TITUS
Otfrid von Weissenburg, Evangelienbuch
Part No. 80
Previous part

Chapter: 22  
p. 103v    

XXII. FACTA SUNT ENCAENIA.


Verse: 1     Gistúantun in thera náhi   \   thes gótes huses wíhi,
Verse: 2     thio sélbun hoho zíti   \   fírotun thie líuti;
Verse: 3     Ther evangélio thar quít,   \   theiz wari in wíntiriga zít,
Verse: 4     thisu dát ubar ál   \   thia íh iu hiar nu ságen scal.
Verse: 5     Giang tho drúhtin innan thés   \   in pórziche thes húses;
Verse: 6     ther námo detaz mári,   \   er Sálomones wári;
Verse: 7     Thaz móhta sin in wári   \   thúruh sina zíari,
Verse: 8     thaz man zi thíu nan zelita,   \   then námon imo irwélita.
Verse: 9     Thie Júdeon nan bistúantun,   \   ni wéstun was sie fúartun;
Verse: 10     sprachun zi ímo in fárun,   \   so sie giwón warun:
Verse: 11     "Wio lángo so firdrágen wir   \   thaz thu unsih spénis sus zi thír,
Verse: 12     sus nimis éinizzen?   \   wil thu íamer thes írwizzen?


p. 104r    


Manuscript page: 104r 
Verse: 13     Oba Kríst si námo thin,   \   thaz laz thanne ófanaz sin;
Verse: 14     thaz gizél uns hiar nu sár,   \   thaz wir wízin thaz war!"
Verse: 15     "Ob ih iz ságen", quad er, "íu,   \   ir ni gilóubet thoh bi thíu;
Verse: 16     ni firnímit iuer múat,   \   thanne ih iu zéllu thaz gúat.
Verse: 17     Thiu wérk thiu ịh wírku innan thés   \   in namon fáter mines,
Verse: 18     irgéhent iogilícho   \   mih filu fóllicho.
Verse: 19     Ir ni gilóubet thoh thiu hált   \   thaz ist iu ófto gizált;
Verse: 20     giwísso ni bírut ir   \   thero ih irwéllu zi mir!
Verse: 21     Thie ih zi thíu gizellu   \   joh súntar mir irwéllu:
Verse: 22     thie eigun mín io mínna   \   joh hórent mina stímma;
Verse: 23     Íh ouh sie irkénnu,   \   joh fólgent mir mit mínnu,
Verse: 24     gíbuh ouh in war mín   \   thaz éwiniga líb in.
Verse: 25     Ni firwérdent sie in éwon,   \   firmídent ouh then wéwon,
Verse: 26     sint fásto ana enti   \   in mínes selbes hénti;
Verse: 27     Ni nímit se ménnisgen ház   \   (giwisso wízit ir thaz)
Verse: 28     unz anan wóroltenti   \   fon mines fáter henti!
Verse: 29     Thes fáter min mir gịónsta,   \   theist álles guates fúrista;
Verse: 30     nist tház sih io giébono   \   thera sínera gifti frúmono.
Verse: 31     Íh inti fáter min   \   joh thiu éwinigi sín
Verse: 32     (ni mithuh íuer nihéin) --   \   ist únker zueio wésan ein."
Verse: 33     Ther liut thia sprácha al firdrúag,   \   unz sin wórt tho thés giwuag;


p. 104v    


Manuscript page: 104v 
Verse: 34     tho íltun sar bi nótin,   \   thaz sie nan stéinotin.
Verse: 35     Ér gab tho mit thúlti   \   then liutin ántwurti,
Verse: 36     lerta sie ávur tho thaz gúat   \   joh kert in frámmort thaz múat.
Verse: 37     "Ih ougta iu", quad, "gimýatu   \   manigu wérk guatu,
Verse: 38     fon mines fáter guati   \   súazlicho dáti;
Verse: 39     Min áhtet ir mit nídu   \   thuruh thiu wérk minu,
Verse: 40     íagilih bi mánne   \   mit iuomo stéinonne!"
Verse: 41     Mit úbilemo wíllen   \   joh múoton filu fóllen
Verse: 42     bigóndun sie sih réchan   \   joh ávur zimo spréchan:
Verse: 43     "Ni dúen wir bi thia gúati   \   thir thaz wídarmuati,
Verse: 44     wir dúen iz mer thíu halt   \   wanta spríchist thaz ni scált.
Verse: 45     Thu bist mán éinfolt,   \   thu quist thu wéses avur gót;
Verse: 46     ebonot thin únfruati   \   sih drúhtines gúati!"
Verse: 47     Unser drúhtin ni thiu mín   \   sprah thaz réhta thar tho zi ín,
Verse: 48     er síe thar tho mánota   \   waz thes ther wízzod sageta.
Verse: 49     "Iuo búah", quad, "wéizent   \   thaz mán ouh góta heizent;
Verse: 50     giwisso ságen ih iz iu,   \   thaz man sie nénnit thar zi thíu.
Verse: 51     Nu thie zi góte sint ginánt,   \   thie búent hiar thiz wóroltlant,
Verse: 52     then gótes wort gizáltun   \   waz siẹ ịu io ságen scoltun;
Verse: 53     Ouh mán nihein ni lóugnit,   \   thaz giscríb iu thar giquít,
Verse: 54     niz allo wóroltfristi   \   si io filu fésti:


p. 105r    


Manuscript page: 105r 
Verse: 55     Then got wíhan nanta   \   inti héra in wórolt santa,
Verse: 56     gab sine ségena alle   \   in ínan filu fólle --
Verse: 57     Ir quédet thaz thiu wórt min   \   widar drúhtine sin,
Verse: 58     tház ih thes ginéndu,   \   mih gótes sún nennu?
Verse: 59     Ni dúan ih sinu wérk iu:   \   ir ni gilóubet thoh bi thíu,
Verse: 60     nóh ir thes ni fáret,   \   ir iuih thára keret;
Verse: 61     Ob íh avur thénku   \   theih sinu wérk wirku:
Verse: 62     ob íh ni bin iu thráti,   \   gilóubet thoh thera dáti;
Verse: 63     Tház ir thaz irkénnet   \   joh ouh gilóuben wollet,
Verse: 64     thaz wir éin sculun sin,   \   íh inti fáter min!"
Verse: 65     Fáhan sie nan wóltun,   \   tho sinu wórt thiz zaltun:
Verse: 66     er giang sar thén stunton   \   úzar iro hánton.
Verse: 67     Tho thaz ward állaz so gidán,   \   so fúar er ubar Jórdan,
Verse: 68     sie thar gisuáso warin   \   unz sino zíti quamin.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.