TITUS
Otfrid von Weissenburg, Evangelienbuch
Part No. 77
Previous part

Chapter: 19  
p. 97r    

XIX. MORALITER.


Verse: 1     Hiar mánot unsih druhtin Kríst,   \   so sin giwónaheit íst;
Verse: 2     hiar lérit unsih dát sin,   \   thaz wir thúltige sin.


p. 97v    


Manuscript page: 97v 
Verse: 3     Nist untar úns theiz thúlte,   \   thaz únsih íaman skélte,
Verse: 4     theist sar fílu rédii,   \   thaz wír thar sprechen wídari.
Verse: 5     Ni wollen óuh ubar tház   \   firdragan zórn nihéinaz,
Verse: 6     uns thúnkit in giwíssi,   \   thaz iz hónida si,
Verse: 7     Tház wir thes bigínnen,   \   wir hónida gihéngen,
Verse: 8     oda in thes wórtes wige   \   wiht íamanne firsuige.
Verse: 9     Thaz duat uns úbarmuati,   \   nálas unsu gúati,
Verse: 10     mihilu gélpfheit   \   joh unser hérza gimeit.
Verse: 11     Lérne hiar thia gúati,   \   wio unser drúhtin dati;
Verse: 12     sínes selbes mílti   \   joh muates mámmunti.
Verse: 13     Híar ist ana fúntan   \   thaz ér hiar ward biscóltan,
Verse: 14     joh er íro worto   \   intéret ward hiar hárto.
Verse: 15     Sie quátun io zi nóti,   \   thaz er then díufal hábeti;
Verse: 16     thaz firdrúag er allaz,   \   selbo lísist thu thir tház.
Verse: 17     Dét er ouh tho méra:   \   óugt in sina léra
Verse: 18     giwísso thara ingégini,   \   thár thera selbun ménigi.
Verse: 19     Sie iz allaz ábahotun   \   thie thár iz tho gihórtun,
Verse: 20     er wolta in ío mit wíllen   \   mámmonto gistíllen.
Verse: 21     Er zéigota in in alawár   \   thio sino éwinigi thár,
Verse: 22     thia sina hóhun gibúrt;   \   thaz wás in allen úngiwurt.
Verse: 23     Sie líafun zi iro stéinon   \   sar io thén meinon;


p. 98r    


Manuscript page: 98r 
Verse: 24     mit thén io thén wilon   \   so wóltun sie nan pínon!
Verse: 25     Tho méid er sie mit thúlti,   \   theiz uns zi frúmu wurti,
Verse: 26     thaz émmizen in nótin   \   wír so sáma datin.
Verse: 27     Ni wólt er wiht thes spréchan,   \   thoh ér sih mohti réchan,
Verse: 28     sie dúan ouh, obar wólti,   \   innan ábgrunti.
Verse: 29     Wír duen avur zi érist   \   só wir mugun wírsist;
Verse: 30     brístit uns thera dáti,   \   so thréwen wir zi nóti.
Verse: 31     Fúrira ist in wára   \   thiu drúhtines lera;
Verse: 32     so ih hiar fórna giwúag,   \   er sine fíanta firdrúag.
Verse: 33     Bílidon thaz ouh álle,   \   so wer so wóla wolle,
Verse: 34     so wér so thes githénke,   \   then díufal biskrénke!
Verse: 35     Thaz ist kúsgi joh ouh gúat;   \   habe mámmuntaz múat,
Verse: 36     in thíu ni giwánko,   \   thaz thir es gót githanko,
Verse: 37     Thaz er híar in libe   \   avur thír noh libe,
Verse: 38     thu thuruh thiu sínu bilidi   \   firdrégist thero manno frávili.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.