TITUS
Otfrid von Weissenburg, Evangelienbuch
Part No. 74
Previous part

Chapter: 16  
p. 92r    

XVI. JAM DIE FESTO MEDIANTE.


Verse: 1     Tho thiu wécha, so got gibót,   \   was hálbu gifírot,
Verse: 2     in thaz hús tho druhtin gíang   \   joh thar zi léru gifiang.
Verse: 3     Thar brédigota scóno   \   ther gotes sún frono
Verse: 4     thie líuti io thar bi nóti   \   joh selb thaz héroti.
Verse: 5     Sie tho wúntar gifiang,   \   so iz zi thíu tho gigíang;
Verse: 6     hintarquámun innan thés   \   thes sines wísduames
Verse: 7     Joh sinero kúnsti,   \   wio er thio búah konsti;
Verse: 8     hintarquámun thes ouh mér,   \   wanta er ni lérneta sio er.
Verse: 9     Ni sáhun sie nan sízen   \   untar scúalarin ér,
Verse: 10     noh klíban themo mánne   \   ther se inan lérti wanne.
Verse: 11     Drúhtin sprah tho zi ín sar   \   joh iróugta in thaz wár,
Verse: 12     yróugt er in thar filu frám,   \   wánana thiu frúma quam.
Verse: 13     "Thisu léra minu,   \   wízit, nist si mínu;


p. 92v    


Manuscript page: 92v 
Verse: 14     er thera léra weltit   \   fon thémo ih bin giséntit.
Verse: 15     So wér so wolle thénken,   \   then gótes willon wírken,
Verse: 16     joh húggen ío thuruh nót   \   thaz er sélbo gibót:
Verse: 17     Yrkénn er thesa léra   \   joh séhe tharána in wára:
Verse: 18     si fon góte queme thír,   \   od ih sia éigine mir.
Verse: 19     Ther fon ímo saget wáz,   \   ther súachit io thaz sínaz,
Verse: 20     wílit thes gigáhen,   \   thaz sínaz io gihóhen;
Verse: 21     Ther avur thára iz wéntit,   \   súachit thes nan séntit:
Verse: 22     ther férit iogilícho   \   in thiu giwáralicho.
Verse: 23     Móyses gab iu wízzod,   \   thes ni wírket ir drof,
Verse: 24     suntar get zisámane   \   inti rátet mih zirsláhanne.
Verse: 25     Giwisso wízit ir thaz:   \   Móyses er ni déta thaz,
Verse: 26     mit dátin odo mit wórton   \   mir wolti wídarwerton."
Verse: 27     Thó sprah thara ingégini   \   ávur thiu selba ménigi,
Verse: 28     liazun úz in waron   \   thes selben múates wewon.
Verse: 29     "Thu habes then díufal in thir;   \   giwísso, thaz firnémen wir!
Verse: 30     wér ist thes hiar thénke,   \   thaz thir tód giwirke?"
Verse: 31     Gab ántwurti er then líutin,   \   thoh síe nan ni éretin;
Verse: 32     er zálta bi hiu si es flízun,   \   joh uuáz sie imo alle wízun:
Verse: 33     "Ih deta ein wérk maraz,   \   giwisso wízit ir thaz,
Verse: 34     theih bi einan mán gimeinta,   \   in sámbazdag gihéilta.


p. 93r    


Manuscript page: 93r 
Verse: 35     Gibot Móyses, ir ni mídet,   \   nir iu kínd bisnidet;
Verse: 36     thaz gibót was thoh mér   \   bi alten fórdoron er.
Verse: 37     Wirdit tház ouh ana wán   \   ofto in sámbazdag gidán,
Verse: 38     zi thíu thaz sie giflízen,   \   thaz sin gibót ni slizen;
Verse: 39     Joh thaz ouh héili thanne   \   quéme themo mánne
Verse: 40     joh ouh sálida ginúag,   \   want es ther wízzod giwuag.
Verse: 41     Nu ir sámbazdag ni mídet,   \   nir iu kínd bisnídet,
Verse: 42     thaz man irfúlle thuruh nót,   \   so ther wízzod gibót:
Verse: 43     Ziu ist thánne iu wídarmuati   \   thísu selba gúati,
Verse: 44     theih einan mán allan   \   in thén dag deta héilan?
Verse: 45     Nirdeilet únrehto,   \   thaz iaman ádal ahto;
Verse: 46     duet rehtaz úrdeili   \   úns zuein hiar giméini!
Verse: 47     Zi ímo thih ni bílgis,   \   oba thu in sámbazdag thaz dúis;
Verse: 48     ouh ni bélget widar míh,   \   óba ih duan so sámalih."
Verse: 49     Quadun súmiliche   \   fon thémo selben ríche:
Verse: 50     "thíz ist then sie zéllent   \   joh then sie sláhan wollent!
Verse: 51     Er sprichit ófono hiar nu zi ín   \   joh filu báldo untar in;
Verse: 52     er dúit hiar untar ín then strít,   \   inti iro nihéin es wiht ni quít.
Verse: 53     Sie thaz ábahotun,   \   thaz sie then héime habetun
Verse: 54     then se er irsláhan woltun;   \   inti in nú sus gistíltun?
Verse: 55     Firsteit thaz héroti   \   thaz er si Kríst zi noti?


p. 93v    


Manuscript page: 93v 
Verse: 56     thaz mihil únredina íst;   \   wir wizun wóla, wanan er ist.
Verse: 57     Wir wizun in thía ahta   \   álla sina sláhta,
Verse: 58     fáter inti múater;   \   scolt ér sin Kríst guater?
Verse: 59     Thanne uns Kríst quimit héim,   \   ni weiz iz mánno nihein,
Verse: 60     thes kúnnes gizami,   \   wánana er selbo quámi."
Verse: 61     Riaf er thó ubarlút   \   thar iz hórta ther líut;
Verse: 62     quad inan irknátin untar ín:   \   "joh wizut wóla wanana ih bín.
Verse: 63     Wizit tház ouh filu frám,   \   theih fon mir sélbemo ni quám;
Verse: 64     ist wárhaft ther mih sánta,   \   ni wízut sin giwánta.
Verse: 65     Ni weiz íh inan thes thiu mín,   \   wánt ih ouh fon ímo bin,
Verse: 66     joh er mih sánta hera zíu;   \   ir ni gilóubet thoh bi thíu!"
Verse: 67     Fáhan sie nan wóltun   \   joh thóh in thes gistúltun;
Verse: 68     iz ouh wóla so gizám,   \   bi thiu sin zít noh ni quam.
Verse: 69     Fílu thero líuto   \   giloubta in drúhtinan tho,
Verse: 70     joh spráchun ouh in ríhti,   \   wio thaz wésan mohti
Verse: 71     Thaz selben Krístes guati   \   mera wúntar dati,
Verse: 72     méra gizami,   \   sar so er sélbo quami.
Verse: 73     Thie fúriston thaz gihórtun   \   joh ein giráti datun
Verse: 74     mit wórton tho ginúagi,   \   tház man nan gifíangi.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.