TITUS
Otfrid von Weissenburg, Evangelienbuch
Part No. 71
Previous part

Chapter: 13  
p. 86v    

XIII. PRAECEPIT NE CUI DICERENT, QUIA IPSE ESSET CHRISTUS; ET INCREPATIO PETRI; ET [DE] VISIONE IN MONTE.


Verse: 1     Er tho then júngoron gibót,   \   thaz sie iz hálin thuruh nót,
Verse: 2     théiz ni wurti mári   \   thaz er Kríst wari.
Verse: 3     Zált er in tho fóllon   \   then sinan múatwillon
Verse: 4     joh ouh hárto filu frám,   \   bi híu er hera in wórolt quam.
Verse: 5     "Mih scál man", quad, "gifáhan,   \   ufan krúzi hahan,
Verse: 6     bispíuan joh bifíltan   \   joh héistigo biscóltan.
Verse: 7     Dúent thaz these fúriston   \   joh thie héreston,
Verse: 8     ergébent mih zi nóte   \   frémidemo thíete.
Verse: 9     Ih irstán after thíu   \   (drof ni fórahtet ir iu,
Verse: 10     nist iz láng zi ware:)   \   thes thrítten dages sare."
Verse: 11     So Pétrus thaz tho wésta,   \   er inan súntar rafsta
Verse: 12     joh ouh fílu harto   \   súlichero worto:
Verse: 13     "Ni giwáhin es, druhtin, fúrdir;   \   ginado sélbo thu thoh thir,
Verse: 14     thaz wórolt ni bifinde   \   thaz thir io súlih werde!
Verse: 15     Drúhtin, thu iz ni wólles,   \   thaz thú so io bifálles;


p. 87r    


Manuscript page: 87r 
Verse: 16     joh thu iz sélbo firbíut,   \   thaz thir ni dúe so ther liut,
Verse: 17     Thu únsih so bisuíches,   \   thaz thu uns ío gisuiches;
Verse: 18     gót iz ni giwérde,   \   thaz thir io súlih werde!"
Verse: 19     Gab ér tho ántwurti   \   thaz Pétrum thuhta hérti,
Verse: 20     thaz ínan tho giwísso   \   rúarta filu wásso.
Verse: 21     "Far after mír thanne,   \   thu sátanas zi mánne!
Verse: 22     thu thes girátes wiht ni wéist   \   thaz selbo drúhtin wilit méist.
Verse: 23     Hábet er giméinit,   \   mit mir thia wórolt heilit,
Verse: 24     ni még iz werdan álles;   \   thu quíst thaz thu iz ni wólles!
Verse: 25     Sint mer thir mánnes dati   \   thanne sín girati;
Verse: 26     sos iz thíh githunkit,   \   nales so ér githenkit.
Verse: 27     So wér so wolle mánno   \   gan after mír io gerno:
Verse: 28     firlóugn er filu fóllon   \   then sinan múatwillon,
Verse: 29     Joh neme krúzi sinaz   \   tharazúa ouh ubar tház,
Verse: 30     fólge mir io thánne   \   thar ih fora ímo gange.
Verse: 31     Waz hílfit nu then muadon mán,   \   ther hiar gihéret so frám,
Verse: 32     thaz sínt imo untar hénti   \   ellu wóroltenti,
Verse: 33     Oba er in thía wila   \   firlíusit sina séla,
Verse: 34     joh sih sélbon thuruh nót   \   mit súnton firdámnot?
Verse: 35     Ni mág er, thaz ist al niwíht,   \   findan wéhseles wiht
Verse: 36     in allen ríchin, thaz ist wár;   \   er sélbo scal iz wesan thár.


p. 87v    


Manuscript page: 87v 
Verse: 37     Wanta drúhtin giltit,   \   so er sin úrdeili duit,
Verse: 38     állen so sie dátun   \   joh hiar giwérkotun.
Verse: 39     Hiar stantent súme untar íu   \   (giwisso ságen ih iz iu),
Verse: 40     thie tóthes ni koront ér   \   noh ni thúltent thaz sér,
Verse: 41     Ér sie sehent scóno   \   then gotes sún frono
Verse: 42     in sunnun ánaliche   \   in sínemo riche."
Verse: 43     Er ahto dágon after thíu   \   (thaz zellu ih híar nu bi thíu,
Verse: 44     thaz thu thir sélbo leses thár   \   thaz séltsana wuntar,
Verse: 45     Zi thiu er sár tho gifíang),   \   er úfan einan bérg giang.
Verse: 46     thar lisist thu ouh ana wán,   \   thaz thrí er hiaz mit ímo gan;
Verse: 47     Joh sie thar in gáhun   \   scóni sino sáhun,
Verse: 48     wio sie ouh mit únredinon   \   in wóltun thar gisélidon.
Verse: 49     Ther fáter iz gisúazta,   \   then sinan líobon grúazta,
Verse: 50     quad er wári (weist es mér)   \   éinego síner.
Verse: 51     Móyses giwaro,   \   Helías ouh ther máro
Verse: 52     fon heilegero ménigi   \   quámun thara ingégini.
Verse: 53     Zélit thir iz Lúcas   \   waz iro thíng thar tho wás,
Verse: 54     waz sine scálka in feste   \   thar kósotun mit Kríste.
Verse: 55     Thie júngoron thar tho gáhun   \   thera scóni hintarquámun,
Verse: 56     joh sie tho théro dato   \   irfórahtun sih thráto;
Verse: 57     Er in sélbo gibot,   \   thaz sie iz hálin thuruh nót,


p. 88r    


Manuscript page: 88r 
Verse: 58     unz thiu sín guati   \   uf fon tóde irstuanti.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.