TITUS
Otfrid von Weissenburg, Evangelienbuch
Part No. 70
Previous part

Chapter: 12  
p. 85v    

XII. VENIT JESUS IN PARTES CAESAREAE PHILIPPI.


Verse: 1     Bigan drúhtin eines rédinon   \   gisuáso mit then théganon,
Verse: 2     frágeta sie mit mínnon   \   fon then wóroltmannon;
Verse: 3     Éiscota sie in thráti,   \   waz thiu wórolt quati,
Verse: 4     waz sie fon ímo redotin   \   joh wío fon imo zélitin.
Verse: 5     "Wíht", quad er, "ni hélet mih   \   thes ih nu frágen iuih;
Verse: 6     giwísso ságet mir iz ál   \   thes iuih éiscon hiar nu scal.
Verse: 7     Waz quít fon mir ther líutstam?   \   thaz gizéllet mir nu frám;
Verse: 8     wer quédent sie theih sculi sín   \   odo ouh rácha wese mín?"
Verse: 9     Sie imo rédinotun   \   wáz sies alle hórtun,
Verse: 10     zaltun míssilih gimáh,   \   wío ther liut fon ímo sprah.
Verse: 11     "Súme", quadun, "duent sie wís,   \   tház thu Hieremías sis;
Verse: 12     Johánnem sume ouh nénnent   \   joh thih zi thíu gizellent.
Verse: 13     Quedent súm giwaro,   \   Helías sis ther máro,
Verse: 14     ther thiz lánt so tharta,   \   then hímil so bispárta;
Verse: 15     Ther jú ni liaz in nótin   \   régonon then líutin,
Verse: 16     thuángta sie giwáro   \   hárto filu suáro.
Verse: 17     Joh spréchent hiar in ríche   \   thie liuti ouh súmiliche,
Verse: 18     thu sís giwisso héiler   \   thero fórasagono éiner,


p. 86r    


Manuscript page: 86r 
Verse: 19     Thie jú bi alten wóroltin   \   then liutin wúntar zelitin,
Verse: 20     kúnftigo dáti   \   joh drúhtines girati."
Verse: 21     "Nú", quad er, "ni hélet mih   \   wio ír firnoman eigit míh,
Verse: 22     nu sie bi míh so zéllent,   \   so hárto missihéllent!"
Verse: 23     Deta éiner thes tho rédina,   \   firspráh thie selbun thégana;
Verse: 24     Pétrus spráh thar ubarlút,   \   ther furisto drúhtines drut:
Verse: 25     "Uns állen thaz giwís ist   \   tház thu selbo Kríst bist,
Verse: 26     fon góte uns quami hérasun,   \   selbo drúhtines sun."
Verse: 27     Githánkota er mo hárto   \   théro selbon wórto,
Verse: 28     joh géreta ínan, wizist tház,   \   ouh filu hóho ubar thaz.
Verse: 29     "Thir gáb nu", quad, "zi gúate   \   min fáter thaz zi múate;
Verse: 30     ni theiz mán gidati   \   thaz thu nu súlih quati.
Verse: 31     Nu wíllu ih thir gihéizan:   \   Pétrus scalt thu héizan,
Verse: 32     thaz thu in gilóubu, ih sagen thir éin,   \   sis so fésti io so stéin;
Verse: 33     Thar ih óba wille,   \   thie mine líobon alle,
Verse: 34     gizímboron thaz min hús,   \   thaz sie nirgángen thanan úz.
Verse: 35     Nirméginot sih, wizist tház,   \   thiu hellipórta ubar thaz,
Verse: 36     díufeles girústi;   \   iz sténtit in ther fésti.
Verse: 37     Thir willu ih géban innan thés   \   slúzila hímiles,
Verse: 38     thaz thu wáltes álles   \   thes selben ínganges;
Verse: 39     Thaz then thie dúri sin bidán   \   thie tharín ni sculun gán,


p. 86v    


Manuscript page: 86v 
Verse: 40     joh ouh thén inslíazes   \   thie thú tharzua gilíazes.
Verse: 41     Gibínt then man mit wórton:   \   ther stánte so in then bánton;
Verse: 42     ni wíll ih themo ouh wídoron   \   then thú gisteist intrédinon;
Verse: 43     So wás so thu es bizéines,   \   in érdu hiar giméines,
Verse: 44     so wesez ál in hímile,   \   thir níaman thes ni wídire!"


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.