sún wari,
Verse: 6     joh er thar giméinti   \   thaz er nan thár gihéilti.
Verse: 7     Ni deta síu es avur mér,   \   giklágota ekrodọ ira sér,
Verse: 8     thaz ira mánagfalta léid,   \   joh sih es wiht thar ni méid.
Verse: 9     Ni bat si thés, thaz ist wár,   \   thaz er fuari thára sar;


p. 85r    


Manuscript page: 85r 
Verse: 10     ni wánu si ouh thes tháhti,   \   thaz siu sia thára brahti;
Verse: 11     Suntar sús betota,   \   gináda sino thígita,
Verse: 12     gilóubtạ er sia gihéilti,   \   ób er iz thár giméinti,
Verse: 13     Joh ób er thaz gidáti,   \   thaz er sin wórt giquati,
Verse: 14     thaz sár io sin gizámi   \   thera dóhter biquámi.
Verse: 15     Giwisso wízist thu tház,   \   bi thiu giscéinta siu thaz:
Verse: 16     sliumo fúar si sar héim,   \   so ér gisprah sin wórt ein.
Verse: 17     Hábeta siu ouh in thia stúnt   \   filu míhila thult,
Verse: 18     thúltigaz hérza   \   úbar ira smérza.
Verse: 19     Selbo Kríst, so er wólta,   \   zi húnton er sia zálta,
Verse: 20     ni gab si thóh ubar ál   \   io thes rúaffennes stal;
Verse: 21     Sih wíht ouh thes ni scámeta,   \   thaz er thaz rédinota,
Verse: 22     ni firlíaz ouh in ther nóti,   \   ni si imo fólgeti,
Verse: 23     Ni si ávur thaz irwéliti,   \   then nót imo gizéliti,
Verse: 24     thia thúrft imo giklágoti   \   io after rúafenti;
Verse: 25     Selbon Kríst thar bétota   \   joh sinaz wórt ouh lóbota,
Verse: 26     intfíang iruz zi gúate   \   mámmuntemo múate.
Verse: 27     Bi thiu gihólota siu thár,   \   wízist thaz in alawár,
Verse: 28     wanta si hábeta sulih múat,   \   thera dóhter thaz gúat;
Verse: 29     Giwan mit ágaleize,   \   mit míhilemo flize
Verse: 30     sar io thía wila   \   thia héilida ana duála;


p. 85v    


Manuscript page: 85v 
Verse: 31     Joh fúar si sines wórtes   \   fro tho héimortes;
Verse: 32     joh si sár githágeta,   \   gilóubta thaz er ságeta.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.