TITUS
Otfrid von Weissenburg, Evangelienbuch
Part No. 87
Previous part

Chapter: 2  
p. 115r    

II. ANTE SEX DIES PASCHAE VENIT JESUS BETHANIAM.


Verse: 1     Tho drúhtin thaz giméinta,   \   er thesa wórolt heilta,
Verse: 2     then ménnisgon in nóti   \   ouh tho ginádoti;
Verse: 3     So er thára iz tho bibráhta   \   thaz sih thiu zít náhta,
Verse: 4     er únsih tho gidrósti,   \   fon fíanton irlósti:
Verse: 5     Séhs dagon fora thíu   \   quám er zi Bethániu,
Verse: 6     thar er fon tóthe irwácta,   \   Lázarum irquícta.
Verse: 7     Tho zemo ábande sár   \   gáretun sie sin múas thar;


p. 115v    


Manuscript page: 115v 
Verse: 8     fró wárun sie sín,   \   ther wíllo deta iz fílu scin.
Verse: 9     Mártha thiu gúata   \   thar tho thíonota,
Verse: 10     si scóno iz al bitháhta,   \   thaz muas fúribrahta.
Verse: 11     Ni wáni si ouh thes wánkti   \   ni si thar giscánkti,
Verse: 12     thaz iz ál gizámi   \   drúhtine biquámi.
Verse: 13     Lázarus er was iro éin   \   then thiu sálida giréim,
Verse: 14     thaz thar zi dísge sazin,   \   mit imo sáman azin.
Verse: 15     Nám Maria nárdon   \   fílu diuren wérdon
Verse: 16     (was íru thaz thíonost suazi),   \   thia góz si in sine fúazi.
Verse: 17     So siu thaz sálbon tho biwárb,   \   mit iru fáhse sie gisuárb
Verse: 18     thie selben fúazi frono,   \   mit lócon iro scóno.
Verse: 19     Thiu díuri thera sálba   \   stank in álahalba,
Verse: 20     irfúlta thiu ira gúati   \   thes selben húses witi.
Verse: 21     Tház bisprah tho Júdas,   \   ther io in themo árgeren was;
Verse: 22     quad mán sia mohti scíoro   \   firkóufen filu díuro,
Verse: 23     In thíu man thaz irwéliti,   \   man árme miti nériti,
Verse: 24     jóh man thes gihógti,   \   ouh nákote githágti;
Verse: 25     Ouh thén thar after lánte   \   farent wállonte,
Verse: 26     tház man then in nóti   \   mit thiu ginádoti.
Verse: 27     Thóh er thaz tho quáti,   \   ni dét er iz bi gúati,
Verse: 28     odo ínan thie ármuati   \   wiht irbármeti.


p. 116r    


Manuscript page: 116r 
Verse: 29     Er was thíob hébiger   \   joh sékilari síner;
Verse: 30     wolt ér thar waz irscáboron,   \   bi thiu bigán er sulih rédinon.
Verse: 31     "Láz sia", quad ther méistar,   \   "duan thiu wérk thiu si bigán,
Verse: 32     thaz siu iz nirfúlle nu thiu mín;   \   ni múaz si, sih bigrában bin.
Verse: 33     Mit iu éigut ir ginúhto   \   io ármero wíhto;
Verse: 34     náles avur míh in war   \   ni éigut émmizigen hiar."


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.