TITUS
Otfrid von Weissenburg, Evangelienbuch
Part No. 81
Previous part

Chapter: 23  
p. 105r    

XXIII. ERAT QUIDAM LANGUENS LAZARUS.


Verse: 1     Iro ist fílu thrato,   \   thero drúhtines dato,
Verse: 2     joh mánagfalt ouh mánne   \   al zi zéllenne;
Verse: 3     Thoh wílluh hiar nu súntar   \   zéllen einaz wúntar;
Verse: 4     iz íst, thaz ni hílih thih,   \   then ánderen allen úngilih.
Verse: 5     Lázarus ther gúato   \   ward kúmig filu thráto
Verse: 6     kréftigera súhti   \   joh grozera úmmahti.
Verse: 7     Thir zell ih híar ubarlút:   \   er was Kríste filu drút,


p. 105v    


Manuscript page: 105v 
Verse: 8     er was síner liobo,   \   thes síst thu mir gilóubo.
Verse: 9     Er was fon kástelle,   \   thaz wízun wir ouh álle,
Verse: 10     thar Mártha was joh Mária,   \   joh héizit ouh Bethánia.
Verse: 11     Thiz was, wízist thu thaz,   \   thiu jú intbánt thaz ira fáhs,
Verse: 12     joh wás iru thaz súazi,   \   mit thiu suárb si Kristes fúazi.
Verse: 13     Waz mag ih zéllen thir es mér?   \   thaz wárun sino suéster;
Verse: 14     habetun Krístes minna,   \   sin selbes drútinna.
Verse: 15     Sie sántun bi then brúader   \   zi Kriste kúnden iro sér;
Verse: 16     wás in thar ginúagi,   \   man ékrod es giwúagi,
Verse: 17     Er ékrodi thaz wésti   \   sar zi théru fristi,
Verse: 18     thia úmmaht thiạ er thar thóleta,   \   then er so mínnota.
Verse: 19     "Níst", quad er, "thiu úmmaht   \   so fram zi tód imo bráht,
Verse: 20     io so in álawari   \   zi drúhtines díuri;
Verse: 21     Thaz in thera úmmahti   \   thes gótes sunes máhti
Verse: 22     wérthen filu máro,   \   thaz wízit ir giwáro."
Verse: 23     Hábetạ er in war mín   \   minna líublicho sín
Verse: 24     joh théro zueio wíbo;   \   thes síst thu mir gilóubo.
Verse: 25     So drúhtin tho gihórta   \   thaz er so zórkolota,
Verse: 26     tho inthábet er sih sár   \   giwísso zuene dága thar.
Verse: 27     Er sprah zen júngoron thó:   \   "wísomes thero Júdono!
Verse: 28     farames ávur thara zi ín   \   hína in iro lánt in!"
Verse: 29     Spráchun tho mit mínnon   \   thie síne liobon hóldon


p. 106r    


Manuscript page: 106r 
Verse: 30     (si erquámun odo in thráti   \   thera érerun dáti):
Verse: 31     "Méistar", quádun, "hugi thés:   \   sie fárent thines férehes
Verse: 32     mit selb stéinonne;   \   nu súachist sie afur thánne?"
Verse: 33     "Ja sínt", quad er, "bi nóti   \   zuelif dágo ziti,
Verse: 34     thio iro stúnta werbent   \   joh themo dáge folgent.
Verse: 35     So wer so dáges gengit,   \   giwísso er ni firspírnit,
Verse: 36     want ér sih mit then óugon   \   fórna mag biscówon;
Verse: 37     Drof ni zuívolot ir thés,   \   bigínnit er es náhtes,
Verse: 38     ni er blíntilingon wérne   \   joh séro firspúrne!
Verse: 39     Mír", quad er, "so fólge   \   ther réhto gangan wólle,
Verse: 40     giwissọ io in álathrati   \   so scóuu er mín girati!"
Verse: 41     Sprah tho drúhtin ubarlút   \   bi then sínan siachan drút,
Verse: 42     wórton ouh tho blíden   \   zen júngoron sínen:
Verse: 43     "Ther unser fríunt guato   \   sláfit nu gimúato;
Verse: 44     wir scúlun nan irwéken,   \   fon themo sláfe irréken."
Verse: 45     "Wóla ist, druhtin", quadun, "tház!   \   thanne wírdit imo báz;
Verse: 46     nu quimit líhtida imon múat,   \   so ofto síochemo dúat."
Verse: 47     Sie wántun druhtin méinti,   \   er sinan sláf zeinti;
Verse: 48     er selbo méinta avur tház   \   tház er tho bilíban was.
Verse: 49     Det er ófan in tho sár   \   wio bi nan gilégan was thaz wár.
Verse: 50     "ih wille iu iz zéllen", quad er, "ér:   \   ist Lázarus bilíbaner.
Verse: 51     Thoh will ih fréwen es nu míh   \   giwísso thuruh iuih,


p. 106v    


Manuscript page: 106v 
Verse: 52     thaz ir gilóubet bi thíu   \   wanta ih híar nu wás mit iu;
Verse: 53     Joh wéiz thoh thia gimácha,   \   sínes selbes sácha,
Verse: 54     wio iz állaz fuar tháre;   \   thaz ságen ih iu zi wáre.
Verse: 55     Thóh er nu bilíban si,   \   farames thóh thar er sí;
Verse: 56     zi thíuz nu sar gilígge,   \   thoh er bigrában ligge."
Verse: 57     Quad Thómas, ein thero knéhto:   \   "farames wír ouh rehto,
Verse: 58     nu er so wílit selbo in wár,   \   irstérbemes mit ímo thar!
Verse: 59     Nu er then tód suachit,   \   thes líbes ouh ni rúachit:
Verse: 60     nu simes gárawe alle   \   mit ímo zi themo fálle!"


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.