TITUS
Otfrid von Weissenburg, Evangelienbuch
Part No. 90
Previous part

Chapter: 5  
p. 118v    

V. SPIRITALITER.


Verse: 1     Hiar scál man zellen nóti   \   thie géistlichun dáti
Verse: 2     in férti int in gánge   \   joh in thero líuto sange;
Verse: 3     Waz thaz fíhu meine,   \   thiu wát ouh hiar bizéine,
Verse: 4     joh thie ésti thie se zétitun   \   inti in then wég legitun.
Verse: 5     Thaz selba fíhu birun wír,   \   irkenn iz sélbo bi thír;
Verse: 6     thuruh dúmpheiti   \   so bírun wir iz nóti!
Verse: 7     Ésil, wízun wir tház,   \   theist fíhu filu dúmbaz;
Verse: 8     ni míduh mih thero wórto:   \   ist húarilinaz hárto;
Verse: 9     Íz mag ouh in wára   \   búrdin dragan suára,
Verse: 10     mag scádon harto lídan,   \   ni kánn inan bimídan.
Verse: 11     Wir wárun io firlórane   \   joh súntono biládane,
Verse: 12     druagun bi únsen wirdin   \   thero úmmezlicha búrdin;
Verse: 13     Joh wárun wir gispánnan,   \   mit séru bifángan,
Verse: 14     mit úbilu gibúntan,   \   ni múasun unser wáltan.
Verse: 15     Wir warun úmbitherbe   \   joh hárto filu dúmbe,
Verse: 16     so thie sar gót nirknaent,   \   ouh ímo sih ni náhent;
Verse: 17     Wárun wir firhúarot   \   mit ábgoton thuruh nót,


p. 119r    


Manuscript page: 119r 
Verse: 18     mit míssidatin mánagen,   \   bigan úns iz harto gáganen.
Verse: 19     So er tház tho wolta wérkon,   \   ginádon sinen scálkon,
Verse: 20     er unsih héilti thuruh nót,   \   thaz ther óliberg bizéinot
Verse: 21     (Er zeinot hóhi in wara   \   thera sínera gináda,
Verse: 22     thaz ólei ouh thia slíhti   \   thera sinera éregrehti);
Verse: 23     Tho sant er drúta uns sine héim   \   mit sínen gibóton zuein
Verse: 24     (thaz bizéinont thare   \   thie júngoron zuéne),
Verse: 25     Thaz sie líuti lértin,   \   untar in sih mínnotin,
Verse: 26     ouh álleswio ni dátin,   \   mit mínnu got irknátin;
Verse: 27     Thaz sie únsih muadon fúntin,   \   fon úngiloubu inbúntin,
Verse: 28     mit brédigu gibéittin,   \   thaz sie unsih zímo leittin;
Verse: 29     Mit léru sie unsih tháktin,   \   fon úngiloubu irwáktin,
Verse: 30     thaz Kríste iz wurti súazi,   \   in hérzen unsen sázi!
Verse: 31     Giwísso so firnémen wir   \   thaz Krist ni búit in thír,
Verse: 32     thia wát sie in thih ni léggen,   \   mit brédigu bithéken.
Verse: 33     Sar so iro síto bilidi   \   sie thíh gileggent úbari
Verse: 34     (thes gilóubi thu mír):   \   so buit drúhtin in thír.
Verse: 35     Er léitit mit gilústi   \   thih zer héimwisti,
Verse: 36     joh ríhtit unsih álle   \   zi themo kástelle;
Verse: 37     Zi fílu hohen múron   \   joh zi éiginen gibúron,
Verse: 38     zi fésti thes wíches,   \   thes hohen hímilriches.


p. 119v    


Manuscript page: 119v 
Verse: 39     Thaz ander ál theist niwíht;   \   theist frides fúrista gisíht,
Verse: 40     sélben gotes náhwist;   \   so wóla nan ther thár ist!
Verse: 41     Thiu míhila ménigi   \   thia wát thar breitta ingégini:
Verse: 42     mártyro hériscaf;   \   then weg man fórahten ni thárf!
Verse: 43     Sie wurfun nídar ana wánk   \   iro sélono gifánk,
Verse: 44     thes líchamen brúzi;   \   thes gánges thih nirthrúzzi!
Verse: 45     Sie sturbun báldo, so man wéiz;   \   ni dátun sie iz in úrheiz,
Verse: 46     ouh ni dátun sulih dúam   \   thúruh thehéinan wóroltruam;
Verse: 47     Ther tód was in wúnna   \   thuruh gótes minna;
Verse: 48     iz Kríst in deta súazi,   \   thaz in iz wóla sazi.
Verse: 49     Simes wír ouh bálde,   \   ob es thúrft werde,
Verse: 50     tház wir thaz irwéllen,   \   thaz férah bi inan séllen;
Verse: 51     Mag únsih thera férti   \   gilústen mit giwúrti,
Verse: 52     nu wir sie híar zi guate   \   so sehen giérete!
Verse: 53     Slíhtit uns ingégini   \   then wég thiu selba ménigi
Verse: 54     mit éstin thero wáldo,   \   tház wir gangen báldo.
Verse: 55     Theist giscríb héilag,   \   thaz wir lésen ubar dág,
Verse: 56     mit thi uns then wég, soso zám,   \   stréwent thie gótes man.
Verse: 57     Wir múgun thero wérko   \   joh fúazi thero githánko,
Verse: 58     then húgu wir giwézzen,   \   thar báldo ána sezzen.
Verse: 59     Thar dúent se uns io zi múate   \   sítu filu gúate,


p. 120r    


Manuscript page: 120r 
Verse: 60     (maht lésan io in áhtu),   \   wérk filu réhtu.
Verse: 61     Thaz sélba thaz thie súngun,   \   thie tharfóra giangun:
Verse: 62     thaz sélba inquad in wára   \   thiu áftera fúara;
Verse: 63     Sin drút thehein ther wúrti   \   er síneru gibúrti,
Verse: 64     farnám* thaz scolti wérdan tház   \   thaz wír nu eigun gárawaz;
Verse: 65     Firsáhun sih zi wáru   \   zi síneru ginádu,
Verse: 66     so wír ouh iz firnámun,   \   wir thar sídor quamun.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.