TITUS
Otfrid von Weissenburg, Evangelienbuch
Part No. 91
Previous part

Chapter: 6  
p. 120r    

VI. ABIIT JESUS IN BETHANIAM, ET DE DOCTRINA IN CRASTINUM.


Verse: 1     Fúar tho druhtin thánana   \   zi sélidon in Bethánia;
Verse: 2     in búachon thu iz lésan maht:   \   thar was er thó thio fiar náht.
Verse: 3     Gíang io in mórgan thanan úz   \   thára zi themo gótes hus;
Verse: 4     maht lésan wio er dáti   \   joh wío er se brédigoti
Verse: 5     (Zi bílide er iro hárta   \   then fígboum irthárta,
Verse: 6     wánta sie firbárun   \   thaz guatu wérk ni barun):
Verse: 7     Wio thie scálka sih irhúabun   \   joh thie gótes boton slúagun,
Verse: 8     jóh then adalérbon   \   sid tho thésen warbon,
Verse: 9     Thes héreren sún in wara,   \   thoh ni hábat er iro méra,
Verse: 10     joh wurfun úz, so er erist quám,   \   then éinigon sinan;
Verse: 11     Wio óuh thio méindati   \   nihéin nirbármeti,
Verse: 12     thes héreren fórahta   \   sie wíht nirégisota;


p. 120v    


Manuscript page: 120v 
Verse: 13     Sie iz óuh tho giméintun   \   joh in sélbo irdéiltun,
Verse: 14     thaz man thia frúma in námi   \   inti ánderen gábi.
Verse: 15     Ouh zálta in thiu sin gúati   \   bi eino brútloufti,
Verse: 16     wio kúning ein thio sítota   \   joh zíoro máchota;
Verse: 17     Wío er thaz allaz wórahta   \   joh scóno iz al bifórata
Verse: 18     sínemo lieben mánne,   \   themo éinigen kínde;
Verse: 19     Wio sine bóton sluagun,   \   thie thara giládot warun,
Verse: 20     wánta sie in iz ságetun,   \   zi góumon thara ládotun.
Verse: 21     Tho man zímo thaz tho spráh:   \   er slúag sie sár joh sie ráh
Verse: 22     (ni wás ther sih firbúrgi),   \   joh bránta ouh iro búrgi!
Verse: 23     Gibót thaz sies gizílotin   \   joh ármu wiht irhólotin,
Verse: 24     so war síe tharúze sazin,   \   mit imo thíe thoh ázin.
Verse: 25     "Nihéin", quad, "thoh thero mánno,   \   thi ih héra nu bat so gérno
Verse: 26     (thaz ságen ih iu in alawár),   \   so ninbízit es hiar!
Verse: 27     Bédu thisu bílidi   \   so méinit thio iro frávili;
Verse: 28     sie slúagun thie sie mánotun,   \   zi hímilriche ládotun.
Verse: 29     Sie woltun dúan in einan dúam   \   joh gérno imo ángust giduan,
Verse: 30     frágetun thes síndes   \   thes kéiseres zínses,
Verse: 31     Joh frágetun zi wáre   \   bi eina quénun thare;
Verse: 32     thiu habeta jú (weist es mér!)   \   zi kárle sibun brúader.
Verse: 33     Lis thar in ántreita,   \   wio scóno er thaz giméinta,


p. 121r    


Manuscript page: 121r 
Verse: 34     joh wío er in thar gizálta,   \   wio thaz al wésan scolta.
Verse: 35     Er zalta in óuh tho in alawár   \   thaz iro rúamisal thar,
Verse: 36     thia míhilun giméitheit   \   (siu was álles zi breit!):
Verse: 37     Wío se mínnotun thár   \   thaz mán sie hiazi méistar,
Verse: 38     zi góumon thar sie ouh ázin,   \   zi hérost io gisázin;
Verse: 39     Wio íagilih ouh dáti   \   thaz zíarti sin giwáti,
Verse: 40     joh súahtin fon then líutin,   \   thaz nígin se in bi nótin.
Verse: 41     Mánota er ouh tho súntar   \   thie sine júngoron in war,
Verse: 42     tház sie thaz firbárin   \   joh súliche ni wárin.
Verse: 43     Quad sie mit ótmuati   \   suahtin héroti;
Verse: 44     iz álleswio ni dóhti   \   joh wérdan ni mohti.
Verse: 45     Er wíht es ouh tho ni álta   \   joh manag wé in zálta,
Verse: 46     thaz hórtun síe io thuruh nót,   \   so Mátheus iz rédinot.
Verse: 47     Zált er in sum síban we;   \   in éinemo ist zi vílu, lé;
Verse: 48     sie hábetun ávur thuruh nót   \   iz sus gimánagfaltot!
Verse: 49     Joh sár in ouh gizálta   \   bi hiu ín iz wésan scolta,
Verse: 50     wanta sie ál firliazun   \   thaz búah sie dúan hiazun;
Verse: 51     Ouh dátun, so sie wóltun,   \   ál thaz sie ni scóltun,
Verse: 52     widar gótes ewon:   \   bi thiu zált er in then wéwon.
Verse: 53     Firwéiz in ouh tho tháre   \   bi fórasagon síne,
Verse: 54     wío sie thíe gidottun   \   joh alle mártolotun;


p. 121v    


Manuscript page: 121v 
Verse: 55     Zalt er óuh then mannon,   \   wio ér se wolti mínnon,
Verse: 56     ío then selben líutin,   \   oba síe iz ni wídorotin.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.