TITUS
Otfrid von Weissenburg, Evangelienbuch
Part No. 78
Previous part

Chapter: 20  
p. 98r    

XX. DE CAECO NATO.


Verse: 1     Gisah tho drúhtin einan mán   \   blíntan gibóranan;
Verse: 2     wás er fon gibúrti   \   in thera selbun úngiwurti.
Verse: 3     Frágetun tho thánana   \   thie síne holdun thégana,
Verse: 4     óba thiu selba blínti   \   fon súnton sinen wúrti,
Verse: 5     Odọ iz firwórahtin ouh ér   \   fáter inti múater,


p. 98v    


Manuscript page: 98v 
Verse: 6     sie fram so súntig warin   \   thaz súlih kind gibárin.
Verse: 7     Gab er tho wórton bliden   \   ántwurti then sínen,
Verse: 8     zálta in thịạ úngimacha,   \   thes sélben mannes sácha:
Verse: 9     "Ni sint theso úmmahti   \   tház er iz firwórahti,
Verse: 10     ni dátun ouh giwáro   \   iz wérk thero fórdorono;
Verse: 11     Suntar wárd iz bi thíu   \   (giwisso ságen ih iz iu),
Verse: 12     thaz wurti in ímo thuruh tház   \   gótes werk io scínaz.
Verse: 13     Mir límphit thaz ih thénke,   \   theih sinu wérk wirke,
Verse: 14     thes mih zi thíu wanta,   \   hera in wórolt santa;
Verse: 15     Unz ther dág scinit   \   joh náht inan ni rínit,
Verse: 16     noh mán ni thultit úmmaht   \   thera fínsterun naht.
Verse: 17     Thiu naht thiu químit ubar tház   \   (giwisso wízit ir thaz),
Verse: 18     thaz mán nist ther in gáhe   \   zi wérke gifáhe;
Verse: 19     Ódouh thurfi thénken,   \   thaz mégi er wiht giwírken
Verse: 20     in themo fínstarnisse;   \   thes sín sie ío giwísse.
Verse: 21     Unz íh bin hiar in wórolti,   \   so bin ih líoht beranti
Verse: 22     zi frónisgen thíngon   \   allen ménnisgon."
Verse: 23     Wóraht er tho ein hóro in war   \   mit sineru spéichelu sar;
Verse: 24     thaz kléibt er ímo, so er es ni bát,   \   in thero óugono stat.
Verse: 25     Nánt er ímo ein wázar,   \   hiaz faran wásgan iz thar,
Verse: 26     mit wásgu so iz gizámi,   \   thaz horo thána nami.


p. 99r    


Manuscript page: 99r 
Verse: 27     Er fuar sár so er es giwúag,   \   jóh thaz horo thána thuag,
Verse: 28     brahtạ imo sélben guat gimáh,   \   want er scóno gisah.
Verse: 29     Tho híntarquamun gáhun   \   thie nan ér gisahun;
Verse: 30     ni wóltun nan irkénnen   \   joh sús gistuantun zéllen:
Verse: 31     "Ist thiz ther bétalari in war   \   ther hiar saz blínter ubar jár,
Verse: 32     thér bi sino thúrfti   \   hiar deta uns ánaruafti?"
Verse: 33     Quadun súme thero knéhto:   \   "iz ist ther sélbo rehto
Verse: 34     (giwisso wízit ir tház),   \   ther blínter untar úns saz."
Verse: 35     Súme datun mári,   \   thaz iz thér ni wari,
Verse: 36     quádun iogilícho,   \   theiz wari sín gilicho.
Verse: 37     "Ih bín iz", quad er, "wizit tház,   \   ther blínt hiar bétolonti saz;
Verse: 38     ih io mit stábu noti   \   giang weges gréifonti
Verse: 39     Zi mánniliches wénti,   \   io brotes bétolonti,
Verse: 40     klágota io bi nóti   \   min selbes ármuati."
Verse: 41     Thio ármilichun wizzi   \   was thes tho fíriwizzi,
Verse: 42     was sies wúntar thrato,   \   joh frágetun thero dáto:
Verse: 43     "Ságe uns nu giwáro,   \   wio síhist thu so zíoro?
Verse: 44     joh wer thir dáti thia máht,   \   thaz thú so scono séhan maht?"
Verse: 45     "Thes zelluh íu", quad er, "giwánt:   \   then wír thar heizen héilant!
Verse: 46     íh wiht zímo thes ni spráh;   \   so er mih híar tho gisáh,
Verse: 47     Sar io thía warba   \   so spé er in thia érda,


p. 99v    


Manuscript page: 99v 
Verse: 48     githuar ein hóro thar in wár   \   inti kléipta mir tharána sar.
Verse: 49     So ih thaz hóro thana thúag,   \   thes er mir sélbo giwuag,
Verse: 50     so quam gisíuni míner;   \   theist gótes thang joh síner!"
Verse: 51     "Dua únsih", quadun, "wísi,   \   wár ther selbo mán si."
Verse: 52     er sar zi théra fristi   \   quad es wíht ni westi.
Verse: 53     Leittun sie nan ubar tház   \   thar thaz héroti was,
Verse: 54     thára zi themo thínge,   \   zi thero fúristono rínge.
Verse: 55     Thie búah duent thar mári,   \   theiz sámbazdag tho wári,
Verse: 56     tho Kríst thes wolta thénken,   \   thiz selba wúntar wirken.
Verse: 57     Tho frágetun thie fúriston   \   joh thie héreston,
Verse: 58     wío er in thera gáhi   \   so scóno gisáhi.
Verse: 59     "Ih sagen íu", quád er, "thaz ist wár:   \   er kléipta mir ein hóro thar,
Verse: 60     gisah ih sár so iz gizám,   \   so slíumo so ih iz thána nam."
Verse: 61     Sum quad er dáti widar gót,   \   joh er firbráchi sin gibót:
Verse: 62     "thaz sin únwizzi so wíalt,   \   thaz er then sámbazdag ni híalt."
Verse: 63     Thanne óuh fon ther ménigi   \   spráchun thara ingégini,
Verse: 64     (áhtotun iz réinor   \   joh hárto filu kléinor),
Verse: 65     Wio súntig man thaz móhti,   \   odouh zi thíu so dohti,
Verse: 66     thaz er in thérera noti   \   súlih zeichan dáti!
Verse: 67     Thar was strít umbi tház   \   joh gislíz hébigaz;
Verse: 68     thie úbile joh thie dóhtun,   \   sih giéinon thar ni móhtun.


p. 100r    


Manuscript page: 100r 
Verse: 69     Bigóndun thes tho bágen   \   joh genan ávur fragen,
Verse: 70     joh worton únsuazen   \   bigóndun inan grúazen:
Verse: 71     "Waz quis thú fon themo mán,   \   ther thir gilíubta so frám,
Verse: 72     ther thir so múatfagota,   \   thaz líoht thir heim gihólota?"
Verse: 73     "Er ist", quad, "gótes holdo,   \   thes zíhuh inan báldo,
Verse: 74     gihéizit mir thaz mínaz muat,   \   thaz er ist fórasago guat."
Verse: 75     Ni móhtun sie gilóuben   \   thia selbun dát ubar thén,
Verse: 76     thaz ér in thera gáhi   \   so níwanes gisáhi,
Verse: 77     Er thar zi stéti warun   \   thiu sélbun thiu nan bárun,
Verse: 78     fáter inti múater,   \   thar ouh ther sún guater.
Verse: 79     Sie híazun thiu gan fúri sar,   \   thaz siu gizáltin thaz wár,
Verse: 80     thaz siu álleswio ni dátin   \   in thíu sie nan irknátin.
Verse: 81     "Bigínnet", quadun, "scówon   \   giwáralichen óugon;
Verse: 82     ist thiz kínd iuer,   \   ther blínter ward gibóraner?
Verse: 83     Ir bédu datut mári,   \   thaz er tho blínt wari,
Verse: 84     joh ímo in thera frísti   \   thes gisíunes gibrústi.
Verse: 85     Nu ságet uns in thráti,   \   wer avur thíz dati,
Verse: 86     thaz ér nu mag giscówon   \   so lúteren óugon?"
Verse: 87     Bigóndun sie tho rénton   \   fórahtelen wórton,
Verse: 88     síe in thar tho zélitun,   \   wio síe iz firnoman hábetun:
Verse: 89     "Wir wízun, ságen wir iu éin,   \   thes nist lóugna nihein,


p. 100v    


Manuscript page: 100v 
Verse: 90     súlih so wir wárun,   \   thaz wir nan blíntan barun.
Verse: 91     Nist kúnd uns thaz giráti,   \   wer thiu óugun imo indáti;
Verse: 92     thes léwen ouh ni wóllen,   \   so wír iu hiar nu zéllen.
Verse: 93     Fraget ínan es in wár;   \   er hábet ju thaz áltar,
Verse: 94     thaz er in thésen thingon   \   firspréchan mag sih sélbon!"
Verse: 95     Thiu selbun ántwurti   \   gábun sie bi nóti,
Verse: 96     sie fórahtun in thráto   \   thérero selbun dáto.
Verse: 97     Ther liut déta, so man wéiz,   \   míhilan úrheiz,
Verse: 98     in thémo warun féste   \   wídar selben Kríste:
Verse: 99     So wér so thaz irwéliti,   \   zi Kríste nan gizéliti,
Verse: 100     er íamer sar bi nóti   \   iro thárbeti.
Verse: 101     Bi thiu wúrfun siu in ínan sar   \   thiu selbun ántwurti thar,
Verse: 102     wánta sie thaz fórahtun   \   thaz sie untar ín er wórahtun.
Verse: 103     Síe tho therero dáto   \   ángustitun thráto,
Verse: 104     wás in harto úngimah   \   thaz ther blínto gisah.
Verse: 105     Ladotun ávur tho then man   \   ther thes gisíunes biquam,
Verse: 106     quádun sih thera dáti   \   noh tho báz biknati.
Verse: 107     "Thank es góte filu frám,   \   ni kér iz ufan thésan man;
Verse: 108     wir wízun inan dáto   \   firdánan filu thráto."
Verse: 109     Er gab tho ántwurti   \   then líutin mit giwúrti,
Verse: 110     zálta wes er fúalta,   \   joh waz thar ínan ruarta;


p. 101r    


Manuscript page: 101r 
Verse: 111     Sih thar tho báldo firspráh,   \   ther er io mán ni gisah,
Verse: 112     fóra themo líute   \   mit míchilemo nóte.
Verse: 113     "Únkund ist mir thráto,   \   ob er si úbildato;
Verse: 114     rúerent mih in thráti   \   thio sino wóladati.
Verse: 115     Ih wánt ih scolti nóti   \   sin iamer mórnenti
Verse: 116     blíntilingon hóno;   \   nu síhuh afur scóno.
Verse: 117     Mir déta thaz gimúati   \   sínes selbes gúati,
Verse: 118     nam míh fon úmmahtin   \   bi sinen éregrehtin."
Verse: 119     Sie ávur tho ginóto   \   éiscotun thero dáto
Verse: 120     fon thémo selben wérke   \   fóra themo fólke,
Verse: 121     Wío mo so gizámi   \   gisíuni sin biquámi,
Verse: 122     joh séhentị avur wúrti   \   ther blínt was fon gibúrti.
Verse: 123     "Waz wollet ír nu", quad er, "thés?   \   ih ríht es iuih álles;
Verse: 124     waz scal es ávur thanne   \   nu so zi frágenne?
Verse: 125     Ih zalta iu nú thaz wára,   \   waz wóllet ir es méra?
Verse: 126     zíu sint iuo wízzi   \   thes mera fíruwizzi?
Verse: 127     Ir wóllet odo in wár min   \   werdan júngoron sin,
Verse: 128     thaz ír bi thaz so báget   \   joh émmizigen fráget!"
Verse: 129     Inbrústun sie zi nóti   \   tho sar in héizmuati,
Verse: 130     bigóndun imo thráto   \   flúachon tho ginóto.
Verse: 131     "Thú sis jungoro sín,   \   thaz quéme ouh thir in múat thin!


p. 101v    


Manuscript page: 101v 
Verse: 132     bimídan thu ni wólles,   \   suntar thụ ímo folges!
Verse: 133     Fólgen wir in wára   \   Móyseses léra,
Verse: 134     fullen wízzod sinan   \   joh wollen thésan midan.
Verse: 135     Wir wizun álle thaz gimáh   \   thaz got zi Móysese sprah,
Verse: 136     joh ougt er ímo follon   \   then sinan múatwillon.
Verse: 137     Wanana thérer avur íst,   \   thes wíht uns sar io kúnd nist;
Verse: 138     ni wízun wir in wára   \   sínes selbes fúara."
Verse: 139     Oba thu scówost thaz múat,   \   thánne nist thaz wórt guat,
Verse: 140     wanta wántun harto thés   \   thaz síe mo batin úbiles.
Verse: 141     In réhtemo múate   \   erge úns iz io zi gúate,
Verse: 142     thaz wír io muazin blíde   \   wesan scálka sine!
Verse: 143     Bigónd er in tho rédion   \   sélb these evangélion,
Verse: 144     joh mit thésen rédinon   \   sie ófono bredigon:
Verse: 145     "Thaz íst", quad er, "nu wúntar,   \   thaz ir nirknáhet then man,
Verse: 146     ther mir so frám giliubta,   \   thiu óugun mir inlíuhta.
Verse: 147     Wer horta ér io thaz gimáh?   \   ih sunnun ér ni gisah;
Verse: 148     thoh scówot ir nu álle,   \   theih síhụ al sosọ ih wílle.
Verse: 149     Ninthéizit mir iz muat mín,   \   ni ther fon góte sculi sín,
Verse: 150     es álleswio ni thénkit   \   ther súlih werk wírkit.
Verse: 151     Giwisso wéiz thaz unser múat,   \   wio got then súntigen duat,
Verse: 152     thaz ér se sar ni hórit,   \   ouh wiht sih zi ín ni kerit;


p. 102r    


Manuscript page: 102r 
Verse: 153     Er avur thémo liubit   \   ther sinan wíllon uabit,
Verse: 154     joh thémo ist io gimúati   \   ther wónet in ther gúati.
Verse: 155     Leset állo buah thio sín:   \   ni fíndet ir in war mín,
Verse: 156     fon éristera wórolti,   \   ther er io súlih worahti!
Verse: 157     Er ouh mit hórowe iz biklán,   \   ni giéiscotạ er thaz wóroltman;
Verse: 158     thaz dét er ouh tho súntar,   \   theiz wari méra wuntar.
Verse: 159     Ih ságen iu híar ubarlút:   \   ni wári therer gótes drut,
Verse: 160     fon ímo quami ouh súntar,   \   ni dát er sulih wúntar!"
Verse: 161     Sie irbúlgun sih in wára   \   thera frónisgun léra,
Verse: 162     thero scónero wórto;   \   sus spráchun zi imo ouh hárto:
Verse: 163     "Thú bist al hóner,   \   in súnton gibóraner,
Verse: 164     mit allen únredinon;   \   thu únsih thanne bredigon?"
Verse: 165     Sie inan slíumo tho in wár   \   wúrfun fon in úz sar,
Verse: 166     er íro sid zi nóti   \   íamer thárbeti;
Verse: 167     Joh er bi tház mari   \   firméinsamot wári,
Verse: 168     íamer giscéidan,   \   want er detạ in dág leidan.
Verse: 169     Drúhtin tho gihórta   \   wio er thar wérnota;
Verse: 170     joh ér bifand iz állaz,   \   thaz sie firwúrfun nan bi thaz. *
Verse: 171     So drúhtin inan tho gisáh,   \   er sélbo sar tho zi ímo sprah
Verse: 172     (thera séla deta er giméini   \   thes líchamen héili):
Verse: 173     "Gilóubistu in then gótes sun,   \   ther quam fon hímile herasun?"


p. 102v    


Manuscript page: 102v 
Verse: 174     gab er ántwurti thó   \   (was thes gisíunes filu fró):
Verse: 175     "Wer íst iz", quad er, "drúhtin,   \   theih mit gilóubu werde sín?"
Verse: 176     er sélbo, soso iz dóhta,   \   scónon es giríhta:
Verse: 177     "Iz ist in álanahi   \   tház thu nan gisáhi,
Verse: 178     joh ist, gilóubi thu mir,   \   ther hiar spríchit nu mit thir."
Verse: 179     "Jáh ih", quad er, "druhtin, dúan;   \   giloub ih fásto in thinan dúam!"
Verse: 180     frámhald fial tho thárasun   \   joh bétota then gótes sun.
Verse: 181     Si áhtun sin zi nóti   \   bi súslicho dáti,
Verse: 182     then níd gideta ouh méra   \   thiu fílu hoha léra.
Verse: 183     Sar after thén meinon   \   so wóltun sie nan stéinon;
Verse: 184     thaz ward ál io thuruh tház   \   want er in zálta wer er wás,
Verse: 185     Mit wórton iz giméinta,   \   mit zéichonon giscéinta;
Verse: 186     ál thaz iro frúma was --   \   sie ni rúahtun bi thaz.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.