TITUS
Otfrid von Weissenburg, Evangelienbuch
Part No. 94
Previous part

Chapter: 9  
p. 124r    

IX. VENIT AUTEM DIES AZIMORUM, IN QUA NECESSE ERAT OCCIDI PASCHA.

p. 124r    


Manuscript page: 124v 
Verse: 1     Gistúant thera zíti guati   \   thaz man ópphoroti,
Verse: 2     joh man zi thíu gisazi,   \   thaz lamp thes náhtes azi.
Verse: 3     Tho sant er Pétrusan sár,   \   Johánnem ouh tharmíti in war,
Verse: 4     gibót thaz sies gizílotin,   \   thie óstoron in gigárotin.
Verse: 5     Bigondun sie ántwurten:   \   "wara múgun wir unsih wénten,
Verse: 6     thaz wír zi thiu gigángen,   \   wir súliches bigínnen?
Verse: 7     Wir ni eigun sár, theist es méist,   \   húses wíht, so thu wéist,
Verse: 8     noh wíht sélidono,   \   thaz wír iz gimachon scóno."
Verse: 9     "Thes ni brístit", quad er zi ín,   \   "fáret in thia burg ín;
Verse: 10     uns dúat ein man gilári,   \   líhit sinan sólari."
Verse: 11     Sin íagiwedar zílota,   \   joh fúntun al so er ságeta;
Verse: 12     ther man bisuórgeta tház   \   joh léh thaz gádum gárawaz.
Verse: 13     Iz was gáro zíoro   \   gistréwitero stúolo,
Verse: 14     mit réinidu ál so filu frám,   \   so géstin súlichen gizám.
Verse: 15     Íltun sie tho hárto sár   \   sines thíonostes thár,
Verse: 16     thes zilotun se io thuruh nót;   \   sie hogtun gérno wio er gibót!
Verse: 17     So sie giríhtun allaz tház   \   joh er zi múase gisaz:
Verse: 18     gibót er thaz sie sázin,   \   mit imo al sáman azin.
Verse: 19     Wóla thaz githígini,   \   thaz nóz tho thaz gisídili,
Verse: 20     thia súazi sines múases;   \   giwerdan móhta sie thés!
Verse: 21     Ni ward io nihéin ezzan   \   mit súlichen bisézzan,


p. 125r    


Manuscript page: 125r 
Verse: 22     noh disg in álahalbon   \   ni si ávur mit then sélbon.
Verse: 23     Thár saz, mihil wúnna,   \   thiu éwiniga súnna,
Verse: 24     ni fon ímo ouh ferron   \   einlif dágastérron:
Verse: 25     Drúhtin selbo in wára --   \   waz zéllu ih thir es méra?
Verse: 26     joh thie mit ímo in nóte   \   warun wállonte.
Verse: 27     Sint sie úntar ménnisgon   \   after góte fúriston,
Verse: 28     in himilríche ouh, thaz ist wár;   \   thaz githíonotun se thar.
Verse: 29     Irthíonotun se hárto   \   fruma mánagfalto,
Verse: 30     thia selbun éra thih nu quád,   \   joh éwiniga drútscaf.
Verse: 31     Nu íst uns thiu iro gómaheit,   \   so iz zen thúrftin gigeit,
Verse: 32     zi gote wégod hárto   \   joh thrato mánagfalto.
Verse: 33     Ni múgun wir, thoh wir wóllen,   \   iro lób irzellen;
Verse: 34     bi thiu fáhemes mit fréwidu   \   nu frámmort zi theru rédinu.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.