TITUS
Otfrid von Weissenburg, Evangelienbuch
Part No. 79
Previous part

Chapter: 21  
p. 102v    

XXI. SPIRITALITER.


Verse: 1     Firlíhe mir nu selbo Kríst,   \   ther únser liobo drúhtin ist,
Verse: 2     thaz íh nu hiar giméine,   \   wénan ther mán bizeine
Verse: 3     Ther blínter ward gibóraner   \   joh wíht ni mohta séhan ér,
Verse: 4     er ther súntoloso mán   \   thaz hóro in thiu óugun giklan;
Verse: 5     Er ér zi thíu iz gifiarta,   \   mit hánton sinen rúarta
Verse: 6     thes bétalares óugon,   \   thaz ér sid mohti scówon.
Verse: 7     Allaz mánkunni   \   thaz thúlta grozo grúnni,


p. 103r    


Manuscript page: 103r 
Verse: 8     ouh ubar mánag úbilaz   \   fínstarnissi séraz;
Verse: 9     Súnta filu suáro,   \   thaz ságen ih thir giwáro,
Verse: 10     ni líazun se unsih frówon,   \   thaz rehta líoht biscowon.
Verse: 11     Thiu blínti uns, wan ih, wúrti   \   fon Ádames gibúrti,
Verse: 12     ouh ménnisgon állen   \   fon súnton then wir fállen.
Verse: 13     Gisáh tho druhtin nóti,   \   thio unsero ármuati,
Verse: 14     thio blíntun gibúrti,   \   er uns ginádig wurti.
Verse: 15     Nót héiz ih hiar tház,   \   want es rát tho ni wás,
Verse: 16     lába noh gizámi,   \   fon ímo uns iz ni quámi.
Verse: 17     Tho ward thaz wórt sinaz   \   zi líchamen gidánaz,
Verse: 18     zi fléisges giscéftin   \   mit állen sinen kréftin.
Verse: 19     Tho er zi thíuz gifíarta,   \   mit súlichu unsih rúarta,
Verse: 20     mit síneru gibúrti,   \   theiz uns zi frúmu wurti:
Verse: 21     Thie dáti uns wola tóhtun,   \   joh sid giséhan mohtun,
Verse: 22     inlíuhte giwísse   \   fon themo alten fínstarnisse.
Verse: 23     Mánnilih nu lóufe   \   zi thémo sconen dóufe,
Verse: 24     thara inan Kríst tho wánta   \   joh sélbo thara sánta.
Verse: 25     Wízist tház in alawár:   \   thaz wazar héizit ouh so thár,
Verse: 26     wanta Kríst es weltit,   \   ther héra ward giséntit;
Verse: 27     Ni wurti mán niheiner   \   fon súnton sinen héiler,
Verse: 28     ther fáter nan ni sánti   \   joh hera in wórolt wanti.


p. 103v    


Manuscript page: 103v 
Verse: 29     Inliuht er únsih filu frám   \   jóh er hera in wórolt quam,
Verse: 30     thaz uns thiu sín guati   \   thiu óugun indáti;
Verse: 31     Tház wir thaz irkántin   \   wara wir gángan scoltin,
Verse: 32     pédin in giríhti   \   zi sinerụ éregrehti;
Verse: 33     Joh wír nan muazin scówon   \   óffenen óugon,
Verse: 34     indánemo ánnuzze,   \   thaz uns iz wóla sizze;
Verse: 35     Ófenemo múate,   \   theiz úns irge zi gúate,
Verse: 36     mit thes hérzen ougon   \   muazin íamer scówon! Amen.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.