TITUS
Otfrid von Weissenburg, Evangelienbuch
Part No. 76
Previous part

Chapter: 18  
p. 95v    

XVIII. QUIS EX VOBIS ARGUET ME DE PECCATO?


Verse: 1     Untar wórton mánagen   \   joh thíngon filu hébigen
Verse: 2     mit sínes selbes máhtin   \   zi ín tho sprah sus drúhtin:
Verse: 3     "Wer íst", quad, "híar untar íu   \   thaz mih ginénne zi thíu,
Verse: 4     ther untar íu thaz wolle   \   thaz súnta in mih gizélle?
Verse: 5     Oba ih iu ságen hiar thaz wár,   \   bi híu ni gilóubet ir mir sár,
Verse: 6     bi hiu nintdúat sih iuer múat,   \   thar ih iu zéllu thaz guat?
Verse: 7     Ther fon góte ist, wizit tház,   \   ther horit wórt sinaz,
Verse: 8     joh rihtit ío filu frúa   \   sin selbes hérza tharzua.
Verse: 9     Ni bírut ir fon imo in wár,   \   bi thiu ni hóret ir iz sar,
Verse: 10     noh ni químit iu in múat   \   thaz sinaz mánagfalta guat."
Verse: 11     Bigondun sie ántwurten   \   wórton filu hérten,
Verse: 12     worton úngiringon   \   mit ímo thar tho thíngon.
Verse: 13     "Waz", quádun, "missiquédan wir,   \   oba ther díufal ist in thir?
Verse: 14     wir zéllen thir es ouh mér:   \   bist élibenzo frémider!"


p. 96r    


Manuscript page: 96r 
Verse: 15     "Wízit", quad er, "ubar ál   \   ni háben ih then díufal,
Verse: 16     gibórgen ih thes réino,   \   thaz ér nist min giméino,
Verse: 17     Suntar éren ubar ál   \   minan fáter so ih scál;
Verse: 18     thaz ni híluh iuih:   \   ir intéret avur mih!
Verse: 19     Ni súah ih hiar nu ríchi   \   noh mino gúallichi,
Verse: 20     min fáter thaz giméinit   \   joh er ouh sélbo irdeilit!
Verse: 21     Giwisso wízit ir thaz:   \   thie haltent wórt minaz,
Verse: 22     mit wíllen thaz irfúllent   \   thaz minu wórt in zellent --
Verse: 23     Ni fórahten sie then wéwon;   \   nirstérbent sie in éwon,
Verse: 24     ni wírdit in thaz úngimah,   \   so ih hiar míthont gisprah."
Verse: 25     Sie gabun ántwurti   \   mit grozeru úngiwurti,
Verse: 26     mit míchilemo níde   \   so wurtun sie úmblide:
Verse: 27     "Nu wízun wir waz iz íst:   \   thaz thu in únwizzin bíst,
Verse: 28     thaz wéltit thin ubar ál   \   sélber ther díufal!
Verse: 29     Ábraham ther máro   \   ther ist dót giwaro,
Verse: 30     thie fórasagon gúate   \   thie sínt ouh alle dóte;
Verse: 31     Thanne quístu ther gidúit   \   thaz thínaz wort giméinit,
Verse: 32     so wér so thaz biwérbe,   \   er íamer sar nirstérbe!
Verse: 33     Bistú nu zi wáre   \   furira Ábrahame?
Verse: 34     ouh thén man hiar nu zálta   \   joh sie álle tod bifálta?
Verse: 35     Nu bigín uns rédinon,   \   wémo thih wolles ébonon,


p. 96v    


Manuscript page: 96v 
Verse: 36     wénan thih zélles ana wán,   \   nu gene al éigun sus gidán?"
Verse: 37     Er gáb in thes mit thúlti   \   suazaz ántwurti,
Verse: 38     ríhta sies in war mín,   \   thoh wíht sies ni firnámin:
Verse: 39     "Óba ih mih mit rúachon   \   biginnu éino gúallichon,
Verse: 40     mit suórgon dúan ouh thanne tház,   \   thaz ist niwíht allaz.
Verse: 41     Min fáter ist ther tház giduat,   \   ther mir gifórdorot thaz gúat,
Verse: 42     gifórdorot er vóllon   \   then minan múatwillon;
Verse: 43     Then quedet ír, weist es mér,   \   thaz er si drúhtin unser;
Verse: 44     zi thíu ir inan nénnet   \   joh wíhtes thoh nirkénnet!
Verse: 45     Íh irkennu inan ío;   \   spríchu ih avur álleswio,
Verse: 46     bin ih thanne in lúginon,   \   gilicher íuen redinon;
Verse: 47     Ih wéiz inan giwísso,   \   thaz nist álles suntar só,
Verse: 48     joh ih in wára mina   \   gihaltu léra sina!
Verse: 49     Ábraham ther álto   \   er blídta sih thes hárto,
Verse: 50     er thés sih muasi frówon,   \   then mínan dag biscówon;
Verse: 51     Gisah er dág minan,   \   thes fréwita er húgu sinan;
Verse: 52     thes blídt er hérza sinaz,   \   giwisso wízit ir tház!"
Verse: 53     Sie namun thía meina   \   thes líchamen góuma,
Verse: 54     sáhun sinaz áltar;   \   bi thiu wás sies filu wúntar.
Verse: 55     "Thú ni bist giwáro   \   noh alter fínfzug jaro
Verse: 56     hiar untar wóroltmanne;   \   war sáhi thu inan thánne?"


p. 97r    


Manuscript page: 97r 
Verse: 57     Gab druhtin ántwurti   \   mit súazlicheru mílti,
Verse: 58     wólta thes bigínnan,   \   thaz muat zi wége bringan.
Verse: 59     Er huab in úf tho thaz múat,   \   so er uns émmizigen dúat,
Verse: 60     zi thes gótnisses gúati;   \   thaz was in úngimuati.
Verse: 61     "Ih ságen", quad, "iu in war mín:   \   er ímo so ịst thaz wésan min;
Verse: 62     íh bin mit giwúrti   \   er thannẹ ér io wurti.
Verse: 63     Warun zíti mino   \   er wúrtin io thio síno;
Verse: 64     min wésan, wízit ir tház,   \   er ímo filu rúmaz!"
Verse: 65     Ni móhta thó thaz iro múat   \   firdragan thaz éwiniga gúat,
Verse: 66     thia éwinigun léra;   \   wízist thaz in wára.
Verse: 67     Thaz stéinina hérza   \   rúarta tho thiu smérza,
Verse: 68     ruarta thó thiz selba léid   \   thaz émmizigen frúma meid.
Verse: 69     Námun sie tho stéina   \   sar io thío méina,
Verse: 70     thaz slíumo sies gihúlfin   \   joh inan ánawurfin;
Verse: 71     Thaz sie gikúaltin in thaz múat,   \   so man in fíante duat,
Verse: 72     in thiu giráchin iro zórn;   \   sie thahtun ér thes filu fórn.
Verse: 73     Gibárg er sih zi wáre   \   joh giang ouh úz tho sáre
Verse: 74     úzar iro hánton   \   fon sinen fíanton.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.