TITUS
Otfrid von Weissenburg, Evangelienbuch
Part No. 97
Previous part

Chapter: 12  
p. 126v    

XII. CONTRISTATUS EST JESUS SPIRITU ET DIXIT EIS DE TRADITIONE EJUS.

p. 127r    


Manuscript page: 127r 
Verse: 1     So ér in gizéigota thár,   \   so ward er únfrawer sár,
Verse: 2     sih drúabta sines múates   \   ther fréwida ist alles gúates.
Verse: 3     Róu thio sino gúati   \   thie wénegun líuti;
Verse: 4     thes óuh ni was tho duála,   \   thero júngorono zála.
Verse: 5     "Ih zéllu iu", quad er ubarlút,   \   "alle wárut ir mir drút,
Verse: 6     ih zuélifi iuih zélita   \   joh súntar mir irwélita
Verse: 7     Uzar wóroltmenigi,   \   ir wárit min githígini,
Verse: 8     thaz íh ouh min giráti   \   iu allaz kúnd dati;
Verse: 9     Joh so iz zi thísu wurdi   \   thaz ír mir leistit húldi;
Verse: 10     bi thiu méistig zóh ih iuih,   \   ir mír ni datit ásuih.
Verse: 11     Thoh habet súmilih thaz múat,   \   mir hinaht ánarati duat,
Verse: 12     joh gíbit mih zi hánton   \   then minen fíanton."
Verse: 13     Sah ein zi ándremo,   \   in hérzen was in ángo,
Verse: 14     in múate irquamun hárto   \   thero drúhtines wórto;
Verse: 15     In múate was in thráti   \   thie égislichun dáti,
Verse: 16     joh fórspotun zi nóti,   \   fon wémo er sulih quáti:
Verse: 17     Io untar ín umbiríng,   \   fon wémo quami súlih thing,
Verse: 18     so wélicho dáti   \   joh sulih ánarati!
Verse: 19     Tho sprachun sie álle fon ín:   \   "ja íh iz, drúhtin, ni bín?
Verse: 20     ja iz hérza min ni rúarit   \   noh súlih balo fúarit!"
Verse: 21     Thoh síe sih westin réinan   \   úzana then éinan,


p. 127v    


Manuscript page: 127v 
Verse: 22     gilóubtun sie mer hárto   \   thero sínero worto.
Verse: 23     Quad tho Júdas ther iz ríat   \   joh állan thesan scádon bliant,
Verse: 24     er sprah mit únwirdin:   \   "meistar, ja íh iz ni bin?"
Verse: 25     "Thaz quisdú", quad er sár;   \   "thoh ságen ih iu in álawar:
Verse: 26     thér man thultit íamer   \   filu mánagfaltaz sér,
Verse: 27     So kráftlichan wéwon   \   so thúltit er in éwon,
Verse: 28     thaz ímo sazi thánne   \   ni wúrti er io zi mánne."
Verse: 29     Pétrus bat Johánnan,   \   thaz er iréiskoti then mán,
Verse: 30     er zi imo irfrágeti,   \   wer súlih balo ríati.
Verse: 31     (Thaz bóuhnita er giwísso,   \   was náhisto gisézzo;
Verse: 32     thes méisteres in wára   \   hábetun sie mihila éra;
Verse: 33     Wánta thar saz, thágeta   \   Pétrus, so ih nu ságeta;
Verse: 34     ni gidórsta sprechan lúto   \   hérosto thero drúto!).
Verse: 35     Tho frágeta er thio dáti   \   joh thaz ánarati,
Verse: 36     bat ér in iz giságeti,   \   fon suórgon sie al irrétiti.
Verse: 37     "Thaz sítot", quad er, "ana nót   \   themo ih bíutu thiz brót."
Verse: 38     tho nám er eina snítun thar   \   inti bot sa Júdase sar.
Verse: 39     After thémo muase   \   so kleib er sátanase,
Verse: 40     joh wíalt sin sár ubar ál,   \   sélbo ther díufal.
Verse: 41     So er zi thíu tho giwánt   \   thaz er thia snítun thar firslánt:
Verse: 42     úzgiang sar tho líndo   \   ther díufeles gisíndo.


p. 128r    


Manuscript page: 128r 
Verse: 43     Spráh tho drúhtin zi imo sár   \   (ni tház er iz gibúti in war!):
Verse: 44     "thaz thu in múate fuaris,   \   slíumo so giscíari iz."
Verse: 45     Ni wás thar ther firstúanti,   \   waz er mit thíu meinti,
Verse: 46     ouh thia múatdati   \   thehéino mezzo irknáti.
Verse: 47     Súme firnámun iz in tház   \   wanta er sékilari wás,
Verse: 48     thaz híazi er io then wórton   \   waz ármen wihtin spénton,
Verse: 49     Ódo er thes gisúnni,   \   zen óstoron waz giwúnni,
Verse: 50     tház sie thanne hábetin,   \   thes dáges sih gidrágotin.
Verse: 51     So slíumo sos er úzgiang,   \   finstar náht nan intfíang;
Verse: 52     fon themo líohte was ther mán   \   in éwon giskéidan.
Verse: 53     Er fuar ílonto   \   zi fúristen thero líuto,
Verse: 54     máchota zi nóti   \   thaz Krístes ánarati.
Verse: 55     Bigán sih frewen líndo   \   ther kuning éwinigo tho,
Verse: 56     thóh er scolti in mórgan   \   bi ríchi sin irstérban.
Verse: 57     Ni hábat er in thía redina   \   ni si ékord einlif thégana;
Verse: 58     ih meg iz báldo sprechan:   \   ther zuélifto was gisuíchan.
Verse: 59     Ni stúant thiu maht thes wíges   \   in ménigi thes héries,
Verse: 60     iz was ál in rihti   \   in sínes einen kréfti.
Verse: 61     Er quam so rísi hera in lánt   \   joh kréftiger gígant,
Verse: 62     in éinwigi er nan stréwita,   \   ther ríchi sinaz dárota;
Verse: 63     Then fúriston therera wórolti   \   nótagan gihóloti,


p. 128v    


Manuscript page: 128v 
Verse: 64     in bánt inan gilégiti,   \   er fúrdir uns ni dériti!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.