TITUS
Otfrid von Weissenburg, Evangelienbuch
Part No. 82
Previous part

Chapter: 24  
p. 106v    

XXIV. VENIT ERGO JESUS ET INVENIT EUM QUATUOR DIES [JAM HABENTEM].


Verse: 1     Quám tho druhtin héilant   \   thara in Júdeono lant,
Verse: 2     thar ther sin fríunt was ju ér,   \   lag fíardon dag bigrábaner;
Verse: 3     Quam ménigi thero Júdeono ér,   \   dróstun thar thio suéster,
Verse: 4     bátun sie in gistúltin   \   fon then únthultin.
Verse: 5     Mártha thiu gúata,   \   so síu thia kúnft gihórta,
Verse: 6     firliaz si sár thia menigi   \   joh ilta Kríste ingégini.
Verse: 7     Héime * saz thiu suéster   \   inti kúmta thaz sér,
Verse: 8     wéinota iogilícho   \   then bruader jámarlicho,
Verse: 9     Giwisso thár untar ín   \   sérlichen záharin,
Verse: 10     séragemo múate;   \   irgíang iruz zi gúate.
Verse: 11     Mártha sih tho kúmta,   \   so si zi Kríste giilta,
Verse: 12     sérlichero wórto;   \   sia rúartaz filu hárto.


p. 107r    


Manuscript page: 107r 
Verse: 13     "Drúhtin", quad si, "quamist thu ér,   \   wir ni thúltin thiz sér;
Verse: 14     ginádaz thin ni hángti   \   thaz tód uns sus io giángti;
Verse: 15     Theiz io zi thíu irgiangi,   \   sus náh er uns gifíangi,
Verse: 16     sus léides unsih fúlti   \   joh serera únthulti!
Verse: 17     Wéiz ih thoh in thráti,   \   thoh si thin kúnft nu spati,
Verse: 18     thaz got ist álles thir gilós   \   so wés so thu nan férgos;
Verse: 19     Joh állaz thin giráti   \   frúmit sar zi státi,
Verse: 20     állaz so thir líob ist   \   joh so thu sélbo giquíst."
Verse: 21     "Ni láz thir iz", quad er, "sér,   \   irsténtit ther thin brúader;
Verse: 22     zi líb er so gikérit,   \   thaz múat sih thin ni sérit."
Verse: 23     "Iz ist, drúhtin", quad si, "só,   \   gilóubu ih thaz giwísso,
Verse: 24     theiz ouh ínan ni firgéit,   \   thann éllu worolt úf steit."
Verse: 25     Sprah tho drúhtin zi iru sár   \   (thaz wír gilouben álawar,
Verse: 26     joh ellu wórolt ubar ál   \   in hérzen thaz io háben scal):
Verse: 27     "Ih bin irstántnissi,   \   thaz wízist thu in giwíssi;
Verse: 28     bin líb ouh filu fésti   \   zi éwinigeru frísti.
Verse: 29     So wér so in mih gilóubit   \   (theist álles guates hóubit!),
Verse: 30     zi líb er thoh biwírbit,   \   síd er hiar irstírbit;
Verse: 31     Inti álle, thaz ni híluh thih,   \   thie gilóubent in mih
Verse: 32     (ni fórahti drof then wéwon!) --   \   nirstírbit er in éwon.
Verse: 33     Gilóubist thu, so ih zéllu,   \   thiu minu wórt ellu?"
Verse: 34     "sint, drúhtin", quad si, "fésti   \   in mines hérzen brusti;


p. 107v    


Manuscript page: 107v 
Verse: 35     Gilóub ih thaz gimúato,   \   thaz thu bist Kríst ther gúato,
Verse: 36     gótes sun gizámi,   \   thu hera in wórolt quami."
Verse: 37     So si tház gizelita,   \   thia suéster si sar hóleta:
Verse: 38     "ther méistar", quad si, "híar ist,   \   gibót thir thaz thu quámist."
Verse: 39     Úf irstuant si snéllo,   \   thaz déta ru ther wíllo;
Verse: 40     ni déta si thes tho bíta,   \   si slíumo zi imo giílta.
Verse: 41     Ni quám noh tho unser drúhtin   \   in thaz kástel ín;
Verse: 42     er noh sih thár inthabeta   \   thar imo Mártha gaganta.
Verse: 43     Quam then Júdeon thaz in múat   \   thaz sí so gahun úf irstuant,
Verse: 44     sie ouh zi thíu gifiangun   \   joh after íru giangun;
Verse: 45     Quádun, silti lóufan   \   zi themo grábe wuafan,
Verse: 46     tház si thes giflízzi,   \   sih sáta thar girúzzi.
Verse: 47     Si zi fúaze Kriste fíal,   \   unz thaz múat iru so wíal;
Verse: 48     mit záharin sí thie bigóz,   \   thar si then brúader liobon róz.
Verse: 49     Iróugta si tho seraz múat,   \   so wib in súlichu ofto dúat
Verse: 50     (irbéit si thes er kúmo);   \   joh sprah zi drúhtine thó:
Verse: 51     "Wárist thu híar, druhtin Kríst,   \   ni thúltin wír nu thesa quíst;
Verse: 52     ther brúader min nu lébeti,   \   joh ih thiz léid ni habeti!"
Verse: 53     Intsúab er tho thaz úngimah,   \   so er sa ríazan gisah;
Verse: 54     thie líuti ouh ruzun álle   \   thie quámun zemo thínge.
Verse: 55     Thar stúantun thio gisuéster   \   saman, wéinotun thaz sér;
Verse: 56     óugtun thar thia smérza,   \   thaz íro sera hérza.


p. 108r    


Manuscript page: 108r 
Verse: 57     Ther fúrist ist alles gúates,   \   sih drúabta tho thes múates;
Verse: 58     sih záharin er ninthábeta   \   thar man then brúader klagota.
Verse: 59     Thaz drúhtin ouh giscéinta   \   waz er mit thíu meinta,
Verse: 60     thaz ínan so ginóto   \   irbármeta ther dóto:
Verse: 61     Gibót er sie mo zélitin,   \   wára sie nan légitin.
Verse: 62     "drúhtin", quadun se sár,   \   "sélbo mahtuz séhan thar."
Verse: 63     Quam tho drúhtin unser   \   thara ríazenter,
Verse: 64     thára zi themo líoben man   \   thár er lag bidólban.
Verse: 65     Thár lag oba félisa,   \   so nóh nu in lantẹ ist wísa,
Verse: 66     búrdin filu suáru,   \   thaz ságen ih thir zi wáru.
Verse: 67     Wás tho thar ingégini   \   hárto mihil ménigi,
Verse: 68     líutes filu thráto;   \   in mítten lag ther dóto.
Verse: 69     Then jámar allan sáhun   \   thie míthont quamun gáhun;
Verse: 70     thaz úngimah so rúarta   \   thie síne selbes fríunta.
Verse: 71     Tho áhtotun thie líuti   \   wio er nan mínnoti,
Verse: 72     tho sie in álagahun   \   thie záhari gisáhun.
Verse: 73     Tho sprachun súmiliche   \   óuh ir themo ríche
Verse: 74     (in ábuh sie iz kértun,   \   so sie thíz gihortun;
Verse: 75     Sie áhtotun thaz sinaz sér),   \   bi hiu er ni bidráhtot iz ér;
Verse: 76     bi híu er sih thes léides   \   er ni wárnoti les;
Verse: 77     Bi híu er ni biwúrbi   \   thaz ther sin fríunt nirstúrbi,
Verse: 78     ther kreftig ér was so frám,   \   then blínton deta séhentan!


p. 108v    


Manuscript page: 108v 
Verse: 79     Tho drúhtin mit then óugon   \   thaz gráb bigonda scówon,
Verse: 80     worton blídlichen   \   spráh er tho zen sínen:
Verse: 81     "Nemet thána sar then stéin   \   joh sliumo dúet inan in éin;
Verse: 82     inthéket mir thaz kétti,   \   thes mines fríuntes betti!"
Verse: 83     "Drúhtin", quad thiu suéster,   \   "ther líchamo ist ju fúler
Verse: 84     (bi thiu zélluh thir iz ér),   \   ist fíardon dag bigrábaner."
Verse: 85     "Thih deta ih míthont", quad er, "wís,   \   oba thu gilóubis,
Verse: 86     thaz thu gisíhis gotes kráft   \   joh selben drúhtines máht."
Verse: 87     Sie namun thána thuruh nót   \   then selbon stéin so er gibot;
Verse: 88     thaz gráb sie thar indátun,   \   so sinu wórt giquatun.
Verse: 89     Stúant er thar tho nídare,   \   huab thịụ óugun uf zi hímile,
Verse: 90     zi thes fater bárme filu frám,   \   thánana er hera in wórolt quam.
Verse: 91     "Fáter", quad, "thir thánkon   \   mit wórton joh mit wérkon,
Verse: 92     thaz thu émmizen io fóllon   \   irfúllis minan wíllon.
Verse: 93     Ih hábetạ iz io giwíssaz,   \   fater, ságen ih thir tház,
Verse: 94     thaz thu álleswio ni dáti,   \   ni si ál sos ih thih báti;
Verse: 95     Thoh zélluh thino gúati   \   thúruh these líuti:
Verse: 96     sie wízin thu mih sántos   \   joh hera in wórolt wantos."
Verse: 97     Er sprah tho wórton lúten   \   thára zi themo dóten,
Verse: 98     zi themo fúlen thegane,   \   er stúantị ir themo légare;
Verse: 99     Joh er wúrbi thuruh nót   \   fon béche hera wídorort,
Verse: 100     fon héllono thiote   \   avur zi thésemo liohte.


p. 109r    


Manuscript page: 109r 
Verse: 101     Quek ward sár imo thaz múat,   \   jóh fon themo gráb er stuant
Verse: 102     mit láchanon biwúntan   \   joh fúnon so gibúntan.
Verse: 103     "Inbintet ínan", quad er sár   \   tho zen júngoron thár,
Verse: 104     "sliumo irlóset inan thés,   \   thaz gé er sines síndes."
Verse: 105     Mánage thie thar quámun,   \   then wibon dróst ouh warun,
Verse: 106     gilóubtun sar io gáhun,   \   so sie tho thíz gisahun.
Verse: 107     Bigondun súmẹ iz zellen   \   mit úbilemo wíllen
Verse: 108     then fúristen éwarton   \   zórnlichen wórton
Verse: 109     Joh themo hérote   \   állemo io zi nóte;
Verse: 110     so slíumo sie iz gihórtun,   \   iz allaz ábahotun,
Verse: 111     Ángustitun thráto   \   thérero selbun dáto.
Verse: 112     thir zéll ih hiar nu súntar:   \   was hárto in leid thaz wúntar.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.