TITUS
Otfrid von Weissenburg, Evangelienbuch
Part No. 73
Previous part

Chapter: 15  
p. 90v    

XV. AMBULABAT JESUS IN GALILEAM.


Verse: 1     Thie Júdeon méid er tho bi tház   \   thuruh then míchilan haz,
Verse: 2     wanta sie wárun thuruh nót   \   sines tóthes giéinot;
Verse: 3     In Gálilea er wóneta,   \   ni thóh thuruh thia fórahta,


p. 91r    


Manuscript page: 91r 
Verse: 4     er áltaz, sos er scólta,   \   unz er thia zít wolta.
Verse: 5     Sih náhtun eino zíti   \   thaz man tho fíroti
Verse: 6     eina wéchun thuruh nót,   \   so ther wízzod gibot,
Verse: 7     Thaz ther líut zi flíze   \   sazi wéchun úze
Verse: 8     mit spísono ginúhtin,   \   so in gibót ju druhtin.
Verse: 9     Iz ward ér ju, ana wán,   \   zi einen gihúgtin gidan,
Verse: 10     thera sámanungu   \   zi éineru mánungu,
Verse: 11     Tház sie thes irhógetin   \   joh iro múat io manotin,
Verse: 12     wio fon Egýpto fuarun   \   thie fórdoron iro wárun;
Verse: 13     Wío sie in thésa redina   \   warun ana sélida,
Verse: 14     in hútton giwaro   \   sazun fíarzug jaro.
Verse: 15     Tho bátun sine síbbon,   \   so ofto mága sint giwon,
Verse: 16     thén ist io gimúati   \   thero náhistono gúati;
Verse: 17     Lértun sie nan, einan rúam   \   thaz er gidáti imo, einan dúam,
Verse: 18     ímo ein gizámi   \   thaz er zeru fíru quami;
Verse: 19     Tház er thar giscéinti   \   thia sina gómaheiti,
Verse: 20     mit zéichonon gidáti   \   thaz inan ther líut irknati,
Verse: 21     Joh ouh thaz fólk instúanti   \   sínes selbes gúati,
Verse: 22     thie júngoron ouh irknátin   \   bi thésen selben dátin.
Verse: 23     "Ni dúit thaz", quadun, "íoman   \   ther sih ófonon scál,
Verse: 24     ér sar thes githénke,   \   gidóugno sulih wírke."


p. 91v    


Manuscript page: 91v 
Verse: 25     Ni gilóuptun, so se scóltun,   \   thie tház fon imo wóltun,
Verse: 26     in ímo was in méra   \   thisu wóroltera.
Verse: 27     Firságet er in thaz gizámi;   \   sin zít, quad, noh ni quámi,
Verse: 28     er sih mit gúalliche   \   iróugti in themo ríche.
Verse: 29     "Ni mag thiu wórolt, wizit tház,   \   haben in íu theheinan ház,
Verse: 30     in ábuh kéren zi iu thaz múat,   \   só ther liut zi mír duat.
Verse: 31     Wanta íh zellu in nóti   \   iro ármilichun dáti,
Verse: 32     thio míssidat, so ságen ih;   \   bi thiu inkúnnun sie mih."
Verse: 33     Quad thaz síe thara fúarin,   \   joh iro zítiz warin.
Verse: 34     sie síh tho sar irhúabun,   \   zen wíhen zitin fúarun.
Verse: 35     Er áfter thiu gidóugno,   \   nales ófono tho,
Verse: 36     fuar thára mit then sínen   \   zen stétin filu wíhen.
Verse: 37     Thie Júdeon ágaleizo   \   súahtun nan thar héizo,
Verse: 38     sie warun éisconti   \   war er wésan scolti.
Verse: 39     Thar ward thó, ih ságen thir,   \   múrmulunga míhil;
Verse: 40     spráchun thar tho hérton   \   míssilichen wórton.
Verse: 41     Súm fon imo záltun   \   thie thar wóla woltun,
Verse: 42     mit wórton joh mit múate   \   lóbotun nan zi gúate;
Verse: 43     Ándere thaz in záltun,   \   thie in ábuh woltun,
Verse: 44     quádun ni gisuíchi,   \   nub er then líut bisuichi,
Verse: 45     Joh ér se thes gibéitti,   \   zi áltere firléitti,


p. 92r    


Manuscript page: 92r 
Verse: 46     zi áltemo wéwen,   \   "oba síe mo wollent hóren."
Verse: 47     Ni spráchun thie thaz záltun,   \   thie sino gúati nantun,
Verse: 48     worton óffonoro   \   bi fórahtun thero Júdeono;
Verse: 49     Joh thaz héroti   \   sulih ni ábahoti,
Verse: 50     thaz ín iz ni wari zála,   \   thaz ságen ih thir in wára;
Verse: 51     Joh íagilih thes wángti,   \   in fíantscaf ni giángti
Verse: 52     in súlichemo nóte   \   fon themo hérote.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.