TITUS
Otfrid von Weissenburg, Evangelienbuch
Part No. 92
Previous part

Chapter: 7  
p. 121v    

VII. DE DOCTRINA DOMINI IN MONTE AD DISCIPULOS.


Verse: 1     Gíang tho drúhtin thánana,   \   mit ímo ouh sine thégana,
Verse: 2     óugtun sie ímo innan thés   \   gizímbiri thes húses.
Verse: 3     Quad ér: "giwisso ih ságen iu,   \   thie steina wérdent noh zi thíu
Verse: 4     thaz síe sint so únthrate,   \   hiar líggent al zisáte."
Verse: 5     Er sáz sid thémo gánge   \   in themo óliberge,
Verse: 6     frágetun sie nan súntar   \   (sie wás es filu wúntar):
Verse: 7     "Ságe uns, meistar, thánne,   \   wío thiu zít gigánge;
Verse: 8     zéichan wio thu quéman scalt,   \   joh wio thiu wórolt ouh zigát."
Verse: 9     "Góumet", quad ér, "thero dáto   \   joh weset gláwe thrato,
Verse: 10     thaz iu ni dáron in fára   \   thie mánegun lúginara.
Verse: 11     yrwéhsit jámarlichaz thíng   \   úbar thesan wóroltring
Verse: 12     in húngere int in súhti,   \   in wénegeru flúhti."
Verse: 13     Tho zált in thiu sin gúati   \   thio selbun árabeiti,
Verse: 14     thíe sie scoltun rínan   \   thuruh námon sinan;
Verse: 15     Mánno haz ouh mánagan   \   ubar síe gilégenan,
Verse: 16     níd filu stréngan,   \   so frám sie iz múgun bríngan;
Verse: 17     Wío se scoltun fáhan,   \   zi hérizohon zíahan,
Verse: 18     gibúntan furi kúninga   \   thie síne liobun thégana.


p. 122r    


Manuscript page: 122r 
Verse: 19     Det ér in dróst tho álles   \   thes íro tóthes fálles,
Verse: 20     quad théiz ni wári bi álleswaz,   \   ni si thuruh sínan éinen haz.
Verse: 21     "Ni suórget fora themo líute   \   thár ir stet in nóte,
Verse: 22     in fórahtun ni wéntet   \   waz ir in ántwurtet.
Verse: 23     Ih wísero wórto   \   giwárnon iuih hárto,
Verse: 24     réhtera rédina;   \   ir birut míne thegana.
Verse: 25     Ih bin sélbo zi thíu   \   joh thár ouh spríchu uzar íu,
Verse: 26     giwárnon hérzen guates   \   joh thráto festes múates!"
Verse: 27     Ságet in ouh zi wáre   \   fon themo éndidagen tháre,
Verse: 28     giwúag in ouh ginóto   \   thes ántikristen zíto;
Verse: 29     Thes githuíngnisses   \   thes wórolt thúltit thanne, lés;
Verse: 30     giwísso thaz ni híluh thih:   \   theist zítin allen úngilih!
Verse: 31     Sie sínt thanne in wéwen,   \   in árabeitin séren,
Verse: 32     thaz ér ni ward io súlih fal,   \   ouh iamer wérdan ni scál.
Verse: 33     Thaz kúrzit druhtin sáre   \   thuruh thie drúta sine,
Verse: 34     thuruh then góteleidon   \   mit sínen ginádon.
Verse: 35     Duit máno joh thiu súnna   \   mit fínstere únwunna,
Verse: 36     joh fállent ouh thie stérron   \   in érda filu férron.
Verse: 37     Sih weinot thánne thuruh thia quíst   \   ál thaz hiar in érdu ist;
Verse: 38     thúruh thio selbun grúnni   \   al thiz wóroltkunni!
Verse: 39     So séhent se mit githuínge   \   quéman thara zi thínge


p. 122v    


Manuscript page: 122v 
Verse: 40     fon wólkonon hérasun   \   then selben ménnisgen sun;
Verse: 41     Sine éngila ouh in alawár:   \   sie blásent iro hórn thar,
Verse: 42     thaz dúent sie iogilícho   \   filu kráftlicho;
Verse: 43     Thaz síe thes thar giávalon,   \   sine drúta al gisámanon;
Verse: 44     thaz sie quémen thara zi ín   \   so war in wórolti sie sín!
Verse: 45     Thaz iuer íagilih nu quít   \   bi thesa júngistun zít --
Verse: 46     níst ther thia gizéino,   \   ni si min fáter eino;
Verse: 47     Ódo iz wizi wóroltman,   \   wánne iz sculi wérdan,
Verse: 48     wanne iz gót wolle   \   thaz wórolt al zifálle.
Verse: 49     Thoh wírdit in giwíssi   \   ér mihil stílnissi,
Verse: 50     so jú was untar líutin   \   bi alten Nóes zítin.
Verse: 51     So sie thaz wázar thar bifíang,   \   so er érist thia árcha in gigíang:
Verse: 52     so gáhun quimit hérasun   \   ther selbo ménnisgen sun.
Verse: 53     Bi thíu sit io ginóto   \   wákar filu thráto,
Verse: 54     wanta ist firhólan iuih ál   \   wánne druhtin quéman scal!
Verse: 55     Oba ther mán westi   \   ther héime ist in ther fésti,
Verse: 56     al thaz úngizami,   \   wio ther thíob quami:
Verse: 57     Er wácheti bi nóti   \   thanne in théru ziti,
Verse: 58     dribi then thíob thanana úz,   \   ni liazi irgrában sinaz hús;
Verse: 59     Bi thiu wahtet álla thia náht,   \   thoh er iz dúe ubar máht,
Verse: 60     thaz er thaz sín ginerie   \   joh fíanton biwérie.


p. 123r    


Manuscript page: 123r 
Verse: 61     Duet ír ouh so so thér duit,   \   wanta ir ni wízut thia zít;
Verse: 62     sit wákar io so ih gibót,   \   thaz ir bimídet then nót!"
Verse: 63     Ságeta er tho then líobon   \   fón then zehen thíornon
Verse: 64     bílidi biquámi   \   joh thárazua gizámi:
Verse: 65     Wio thio fínfi fuarun   \   thie úngiware wárun,
Verse: 66     ni wárun wola wákar;   \   bi thiu missigíangun sie thar;
Verse: 67     Wio wola iz thén gifuar ouh thár   \   thio híar io warun wákar,
Verse: 68     thes hérzen sie hiar wíaltun   \   joh réino gihíaltun.
Verse: 69     Er zálta ouh bilidi ánder,   \   thaz sie sih wárnetin thiu mér:
Verse: 70     wio fuar ein mán richi   \   in ander kúningrichi;
Verse: 71     Wio ér iz er giméinta,   \   sinaz dréso déilta
Verse: 72     úntar sinen scálkon   \   zi suórglichen wérkon.
Verse: 73     "Gibót thaz sie iz bifóratin   \   jóh tharana wórahtin
Verse: 74     wúachar gizámi,   \   únz er avur quámi.
Verse: 75     Thie zuéne es wola zílotun   \   joh wola iz mérotun,
Verse: 76     ther thrítto was nihein héit   \   thúruh sina zágaheit.
Verse: 77     Er ward firdámnot thuruh nót   \   thár man inan pínot,
Verse: 78     giwisso réhto thuruh tház   \   want er wákar ni was.
Verse: 79     Thie ándere zuene síne   \   gidét er filu blíde,
Verse: 80     gifrewet in hárto iro múat,   \   so guat hérero duat;
Verse: 81     Gisázt er sie tho scóno   \   ubar búrgi sino,


p. 123v    


Manuscript page: 123v 
Verse: 82     gideta ér se filu ríche,   \   thaz in thaz thíonost liche.
Verse: 83     Bi thíu sit io wákar   \   állaz iuer líb hiar,
Verse: 84     dáges inti náhtes   \   so thénket io thes réhtes;
Verse: 85     Thaz ir thés io giílet,   \   thia zála bimídet,
Verse: 86     joh ío thes gigáhet,   \   themo égisen intflíahet;
Verse: 87     Tház ir werdet wírdig   \   sar so químit minaz thíng,
Verse: 88     thaz ir stét in ríhti   \   in míneru gisíhti!"
Verse: 89     Lert er dáges ubarlút   \   ofono állan then líut,
Verse: 90     sie quámun io ginóto   \   zi ímo sar gizíto.
Verse: 91     Fuar thánne mit then knéhton   \   in then óliberg zen náhton,
Verse: 92     was io thár ubar náht,   \   so hiar fóra ward giwáht.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.