TITUS
Otfrid von Weissenburg, Evangelienbuch
Part No. 72
Previous part

Chapter: 14  
p. 88r    

XIV. BREVIS AMMONITIO DE SIGNIS.


Verse: 1     Thes nist zála noh ouh rím,   \   wio manag wúntar ist sín,
Verse: 2     wio manag séltsani   \   ist ubar wórolt mari.
Verse: 3     Thaz duent lútmari   \   thie scríptora fiari,
Verse: 4     thie scríbent evangélion;   \   lis sélbo theih thir redion.
Verse: 5     Thar máhtu ana fíndan,   \   wío er ouh einan gómman
Verse: 6     irquícta in theru báru;   \   thaz ságen ih thir zi wáru;
Verse: 7     Irquíct er ouh, so móht er,   \   thes héresten dóhter
Verse: 8     in themo hús zi libe   \   then híon zi liabe.
Verse: 9     Unz drúhtin selbo thára giang,   \   ein wib er iz untarfíang;
Verse: 10     si ganz sih thána fuarta,   \   so slíumo siu nan rúarta,
Verse: 11     Thoh ni wás giwisso ér   \   árzat nihéiner,
Verse: 12     thoh si ira al spéntoti   \   ther húlfi iru in theru nóti.
Verse: 13     So druhtin thárasun tho fúar,   \   so ínan ira fáter spuan;
Verse: 14     bi thia dóhter dati,   \   so ér nan thar tho báti
Verse: 15     (Thráng inan thiu ménigi   \   thiu thár was tho ingégini,
Verse: 16     thár thie selbun líuti   \   drúhtin Krist zi nóti!);
Verse: 17     Bigonda génu dráhton,   \   in ira múate ouh áhton,
Verse: 18     si sih zi thíu gifiarti,   \   tház siu ịnan birúarti
Verse: 19     (Thoh bi thía meina   \   thia drádun ekord éina);


p. 88v    


Manuscript page: 88v 
Verse: 20     si iz zi thíu gisítoti,   \   thaz méra wiht ni géroti --
Verse: 21     Thaz sár io mit giwúrti   \   si wola gánz wurti;
Verse: 22     joh ób iz zi thíu wurti,   \   thaz blúat iru firstúlti!
Verse: 23     Si iz zi thíu bibrahta   \   joh drúhtine sih náhta,
Verse: 24     joh iz zi thíu gifiarta,   \   thes giwates trádon ruarta.
Verse: 25     Mit míhileru ílu   \   so wárd si sár io heilu,
Verse: 26     sar io thía warba   \   in allen ánahalba.
Verse: 27     Sar gab stál, thaz ist wár,   \   mer zi rínnanne thár
Verse: 28     brúnno thes blúates;   \   so fúalta sar * thes gúates.
Verse: 29     Sih drúhtin kerta wídorort,   \   ther thia héili thar gibót,
Verse: 30     joh frágeta bi nóti,   \   wér nan thar tho rúarti.
Verse: 31     "Ziu ist, drúhtin!" quad tho Pétrus,   \   "thaz thu es éiscos nu sús,
Verse: 32     joh thu therero dáto   \   fráges nu so thráto?
Verse: 33     Thih thringit mán bi mánne   \   in thésemo selben gánge,
Verse: 34     álle these líuti:   \   thu fráges wer thih rúarti?"
Verse: 35     "Íh", quad er, "infúalta   \   thaz étheswer mih rúarta;
Verse: 36     ih irkánta, ih ságen thir,   \   thia kraft hiar fáran fona mir."
Verse: 37     So síu tho thaz gihórta   \   thaz er iz ántota,
Verse: 38     joh thiu selba dát sin   \   ni móhta tho firhólan sin;
Verse: 39     Joh er tho spráh ubar ál   \   bi frúma thía si thar firstál,
Verse: 40     tho míthont in theru frísti,   \   thaz wánta si er ni wésti:


p. 89r    


Manuscript page: 89r 
Verse: 41     Quam siu fórahtalu sár   \   joh zálta mo thiu wérk thar,
Verse: 42     jáh tho thar gimúato   \   sínes selbes dáto;
Verse: 43     Thero drúhtines wérko   \   joh óuh iro githánko,
Verse: 44     bi hiu si irbáldota so frám,   \   jóh zi thiu si thára quam;
Verse: 45     Joh ziu si fáreta   \   thaz si thia trádun ruarta.
Verse: 46     gilóuba iz deta in wára;   \   ni gidórst es ruaren méra.
Verse: 47     "Fár", quad er tho, "innan thés,   \   tohter, héimortes
Verse: 48     mit frídu joh mit gúatu,   \   mit gilóubu so gihéiltu.
Verse: 49     Gilóuba thin in wára   \   thiu déta thih hiar héila,
Verse: 50     thiu déta thaz gizámi,   \   thu hiar thia fruma nami." --
Verse: 51     Maht lésan in theru rédinu   \   zéichan filu mánagu,
Verse: 52     giwísso, so ih thir zéllu,   \   thiu er deta sáman ellu:
Verse: 53     Wio fuarun thiu díufilir úz   \   thar zi Pétruses hus,
Verse: 54     tho drúhtin thaz giméinta,   \   er sina suígar heilta.
Verse: 55     Thie síechun quamun álle   \   tho zemo ábande;
Verse: 56     firdreib er ál thio suhti   \   joh iro úmmahti.
Verse: 57     Ér gibot then wínton,   \   then undon zéssonton;
Verse: 58     so slíum er es giwúag thar,   \   sie gistíltun in sar;
Verse: 59     Tho sin githígini zi imo ríaf,   \   tho ér in themo skífe sliaf,
Verse: 60     irwágtun thuruh fórahta:   \   tho er thaz zéichan worahta.
Verse: 61     Héilt er ouh ju blínte,   \   thie wárun mórnente,


p. 89v    


Manuscript page: 89v 
Verse: 62     thie sus in wége gahun   \   míthont zi ímo quamun;
Verse: 63     Thíe ouh zi imo súnnun   \   thie mit díufele wúnnun,
Verse: 64     hórngibruader thánne,   \   thie héilt er sár io alle.
Verse: 65     Lis thir Mátheuses déil,   \   wio ward ein hórngibruader héil;
Verse: 66     in Lúcases deile,   \   wio zéhini wurtun héile.
Verse: 67     Thár sint ouh gizálte   \   béttirison álte,
Verse: 68     úmmahtige mán;   \   thie heilt er ál so gizam.
Verse: 69     Firdílota er in súntar   \   thia súnta, thaz was wúntar;
Verse: 70     firgáb in thiu sin gúati   \   thio iro míssidati.
Verse: 71     Thara ouh zúa gifuagi   \   blíntero ginúagi,
Verse: 72     hálzero ménigi   \   joh krúmbero gisámani,
Verse: 73     Thie ih al irzéllen ni mag,   \   thoh ih tharzúa due then dág,
Verse: 74     ouh thaz jár allaz   \   joh minaz líb ubar thaz.
Verse: 75     Thaz was in ínouon   \   joh úze in then gówon;
Verse: 76     so wár so sie sih klágotun   \   joh míthont imo gágantun:
Verse: 77     So heilte se álle druhtin sár,   \   thaz ságen ih thir in alawár;
Verse: 78     er blíder thána wanta   \   so wér so zi imo nándta.
Verse: 79     So wer so thés ruahta   \   thaz frúma zi imo súahta
Verse: 80     (wízist iz in alawár):   \   es ni brást imo thár;
Verse: 81     Want ér ist selbo wúnno   \   joh álles gúates brunno;
Verse: 82     állaz guat zi wáre   \   so flóz fon imo tháre


p. 90r    


Manuscript page: 90r 
Verse: 83     Allen líutin io ginúag,   \   so wér so es thanne thar giwúag;
Verse: 84     ther thara in thíu giliafi   \   thaz thara zi ímo riafi.
Verse: 85     In súslicha rédina   \   so sánt er zuelif thégana
Verse: 86     (ni thoh zi wóroltruame),   \   zéichan ouh zi dúanne;
Verse: 87     Thaz sie díufal fluhtin   \   in ármilichen súhtin,
Verse: 88     joh in állen nótin   \   húlfin io then líutin.
Verse: 89     Gibót thaz sie firnámin,   \   ouh wíht mit ín ni namin,
Verse: 90     tho zi thémo friste   \   in zi wégeneste
Verse: 91     Séchil noh thia málaha,   \   thaz sús sie fuarin thánana;
Verse: 92     noh óuh ni fúartin in thiu thíng   \   mit ín niheinan pénding;
Verse: 93     Thaz sie zi thíu gifiangin,   \   sus mit stábon giangin,
Verse: 94     mit gértun in henti   \   harto ílenti;
Verse: 95     Thaz síe ouh thes ni rúahtin,   \   zua dúnichun in súahtin,
Verse: 96     noh ouh in théra gahi   \   managfalt giscúahi.
Verse: 97     Déta in thaz zi núzze   \   thaz fuarin sie éinluzze
Verse: 98     untar wóroltmannon   \   zi súslichen thingon.
Verse: 99     "Wíht", quad, "ságen ih iu thaz,   \   ni nemet scázzes umbi tház,
Verse: 100     iu lazet únthrata   \   thero wóroltliuto míata.
Verse: 101     Éra thesses wérkes   \   gab ih iu mínes thankes,
Verse: 102     ir mir (wízut ir thaz)   \   ni gabut dróf umbi thaz;
Verse: 103     Ír ouh thaz ni wóllet   \   thaz ir zi thíu giganget,


p. 90v    


Manuscript page: 90v 
Verse: 104     odo ouh zi thíu giloufet   \   thaz ír es wiht firkóufet!"
Verse: 105     Bi súslicho dáti   \   so áhtun sin thio líuti;
Verse: 106     fáretun thes férahes   \   sine fíanta innan thés,
Verse: 107     Jóh sie datun mári   \   thaz er firnóman wari,
Verse: 108     joh er then díufal habeti   \   bi thíu thiz allaz sítoti.
Verse: 109     Tház firdruag er állaz   \   joh ouh méra ubar tház,
Verse: 110     al thiz úngimuati   \   thuruh síno guati;
Verse: 111     Thuruh sino mílti   \   was er in mámmunti,
Verse: 112     óugta in io in giwíssi   \   mihil súaznissi.
Verse: 113     Er ougta in ío filu frám   \   bi híu er hera in wórolt quam,
Verse: 114     mit wérkon in girihti   \   bi sinera éregrehti,
Verse: 115     Mit wérkon filu fóllon,   \   thoh sie óugtin argan wíllon,
Verse: 116     émmizen thiu ménigi   \   ávur thára ingegini.
Verse: 117     Níd filu hébigan   \   then firdrúag er allan;
Verse: 118     wanta nídigaz muat   \   hazzot émmizen thaz gúat,
Verse: 119     Hazzot ío thio gúati   \   thuruh úbarmuati,
Verse: 120     nintfáhent thés gilústi   \   thio ármilichun brústi.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.