TITUS
Otfrid von Weissenburg, Evangelienbuch
Part No. 93
Previous part

Chapter: 8  
p. 123v    

VIII. APPROPINQUABAT DIES FESTUS AZIMORUM.


Verse: 1     Náhtun sih zi nóti   \   thio hóhun gizíti,
Verse: 2     thio wir hiar fóra zaltun   \   inti óstoron nántun.
Verse: 3     Bigóndun thie éwarton   \   áhton kléinen wórton,
Verse: 4     dátun ein githíngi,   \   wío man nan giwúnni.
Verse: 5     Gibútun fílu harto   \   sélbero iro wórto,
Verse: 6     so wár so er lántes giangi,   \   tház man nan gifíangi;
Verse: 7     So wér so inan insúabi,   \   er wíg zi imo irhúabi,
Verse: 8     jóh inan irslúagi   \   er er imo io ingíangi;
Verse: 9     So wár so er wari thánne,   \   tház er wari in bánne,


p. 124r    


Manuscript page: 124r 
Verse: 10     si es álleswio ni tháhtin,   \   ni si álle sin io áhtin.
Verse: 11     Ríetun thes ginúagi,   \   wío man inan irslúagi;
Verse: 12     sie fórahtun ávur innan thés   \   ménigi thes líutes.
Verse: 13     Quádun iz ni dátin   \   in then hóhen gizítin,
Verse: 14     tház ther selbo líutstam   \   thar wíg nirhúabi zi frám.
Verse: 15     "Wir scúlun", quadun, "húggen,   \   thaz síe nan uns nirzúken;
Verse: 16     bi thiu scél iz wesan nóti   \   in ándero gizíti." --
Verse: 17     Júdas iz ouh sítota,   \   mit in iz áhtota:
Verse: 18     er wolta dúan imo einan dúam,   \   so ther díufal inan spúan.
Verse: 19     Mit ín was sin giráti,   \   thaz sélbo er ịnan firláti,
Verse: 20     mit iro bóton giangi   \   thár man nan gifíangi.
Verse: 21     "Gimáchon", quad, "in wára,   \   thaz thar nist mánno mera,
Verse: 22     ni si ékordo in giríhti   \   sin emmizig gikníhti."
Verse: 23     Sie imo sár thuruh tház   \   gihiazun míhilan scaz,
Verse: 24     in thíu er thaz gidáti,   \   so gisuáso inan giláti.
Verse: 25     Er iz fásto gihíaz   \   joh iz óuh ni firlíaz;
Verse: 26     thárazua er húgita   \   joh ál ouh so gifrúmita.
Verse: 27     Sie tháhtun thes gifúares   \   sid tho frámmortes;
Verse: 28     was ér ouh in ther fári,   \   ther líut tharmít ni wári.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.